ថៃ ផ្ដល់ជំនួយដល់តួកគី ក្រោយប្រជាជនរបស់ខ្លួន ៤នាក់ ទទួលរងគ្រោះ

នៅរសៀលថ្ងៃទី៧ ខែកុម្ភៈ ឆ្នាំ២០២៣ លោក ដន ប្រាម៉ាត់វីណៃ ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសថៃបាននិយាយអំពីវឌ្ឍនភាពនៃគ្រោះរញ្ជួយដីនៅប្រទេសតួកគីថា ស្ថានទូតថៃប្រចាំនៅទីក្រុងអង់ការ៉ា ប្រទេសតួកគី បានរាយការណ៍ពីវឌ្ឍនភាពរបស់ប្រជាជនថៃថា មានមនុស្សចំនួន ៤នាក់ដែលរងផលប៉ះពាល់ពីគ្រោះរញ្ជួយដីនៅតួកគី ក្នុងនោះម្នាក់ត្រូវបានខូចខាតទ្រព្យសម្បត្តិ និង ៣នាក់ផ្សេងទៀតបានផ្លាស់ទៅស្នាក់នៅជាបណ្ដោះអាសន្ននៅក្នុងតំបន់ដែលអាជ្ញាធរតួកគីរៀបចំទុក។ លោកថា ជនជនថៃទាំង ៤នាក់បានស្ថិតនៅទីកន្លែងមានសុវត្ថិភាពនៅក្នុងទីក្រុងដែលឆ្ងាយពីទីក្រុងអង់ការ៉ា។

លោក ដន បានបន្តថា ខណៈពេលនេះកិច្ចប្រជុំគណៈរដ្ឋមន្ត្រីថៃបានអនុម័តលើការផ្តល់ជំនួយតាមទម្រង់ផ្សេងៗទៅប្រទេសតួកគី ដែលយើង (ថៃ) បានត្រៀមរួចជាស្រេចក្នុងការជួយទាំងផ្នែកថវិកា ថ្នាំពេទ្យ និងសម្ភារៈបរិក្ខាពេទ្យ និងក្រុមជួយសង្គ្រោះ ដែលខណៈពេលនេះរដ្ឋាភិបាលថៃ នៅរង់ចាំតែការសម្របសម្រួលពីរដ្ឋាភិបាលតួកគីប៉ុណ្ណោះ ថាតើពួកគេ (តួកគី) ត្រូវការជំនួយបែបណា៕

ប្រែសម្រួល៖ គង់ សំអាន

ប្រភព៖ THE STANDARD