ព័ត៌មានអន្ដរជាតិ

ឡើងកម្តៅ! កូរ៉េទាំង២ បាញ់ព្រមានដាក់គ្នា ក្បែរព្រំដែនសមុទ្រ (មានវីដេអូ)

បានផុស

៤ years មុន

នៅ

ថ្ងៃចន្ទ ២៤ តុលា ២០២២

ដោយ

ទីភ្នាក់ងារព័ត៌មាន KCNA បានចុះផ្សាយថា នៅថ្ងៃចន្ទទី២៤ខែតុលានេះ ប្រទេសកូរ៉េខាងជើងបានបាញ់ផ្លោងកាំភ្លើងធំចំនួន១០គ្រាប់ ចេញពីឆ្នេរសមុទ្រភាគខាងលិចរបស់ខ្លួន ជាការឆ្លើយតបទៅនឹងការបាញ់ព្រមានរបស់កូរ៉េខាងត្បូង ដែលបានបាញ់ព្រមានកប៉ាល់កូរ៉េខាងជើង ដែលឆ្លងកាត់ព្រំដែនសមុទ្រកូរ៉េទាំងពីរ។

អ្នកនាំពាក្យអគ្គសេនាធិការនៃកងទ័ពប្រជាជនកូរ៉េខាងជើងបាននិយាយថា ប្រទេសកូរ៉េខាងជើងបានបាញ់ព្រមាននៅម៉ោងប្រហែល ៥:១៥នាទីព្រឹក បន្ទាប់ពីយោធាកូរ៉េខាងត្បូង បាញ់ព្រមាននៅម៉ោងប្រហែល ៣:៥០ នាទីព្រឹក។

យោងតាមអគ្គសេនាធិការចម្រុះរបស់កូរ៉េខាងត្បូង, ខ្លួនបានបណ្តេញកប៉ាល់ពាណិជ្ជករកូរ៉េខាងជើង ដែលឆ្លងកាត់ខ្សែបន្ទាត់ព្រំដែនភាគខាងជើង ដែលជាព្រំដែនសមុទ្រជាក់ស្តែងរវាងកូរ៉េទាំងពីរ។

គួរបញ្ជាក់ថា ព្រំដែនសមុទ្រ ត្រូវបានគេចាត់ទុកថាជាចំណុចក្តៅ ហើយជាទីតាំងនៃការប៉ះទង្គិចគ្នាជាច្រើនដង រវាងកូរ៉េទាំងពីរក្នុងរយៈពេលប៉ុន្មានឆ្នាំមកនេះ។

ភាពតានតឹងបានកើនឡើងខ្ពស់ ក្នុងរយៈពេលប៉ុន្មានសប្តាហ៍ចុងក្រោយ ដោយកូរ៉េខាងជើងបានបាញ់មីស៊ីល និងកាំភ្លើងធំជាច្រើនគ្រាប់ ដែលបានបង្កការញុះញង់ដល់កូរ៉េខាងត្បូង និងជប៉ុន ហើយនាំឲ្យការព្រួយបារម្ភដល់សម្ព័ន្ធមិត្តលោកខាងលិច។

ទីក្រុងព្យុងយ៉ាង បានបង្កើនសមយុទ្ធយោធារបស់ខ្លួនយ៉ាងខ្លាំងនាពេលថ្មីៗនេះ ខណៈក្រុងសេអ៊ូលនិងក្រុងវ៉ាស៊ីនតោននិយាយថា មេដឹកនាំកូរ៉េខាងជើងលោកគីម ជុងអ៊ុន ជិតធ្វើការសាកល្បងនុយក្លេអ៊ែរលើកទីប្រាំពីរហើយ។

ការបាញ់ព្រមានដាក់គ្នាកាលពីថ្ងៃចន្ទ បានកើតឡើងចំថ្ងៃតែមួយ ដែលអនុរដ្ឋមន្ត្រីការបរទេសសហរដ្ឋអាមេរិក លោកស្រី Wendy Sherman ទៅបំពេញទស្សនកិច្ចនៅប្រទេសជប៉ុន និងជួបពិភាក្សាត្រីភាគីជាមួយជប៉ុន និងកូរ៉េខាងត្បូង៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ CNA

ចុចអាន៖ កូរ៉េខាងជើង បាញ់កាំភ្លើងធំ រាប់រយគ្រាប់ ព្រមាន កូរ៉េខាងត្បូង