លោក Zelensky ថា រដូវរងាឆ្នាំនេះគឺលំបាកជាងពេលណាទាំងអស់សម្រាប់ អ៊ុយក្រែន

លោកប្រធានាធិបតី Volodymyr Zelenskyy បាននិយាយថា រដូវរងាឆ្នាំនេះនឹងក្លាយជារដូវលំបាកបំផុតសម្រាប់ប្រជាជនអ៊ុយក្រែន ចាប់តាំងពីប្រទេសនេះបានទទួលឯករាជ្យនៅឆ្នាំ ១៩៩១ មក ។

លោក Zelenskyy បាននិយាយនៅក្នុងសុន្ទរកថារបស់លោកថា “បច្ចុប្បន្នយើងត្រូវរៀបចំសម្រាប់រដូវរងានៅឆ្នាំនេះ ហើយវាមិនធ្លាប់កើតមានទាល់តែសោះ ចាប់តាំងពីប្រទេសទទួលបានឯករាជ្យ ដោយសារតែសង្គ្រាមលុកលុយរបស់រុស្ស៊ី ហើយក្រុមមន្ត្រីរបស់យើងក៏កំពុងពិភាក្សាអំពីការទិញឧស្ម័ន និងធ្យូងថ្មបន្ថែមផងដែរដើម្បីផ្ដល់ការកម្ដៅដល់ប្រជាជនរបស់យើង” ។

លោក Zelensky បញ្ជាក់ថា “នៅពេលនេះយើងនឹងមិនលក់ឧស្ម័ន និងធ្យូងថ្មរបស់យើងទៅក្រៅប្រទេសនោះទេ ហើយផលិតកម្ម​ក្នុង​ស្រុក​ទាំង​អស់​នឹង​ត្រូវ​បម្រុងទុក​សម្រាប់​ប្រជាពលរដ្ឋ​យើង” ។

លោក​ក៏​បាន​និយាយ​ផង​ដែរ​ថា រដ្ឋមន្ត្រីរបស់យើង​កំពុង​ធ្វើ​ការ​ជួសជុល​រោងចក្រថាមពល​កម្ដៅ រោងចក្រ​ផលិត​​កម្ដៅ​រួមបញ្ចូលគ្នា និងឡកម្ដៅ​ដែល​រង​ការ​ខូចខាត​ក្នុង​សង្គ្រាម” ។

គួរបញ្ជាក់ថា ការសម្រេចចិត្តនេះត្រូវបានធ្វើឡើងនៅក្នុងកិច្ចប្រជុំរបស់លោកប្រធានាធិបតីជាមួយមន្ត្រីរដ្ឋាភិបាល និងតំណាងក្រុមហ៊ុនថាមពលរដ្ឋ និងនិយតកររបស់អ៊ុយក្រែន ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ ណាតូ ធ្វើសមយុទ្ធទ័ពជើងទឹកជាមួយប្រទេសត្រៀមចូលជាសមាជិកនៅ សមុទ្របាល់ទិក