លោក ស៊ី ថ្កោលទោស បស្ចិមប្រទេស ចំពោះការដាក់ទណ្ឌកម្ម រុស្ស៊ី (មានវីដេអូ)

ប្រធានាធិបតីចិន លោក ស៊ី ជីនពីង កាលពីថ្ងៃពុធទី២២ខែមិថុនា បានរិះគន់សហរដ្ឋអាមេរិក និងសហភាពអឺរ៉ុប ចំពោះការដាក់ទណ្ឌកម្មលើរុស្ស៊ី ជុំវិញការលុកលុយនៅអ៊ុយក្រែន ដោយលោកនិយាយថា ការធ្វើដូច្នេះ នឹងធ្វើឲ្យប៉ះពាល់ដល់ផលប្រយោជន៍ផ្ទាល់ខ្លួនទៅវិញទេ។

លោកបានធ្វើការកត់សម្គាល់បែបនេះ ក្នុងអំឡុងពេលបើកវេទិកាធុរកិច្ច BRICS ដែលជាកិច្ចប្រជុំរបស់រដ្ឋាភិបាលនៃប្រទេសប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូង។ កិច្ចប្រជុំធុរកិច្ចនេះធ្វើឡើង មុនកិច្ចប្រជុំកំពូលបឋមនៃបណ្តាប្រទេស BRICS ដែលរៀបចំនៅទីក្រុងប៉េកាំងក្នុងឆ្នាំនេះ។

យោងតាមទីភ្នាក់ងារ Anadolu, លោក ស៊ី បាននិយាយថា “ការយកសេដ្ឋកិច្ចពិភពលោកធ្វើជារឿងនយោបាយ ហើយប្រែក្លាយវាទៅជាឧបករណ៍ ឬអាវុធដើម្បីដាក់ទណ្ឌកម្មដោយចេតនា លើបុគ្គលនៅក្នុងប្រព័ន្ធហិរញ្ញវត្ថុ និងរូបិយវត្ថុអន្តរជាតិ, វានឹងធ្វើឲ្យប៉ះពាល់ដល់ផលប្រយោជន៍ផ្ទាល់ខ្លួន ក៏ដូចជាអ្នកដ៏ទៃ ហើយបង្កភាពរងទុក្ខវេទនា”។

លោកបន្ត​ថា ការ​ប្រឈម​មុខដាក់​គ្នា​បែប​នេះ ​មិន​នាំ​មក​នូវ​សន្តិភាព ឬ​ស្ថិរភាព​ទេ ប៉ុន្តែ​បែរ​ជា​បង្កើត​ជម្លោះ និង​សង្គ្រាម​ថែម​ទៀតទៅវិញ។

វិបត្តិអ៊ុយក្រែន គឺជាការដាស់តឿនមួយផ្សេងទៀតសម្រាប់ទាំងអស់គ្នានៅក្នុងពិភពលោក។ វារំឭកយើងថា ជំនឿងងឹតងងុលលើអ្វីដែលគេហៅថា “ទីតាំងនៃកម្លាំង” និងការព្យាយាមពង្រីកសម្ព័ន្ធភាពយោធា និងស្វែងរកសន្តិសុខតែម្ខាង វានឹងធ្វើឲ្យខ្លួន​ឯងធ្លាក់ចូលទៅ​ក្នុង​បញ្ហា​សន្តិសុខ។

គួរបញ្ជាក់ថា ប្រទេសចិនបានបដិសេធ ចូលរួមជាមួយសហភាពអឺរ៉ុប និងប្រទេសដទៃទៀតនៅទូទាំងពិភពលោក ក្នុងការដាក់ទណ្ឌកម្មរុស្ស៊ី ជុំវិញសង្គ្រាមនៅអ៊ុយក្រែនដែល ចាប់ផ្តើមនៅថ្ងៃទី ២៤ ខែកុម្ភៈ។

ក្នុងអំឡុងការហៅទូរស័ព្ទកាលពីសប្តាហ៍មុន លោក ស៊ី បានប្រាប់លោក ពូទីន ថា ទីក្រុងប៉េកាំងគាំទ្រផលប្រយោជន៍អធិបតេយ្យភាព និងសន្តិសុខរបស់រុស្ស៊ី៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ UPI

ចុចអាន៖ មេទ័ពហ្វាំងឡង់ ប្រកាសត្រៀមធ្វើសង្គ្រាមជាមួយ រុស្ស៊ី