កូរ៉េខាងជើង ធ្វើព្យុហយាត្រាយោធាធំបំផុតមិនធ្លាប់មាន បង្ហាញទាំងមីស៊ីល ល្បឿនលឿនជាងសំឡេង

កូរ៉េខាងជើងបានធ្វើព្យុហយាត្រាយោធាទ្រង់ទ្រាយធំតាមការរំពឹងទុកកាលពីល្ងាចថ្ងៃចន្ទក្នុងរដ្ឋធានីព្យុងយ៉ាង ។

ប្រភពយោធាកូរ៉េខាងត្បូងបាននិយាយថា ក្បួនព្យុហយាត្រាយោធាបានចាប់ផ្តើមនៅទីលានមួយកណ្តាលទីក្រុងព្យុងយ៉ាងនៅម៉ោងប្រហែល ១០ យប់ បន្ទាប់ពីពិធីប្រារព្ធខួបលើកទី ៩០ នៃការបង្កើតកងទ័ពរបស់ខ្លួន ។

ប្រព័ន្ធផ្សព្វផ្សាយកូរ៉េខាងត្បូងបានរាយការណ៍ថា ក្បួនដង្ហែនេះប្រហែលជាមានទំហំធំបំផុតមិនធ្លាប់មាន ដោយមានទាហានចូលរួមប្រហែល ២០,០០០ នាក់ ហើយប្រហែលជាមានអាវុធ និងឧបករណ៍យោធាជាង ២៥០ គ្រឿង ។

ទន្ទឹមនោះ ក្បួនព្យុហយាត្រានេះក៏បានបង្ហាញនូវកាំជ្រួចមីស៊ីលថ្មីបំផុតរបស់ប្រទេសផងដែរដូចជា មីស៊ីលផ្លោងអន្តរទ្វីប Hwasong-17 និងមីស៊ីល Hwasong-8 ជាដើមដែលក្រុងព្យុងយ៉ាងអះអាងថា ជាអាវុធល្បឿនលឿនជាងសំឡេង ។

គួរបញ្ជាក់ថា កាលពីថ្ងៃចន្ទគឺជាខួបលើកទី ៩០ ចាប់តាំងពីលោក គីម អ៊ីលសុង ដែលជាជីតារបស់មេដឹកនាំបច្ចុប្បន្នគឺលោក គីម ជុងអ៊ុន បានបង្កើតកងទ័ពបដិវត្តន៍ប្រជាជនកូរ៉េក្នុងឆ្នាំ ១៩៣២ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ លោកយាយ ជប៉ុន ចាស់ជាងគេបំផុតលើលោក ទទួលមរណភាពហើយ