ប្អូនស្រីលោក គីម ជុងអ៊ុន ព្រមានអាមេរិក ក្រោយកូរ៉េខាងជើង បាញ់មីស៊ីល២ថ្ងៃជាប់គ្នា

ប្អូនស្រីរបស់មេដឹកនាំគីម ជុងអ៊ុន បានព្រមានដល់សហរដ្ឋអាមេរិក បន្ទាប់ពីកូរ៉េខាងជើង បាញ់បង្ហោះមីស៊ីលផ្លោងចំនួនពីរគ្រាប់ នៅព្រឹកថ្ងៃចន្ទទី២០ខែកុម្ភៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី គីម យ៉ូជុង បានចេញសេចក្តីថ្លែងការណ៍មួយតាមរយៈប្រព័ន្ធផ្សព្វផ្សាយរដ្ឋ ដោយនិយាយថា “ភាពញឹកញាប់នៃការប្រើប្រាស់តំបន់ប៉ាស៊ីហ្វិកជាកន្លែងបាញ់របស់យើង គឺអាស្រ័យលើចរិតលក្ខណៈរបស់កងកម្លាំងសហរដ្ឋអាមេរិក”។

នៅព្រឹកថ្ងៃចន្ទ ក្រសួងការពារជាតិជប៉ុន បានជូនដំណឹងដល់ឆ្មាំឆ្នេរសមុទ្រពីការបាញ់មីស៊ីលដោយកូរ៉េខាងជើង។

ប្រភពរដ្ឋាភិបាលនិយាយថា មីស៊ីលទាំងនោះ ហាក់ដូចជាបានធ្លាក់នៅខាងក្រៅតំបន់សេដ្ឋកិច្ចផ្តាច់មុខរបស់ប្រទេសជប៉ុន ខណៈក្រុមមន្ត្រី កំពុងប្រមូលព័ត៌មានអំពីការបាញ់បង្ហោះនេះ។

ដោយឡែក កាលពីរសៀលថ្ងៃសៅរ៍ទី១៨ខែកុម្ភៈ ប្រទេសកូរ៉េខាងជើងបញ្ជាក់ថា ខ្លួនបានបាញ់សាកល្បងមីស៊ីលផ្លោងអន្តរទ្វីប Hwasong-15។

ការបាញ់នោះ បានបង្ហាញដល់សហរដ្ឋអាមេរិក និងកូរ៉េខាងត្បូងថា ខ្លួនមានសមត្ថភាពប្រើមីស៊ីលនុយក្លេអ៊ែរជាយុទ្ធសាស្ត្រ ប្រឆាំងតបត។

ការបាញ់នោះក៏បានកើតឡើងផងដែរ បន្ទាប់ពីកូរ៉េខាងជើង គំរាមប្រឆាំងខ្លាំងក្លាបំផុត មិនធ្លាប់មានសោះពីមុនមក ប្រសិនបើកូរ៉េខាងត្បូង និងសហរដ្ឋអាមេរិក ធ្វើសមយុទ្ធយោធា។

ប្រែសម្រួល៖ Vann Vann

ប្រភព៖ NHK

ចុចអាន៖ កូរ៉េខាងជើង បាញ់មីស៊ីលអន្តរទ្វីប ក្រោយគំរាមកូរ៉េខាងត្បូង និងអាមេរិក