រុស្ស៊ី ផ្ដល់ជំនួយរាប់ម៉ឺនតោនដល់ អ៊ុយក្រែន

លោកឧត្តមសេនីយ៍ Mikhail Mizintsev ប្រធានមជ្ឈមណ្ឌលគ្រប់គ្រងការពារជាតិរុស្ស៊ី និងជាអ្នកដឹកនាំទីស្នាក់ការសម្របសម្រួលការឆ្លើយតបផ្នែកមនុស្សធម៌របស់រុស្ស៊ីបាននិយាយថា រហូតមកដល់ពេលនេះរុស្ស៊ីបានបញ្ជូនទំនិញជាជំនួយមនុស្សធម៌ជាង ៤៨,៥០០ តោនទៅកាន់ប្រទេសអ៊ុយក្រែន និងសាធារណៈរដ្ឋ Donbas ។

លោកឧត្តមសេនីយ៍ Mizintsev បាននិយាយនៅក្នុងសន្និសីទសារព័ត៌មានមួយថា “ចាប់តាំងពីថ្ងៃទី ២ ខែមីនា ឆ្នាំ ២០២២ មកប្រទេសរុស្ស៊ីបានបញ្ជូនសម្ភារៈសំខាន់ៗដូចជា អាហារ ឱសថ និងការផ្គត់ផ្គង់វេជ្ជសាស្ត្រចំនួន ៤៨,៥០០ តោនទៅកាន់ប្រទេសអ៊ុយក្រែន និងសាធារណរដ្ឋ Donbas ភាគខាងកើត” ។

រុស្ស៊ីបានចាប់ផ្តើមប្រតិបត្តិការយោធាពិសេសមួយក្នុងប្រទេសអ៊ុយក្រែនកាលពីថ្ងៃទី ២៤ ខែកុម្ភៈ ដើម្បីឆ្លើយតបទៅនឹងការអំពាវនាវរបស់សាធារណរដ្ឋប្រជាមានិត Donetsk និង Lugansk សម្រាប់ការការពារពីកងទ័ពអ៊ុយក្រែន ។

ទន្ទឹមនោះក្រសួងការពារជាតិរុស្ស៊ីបាននិយាយថា គោលដៅនៃប្រតិបត្តិការនេះគឺសំដៅលើហេដ្ឋារចនាសម្ព័ន្ធយោធាអ៊ុយក្រែន និងធ្វើឲ្យតំបន់គ្មានយោធា ក៏ដូចជារំដោះតំបន់ Donbas ទាំងស្រុងផងដែរ ។

ស្របពេលជាមួយគ្នានោះប្រធានាធិបតីរុស្ស៊ីលោក វ្ល៉ាឌីមៀ ពូទីន បាននិយាយថា ប្រតិបត្តិការនេះមានគោលបំណងការពារមនុស្សដែលទទួលរងនូវការប្រល័យពូជសាសន៍ដោយរបបក្រុងកៀវក្នុងរយៈពេល ៨ ឆ្នាំកន្លងមកនេះ ហើយចាប់តាំងពីពេលនោះមកបណ្ដាប្រទេសលោកខាងលិចក៏បានដាក់ទណ្ឌកម្មរុស្ស៊ី និងបញ្ជូនអាវុធជាហូរហែទៅកាន់អ៊ុយក្រែន ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ អ៊ុយក្រែន ប្រកាសបាត់បង់រោចក្រថាមពលធំជាងគេទី ២ ទៅក្នុងកណ្ដាប់ដៃ រុស្ស៊ី