ព័ត៌មានអន្ដរជាតិ

ឆ្មាំសមុទ្រ ចិន ដេញនាវា ជប៉ុន ៥ គ្រឿងចេញពីប្រជុំកោះមានជម្លោះ

បានផុស

១ ខែ មុន

នៅ

ថ្ងៃអង្គារ ៣១ មករា ២០២៣

ដោយ

ឆ្មាំសមុទ្រចិនបានបណ្ដេញនាវាជប៉ុនចំនួន ៥ គ្រឿងចេញពីដែនទឹកជុំវិញក្រុមកូនកោះដែលមានជម្លោះនៅក្នុងសមុទ្រចិនខាងកើតកាលពីថ្ងៃចន្ទ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារឆ្មាំសមុទ្រចិនបញ្ជាក់នៅលើប្រព័ន្ធផ្សព្វផ្សាយសង្គមថា នាវារបស់កងកម្លាំងដែនសមុទ្រប្រទេសចិនបានធ្វើសកម្មភាពស្របតាមច្បាប់ និងបានចាត់វិធានការចាំបាច់ ដោយគ្រាន់តែធ្វើការព្រមានឲ្យជប៉ុនបើកនាវាចេញប៉ុណ្ណោះ ។

ឆ្មាំចិនបញ្ជាក់ទៀតថា ការបណ្ដេញនាវានេះ គឺជាការជំរុញឲ្យជប៉ុនចៀសវាងសកម្មភាពខុសច្បាប់នៅក្បែរប្រជុំកោះដែលទាមទារដោយប្រទេសទាំងពីរ ដោយសារតែកោះដែលមានជម្លោះនេះ គឺស្ថិតនៅភាគខាងកើតនៃកោះតៃវ៉ាន់ ហើយត្រូវបានគ្រប់គ្រងដោយប្រទេសជប៉ុន ដែលហៅពួកគេថា ប្រជុំកោះ Senkaku ខណៈចិនវិញហៅថា កោះ Diaoyu ។

ទាក់ទិននឹងដែនកោះនេះដែរ ជប៉ុនអះអាងថាមានអធិបតេយ្យភាពលើកោះនេះតាំងពីឆ្នាំ ១៨៩៥ មកម៉្លេះ ខណៈចិនក៏លើកឡើងដែរថា ជាទឹកដីរបស់ខ្លួននៅលើផែនទីជប៉ុនចុះឆ្នាំ ១៧៨៣ និងឆ្នាំ ១៧៨៥ ។

បើរំឭកទៅអតីតកាលវិញ សហរដ្ឋអាមេរិកបានកាន់កាប់ប្រជុំកោះនេះ ក្នុងអំឡុងសង្គ្រាមលោកលើកទី ២ ប៉ុន្តែបានប្រគល់ទៅឲ្យប្រទេសជប៉ុនវិញក្នុងឆ្នាំ ១៩៧២ ខណៈប្រទេសចិននិយាយថា កោះទាំងនោះត្រូវបានជប៉ុនរឹបអូសដោយខុសច្បាប់ ៕