កូរ៉េខាងជើង បាញ់មីស៊ីលអន្តរទ្វីប ក្រោយគំរាមកូរ៉េខាងត្បូង និងអាមេរិក

ប្រទេសកូរ៉េខាងជើងបញ្ជាក់ថា ខ្លួនបានបាញ់សាកល្បងមីស៊ីលផ្លោងអន្តរទ្វីប Hwasong-15 កាលពីរសៀលថ្ងៃសៅរ៍ទី១៨ខែកុម្ភៈ។

កាសែត Rodong Sinmun របស់គណបក្សពលករដែលកំពុងកាន់អំណាច បានចុះផ្សាយនៅថ្ងៃអាទិត្យទី១៩ខែកុម្ភៈថា មីស៊ីលនេះ ត្រូវបានបាញ់ចេញពីអាកាសយានដ្ឋានអន្តរជាតិក្នុងទីក្រុង Sunan ជាយក្រុងព្យុងយ៉ាង។

ការសាកល្បងនេះ បានបង្ហាញដល់សហរដ្ឋអាមេរិក និងកូរ៉េខាងត្បូងថា កូរ៉េខាងជើងមានសមត្ថភាពបាញ់មីស៊ីលនុយក្លេអ៊ែរជាយុទ្ធសាស្ត្រ ប្រឆាំងតបត។

មីស៊ីលផ្លោងអន្តរទ្វីប Hwasong-17 មានរយៈកម្ពស់ ៥៧៦៨.៥ គីឡូម៉ែត្រ ដោយហោះបានចម្ងាយ ៩៨៩ គីឡូម៉ែត្រក្នុងមួយម៉ោង ៦នាទី និង៥៥វិនាទី។

គួរបញ្ជក់ថា ការបាញ់នេះកើតឡើងបន្ទាប់ពីកូរ៉េខាងជើង គំរាមធ្វើការប្រឆាំងខ្លាំងក្លាបំផុត មិនធ្លាប់មានសោះពីមុនមក ប្រសិនបើកូរ៉េខាងត្បូង និងសហរដ្ឋអាមេរិក ធ្វើសមយុទ្ធយោធា។

អ្នកនាំពាក្យក្រសួងការបរទេសកូរ៉េខាងជើង បានចេញការព្រមានកាលពីថ្ងៃសុក្រទី១៧ខែកុម្ភៈ មុនពេលសមយុទ្ធយោធារួមគ្នាប្រចាំឆ្នាំ Freedom Shield រវាងកូរ៉េខាងត្បូង និងសហរដ្ឋអាមេរិក ហើយបានចោទប្រកាន់ទីក្រុងវ៉ាស៊ីនតោន ថាបង្កភាពតានតឹង ដោយការធ្វើសមយុទ្ធមុនៗ។

ទីភ្នាក់ងារព័ត៌មាន Yonhap របស់កូរ៉េខាងត្បូងបានរាយការណ៍ដោយដកស្រង់សម្តីអ្នកនាំពាក្យថា “ក្នុងករណីដែលសហរដ្ឋអាមេរិក និងកូរ៉េខាងត្បូងអនុវត្តផែនការធ្វើសមយុទ្ធយោធាដែលបានប្រកាសរួចហើយនោះ ពួកគេនឹងត្រូវប្រឈមមុខនឹងការប្រឆាំងដ៏ខ្លាំងក្លាដែលមិនធ្លាប់មានពីមុនមកសោះ”៕

ប្រែសម្រួល៖ Vann Vann

ប្រភព៖ NHK

ចុចអាន៖ កូរ៉េ​ខាងជើង​ គំរាមធ្វើ​សកម្មភាព​យោធាតបត បើ​កូរ៉េខាងត្បូង ​និង​អាមេរិក​ ចាប់ផ្តើមសមយុទ្ធ