ជប៉ុន​​ត្រូវ​​បាន​​បោះ​​ឆ្នោត​​ចូល​​ក្រុម​​ប្រឹក្សា​​សន្តិសុខ​អង្គការ​សហ​ប្រជា​ជាតិ​ ​​២​​ឆ្នាំ​

កាលពីថ្ងៃព្រហស្បតិ៍ ទី៩ ខែមិថុនា ប្រទេសជប៉ុនស្ថិតក្នុងចំណោមប្រទេសចំនួន៥ត្រូវបានបោះឆ្នោតឲ្យទទួលបានអាសនៈមិនអចិន្ត្រៃនៅក្រុមប្រឹក្សាសន្តិសុខអង្គការសហប្រជាជាតិសម្រាប់ឆ្នាំ២០២៣ និង២០២៤។

ប្រទេសស្វីស ម៉ូសំប៊ិក ម៉ាល់តា និងអេក្វាឌ័រ ក៏នឹងកាន់អាសនៈរយៈពេលពីរឆ្នាំនេះផងដែរ ដែលនឹងចាប់ចាប់ពីថ្ងៃទី១ ខែមករា ឆ្នាំ២០២៣។ ប្រទេសទាំង៥ខាងលើនេះនឹងកាន់តំណែងបន្តពីប្រទេសឥណ្ឌា ន័រវេស កេនយ៉ា ម៉ិកស៊ិក និងអៀរឡង់។

ក្រុមប្រឹក្សាសន្តិសុខអង្គការសហប្រជាជាតិមានសមាជិកចំនួន១៥ ក្នុងនោះមាន៥ជាសមាជិកអចិន្ត្រៃគឺសហរដ្ឋអាមេរិក រុស្ស៊ី ចិន បារាំង និងអង់គ្លេស។

សម្រាប់តំណែងចំនួន១០ផ្សេងទៀតត្រូវបានបំពេញដោយប្រទេសផ្សេងសម្រាប់រយៈពេល២ឆ្នាំដែលត្រូវបានប្រកាសជារៀងរាល់ឆ្នាំ។

ប្រទេសជប៉ុន ស្វីស ម៉ូសំប៊ិក ម៉ាល់តា និងអេក្វាឌ័រ ត្រូវបានបោះឆ្នោតដោយមហាសន្និបាតអង្គការសហប្រជាជាតិនៅក្នុងការបោះឆ្នោតសម្ងាត់មួយ។ ក្នុងចំណោមសមាជិកចំនួន១៩៣របស់មហាសន្និបាត ជប៉ុនទទួលបានសំឡេងគាំទ្រចំនួន១៨៤។

អនុរដ្ឋមន្ត្រីក្រសួងការបរទេសជប៉ុន លោក Odawara Kiyoshi បានលើកឡើងថា អាទិភាពរបស់រដ្ឋាភិបាលទីក្រុងតូក្យូគឺសន្តិសុខ ​ថាមពល និងស្បៀងអាហារ។

ចំពោះប្រទេសម៉ូសំប៊ិកត្រូវបានបោះឆ្នោតចូលជាសមាជិកក្រុមប្រឹក្សាសន្តិសុខអង្គការសហប្រជាជាតិជាលើកដំបូងនៅក្នុងប្រវត្តិសាស្ត្ររបស់ខ្លួនដែលទទួលបានសំឡេងគាំទ្រ​១៩២។ ចំណែកស្វីសទទួលបាន១៨៧សំឡេង ប្រទេសម៉ាល់តាទទួលបាន១៨៥សំឡេង និងអេក្វាឌ័រទទួលបាន១៩០សំឡេង៕

ប្រែសម្រួល៖ វីរបុត្រ
ប្រភព៖ AFP