អាមេរិក ព្រមានថា សង្គ្រាមតៃវ៉ាន់ នឹងក្លាយជា មហន្តរាយ

រដ្ឋមន្ត្រីការពារជាតិអាមេរិក លោក Lloyd Austin បាននិយាយថា ជម្លោះប្រដាប់អាវុធលើបញ្ហាកោះតៃវ៉ាន់ នឹងក្លាយជាមហន្តរាយ។ ស្របពេលជាមួយគ្នានោះ លោកជំរុញឲ្យប្រទេសចិន រក្សាស្ថានភាពនាពេលបច្ចុប្បន្នចំពោះកោះនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើសពីនេះ លោក Lloyd Austin ក៏បានប្តេជ្ញាបង្កើនវត្តមានយោធាអាមេរិក នៅក្នុងតំបន់ផងដែរ។

ថ្លែងអំឡុងសន្និសីទការពារជាតិ Shangri-La Dialogue ក្នុងប្រទេសសិង្ហបុរី នៅថ្ងៃសៅរ៍ទី៣ខែមិថុនា លោក Austin បានគូសបញ្ជាក់ អំពីចក្ខុវិស័យរបស់ទីក្រុងវ៉ាស៊ីនតោន ចំពោះតំបន់ឥណ្ឌូប៉ាស៊ីហ្វិកដោយសេរី និងបើកចំហ។ លោកអះអាងថា ប្រធានាធិបតី ចូ បៃដិន ចង់បញ្ចៀសជម្លោះជាមួយទីក្រុងប៉េកាំង ប៉ុន្តែលោកនឹងប្រឆាំងដាច់ខាត រាល់កិច្ចខិតខំប្រឹងប្រែងដើម្បីផ្លាស់ប្តូរស្ថានភាពបច្ចុប្បន្ន។

លោក Austin និយាយថា “កុំធ្វើខុស! ជម្លោះនៅច្រកសមុទ្រតៃវ៉ាន់ នឹងមានការបំផ្លិចបំផ្លាញ។ ដូច្នេះ​យើង​ប្ដេជ្ញា​រក្សា​សន្តិភាព និង​ស្ថិរភាព។ ​សហរដ្ឋអាមេរិក​មិន​ស្វែងរក​សង្គ្រាមត្រជាក់​ថ្មី​ទេ​”។

យ៉ាងណាក្តី ថ្វីបើលោកទទូចថា អាស៊ីនឹងមិនត្រូវបំបែកទៅជាប្លុកអរិភាពក៏ដោយ ប៉ុន្តែរដ្ឋមន្ត្រីការពារជាតិរូបនេះ បានបន្តរៀបរាប់អំពីផែនការ ក្នុងការបង្កើនប្រតិបត្តិការយោធាអាមេរិកនៅក្នុងតំបន់។

លោក Austin បានបន្តប្រកាសថា ទីក្រុងវ៉ាស៊ីនតោន នឹងបង្កើនកិច្ចសម្របសម្រួល និងការហ្វឹកហ្វឺនយោធារួមគ្នាជាមួយដៃគូក្នុងតំបន់ជាច្រើន ចាប់ពីសមុទ្រចិនខាងកើត ដល់សមុទ្រចិនខាងត្បូង និងរហូតដល់មហាសមុទ្រឥណ្ឌា រួមជាមួយជប៉ុន កូរ៉េខាងត្បូង ហ្វីលីពីន អូស្ត្រាលី និងប្រទេសផ្សេងទៀត។

គួរបញ្ជាក់ថា រដ្ឋបាលលោក បៃដិន បានប្រកាន់ជំហរអរិភាពកាន់តែខ្លាំងឡើងចំពោះទីក្រុងប៉េកាំង ដោយចាត់ទុកប្រទេសចិន ជាគូប្រជែងកំពូលរបស់អាមេរិក ហើយពង្រីកសកម្មភាពយោធារបស់ទីក្រុងវ៉ាស៊ីនតោននៅក្នុងតំបន់។

បន្ថែមពីលើកិច្ចសហប្រតិបត្តិការថ្មីជាមួយសម្ព័ន្ធមិត្តអាស៊ី លោក ចូ បៃដិន ក៏បានបញ្ជូននាវាចម្បាំងអាមេរិក ឆ្លងកាត់ច្រកសមុទ្រតៃវ៉ាន់ផងដែរ ដោយមិនអើពើនឹងការព្រមានជាច្រើនលើកច្រើនសាពីមន្ត្រីចិនឡើយ៕

ប្រែសម្រួល៖ Vann Vann

ប្រភព៖ RT

ចុចអាន៖ ចិន ត្រៀមយោធារួចរាល់ហើយ ដើម្បីកម្ទេចចលនាផ្តាច់ខ្លួននៅ តៃវ៉ាន់