ដំណើរការឈានទៅបង្កើតរដ្ឋាភិបាលចម្រុះថៃ កំពុងជួបឧបសគ្គ

កាលពីថ្ងៃពុធទី១៧ខែឧសភា ក្រុមគណបក្សប្រឆាំងថៃ បានជួបប្រជុំគ្នាសម្រាប់កិច្ចពិភាក្សាបង្កើតរដ្ឋាភិបាលចម្រុះ បន្ទាប់ពីផ្តួលគូប្រជែងក្នុងការបោះឆ្នោត ប៉ុន្តែសមាជិកព្រឹទ្ធសភាដែលត្រូវបានតែងតាំងដោយយោធាមួយចំនួន បានព្រមានថា ពួកគេនឹងព្យាយាមបញ្ឈប់មេដឹកនាំគណបក្សដែលបានទទួលជ័យជម្នះ ពីការក្លាយជានាយករដ្ឋមន្ត្រី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គណបក្សចលនាឆ្ពោះទៅមុខ (MFP) បានទទួលជ័យជម្នះយ៉ាងធំធេង ក្នុងការបោះឆ្នោតកាលពីថ្ងៃអាទិត្យ ទី១៤ ខែឧសភា បន្ទាប់ពីប្រជាជនថៃ នាំគ្នាប្រឆាំងនឹងការដឹកនាំដោយយោធាអស់រយៈពេលជិតមួយទសវត្សរ៍។

មេដឹកនាំ MFP លោក Pita Limjaroenrat បានជួបមន្ត្រីជាន់ខ្ពស់មកពីគណបក្សប្រឆាំងចំនួន ៥ ផ្សេងទៀតនៅភោជនីយដ្ឋានមួយក្នុងទីក្រុងបាងកក សម្រាប់កិច្ចពិភាក្សាបិទទ្វារ។

គណបក្ស MFP ដណ្តើមបាន ១៥២ អាសនៈ ចំណែកគណបក្សភឿថៃ ជាប់លេខ ២ បាន ១៤១ អាសនៈ ។ ដូចនេះ ការចងសម្ព័ន្ធជាមួយគណបក្សផ្សេងទៀត នឹងផ្តល់ឲ្យពួកគេនូវអាសនៈជាង ៣០០ ក្នុងចំណោម ៥០០ អាសនៈនៃសភាជាន់ទាប ។

ប៉ុន្តែដើម្បីធានាបាននូវតំណែងជានាយករដ្ឋមន្ត្រី រដ្ឋាភិបាលចម្រុះនេះ ត្រូវការសំឡេងភាគច្រើននៅក្នុងសភាទាំងពីរ រួមទាំងព្រឹទ្ធសភា ដែលមានសមាជិកតែងតាំងដោយយោធាចំនួន ២៥០ រូបផងដែរ។

MFP និងសម្ព័ន្ធមិត្តរបស់ខ្លួន ត្រូវការសំឡេងគាំទ្រពីសភាជាន់ទាបចំនួន ៣៧៦ ដើម្បីធានាថា សមាជិកព្រឹទ្ធសភាមិនអាចរារាំងលោក Pita ពីការក្លាយជានាយករដ្ឋមន្ត្រីបាននោះទេ។

ទោះបីជាយ៉ាងណាក៏ដោយ សមាជិកព្រឹទ្ធសភាមួយចំនួន បានបង្ហាញការប្រឆាំងលោក Pita រួចទៅហើយ ដោយអ្នកខ្លះខឹងសម្បាចំពោះផែនការធ្វើវិសោធនកម្មច្បាប់ប្រមាថព្រះមហាក្សត្រដ៏តឹងតែងរបស់ប្រទេស៕

ប្រែសម្រួល៖ Vann Vann

ប្រភព៖ CNA

ចុចអាន៖ មេទ័ពថៃ ៥រូបនិងអគ្គស្នងការនគរបាលជាតិ នឹងមិនបោះឆ្នោត ជ្រើសរើសនាយករដ្ឋមន្ត្រីថ្មីទេ