អូស្ត្រាលី ត្រៀមជម្លៀសពលរដ្ឋរាប់ម៉ឺននាក់ ខណៈទឹកជំនន់នៅទីក្រុង ស៊ីដនី កាន់តែអាក្រក់ទៅៗ

រដ្ឋាភិបាលសហព័ន្ធរបស់ប្រទេសអូស្ត្រាលីបានប្រកាសពីគ្រោះមហន្តរាយធម្មជាតិនៅក្នុងតំបន់លិចទឹកចំនួន ២៣ នៃរដ្ឋ New South Wales ហើយយ៉ាងហោចណាស់មនុស្ស ៥០,០០០ នាក់ប្រហែលជាត្រូវបោះបង់ចោលផ្ទះរបស់ពួកគេ ខណៈមនុស្ស ៣២,០០០ នាក់ត្រូវបានព្រមានពីការជម្លៀស ដោយសារតែទឹកជំនន់ ។

ទន្ទឹមនោះនាយករដ្ឋមន្ត្រីអូស្ត្រាលីលោក Anthony Albanese បានប្រកាសថា លោកនឹងចុះទៅតំបន់ដែលរងការខូចខាតដោយទឹកជំនន់ រួមជាមួយនឹងនាយករដ្ឋមន្ត្រីរដ្ឋ New South Wales លោក Dominic Perrottet ផងដែរនៅថ្ងៃពុធនេះ ។

យោងតាមអ្នកគ្រប់គ្រងសេវាសង្គ្រោះបន្ទាន់របស់រដ្ឋលោក Ashley Sullivan បានឲ្យដឹងថា ក្រុមអ្នកជួយសង្គ្រោះនៅទីក្រុងស៊ីដនីបានធ្វើការពេញមួយយប់ ខណៈដែលទឹកទន្លេបានកើនឡើងដល់កម្រិតគ្រោះថ្នាក់ ហើយយ៉ាងហោចណាស់អ្នកស្រុក ១០០ នាក់នៅក្នុងទីក្រុងត្រូវជួយសង្គ្រោះចេញពីរថយន្ត និងផ្ទះរបស់ពួកគេ ។

ចំណែកការិយាល័យឧតុនិយម (BoM) បានរាយការណ៍ថា ព្យុះពពកបាននាំមកនូវភ្លៀងធ្លាក់កម្រិត ៨០ សង់ទីម៉ែត្រក្នុងរយៈពេល ៣ ថ្ងៃនៅក្នុងតំបន់នៃទីក្រុងស៊ីដនី ពោលលើសពីមធ្យមភាគប្រចាំឆ្នាំរបស់ប្រទេសអូស្ត្រាលី ដែលមានត្រឹម ៥០ សង់ទីម៉ែត្រ ។

ការិយាល័យឧតុនិយមក៏បានព្យាករណ៍ដែរថា ព្យុះនេះនឹងផ្លាស់ទីទៅភាគខាងជើង ហើយហានិភ័យនៃគ្រោះទឹកជំនន់នៅតែមាន ខណៈប្រទេសដែលមិនស៊ាំនឹងអាកាសធាតុធ្ងន់ធ្ងរមួយនេះកំពុងជួបប្រទះវិបត្តិអាកាសធាតុដែលបណ្តាលឲ្យមានភ្លើងឆេះព្រៃ ភ្លៀងធ្លាក់ខ្លាំង រលកកម្ដៅ និងការខ្វះខាតបន្លែ និងសត្វព្រៃជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ រដ្ឋមន្រ្តីការបរទេស អាមេរិក នឹងមកប្រទេសអាស៊ានចំនួន ២ នៅសប្ដាហ៍នេះ