ដូណាល់ ត្រាំ ប្រៀបធៀបខ្លួនឯងទៅនឹងគំនូរ Mona Lisa

អតីតប្រធានាធិបតីអាមេរិក លោក ដូណាល់ ត្រាំ (Donald Trump) បានប្រៀបធៀបខ្លួនឯងទៅនឹងគំនូរ Mona Lisa នៅក្នុងបទសម្ភាសន៍ទូរទស្សន៍ថ្មីមួយ ដើម្បីទាក់ទាញសំឡេងគាំទ្រ នៅក្នុងការបោះឆ្នោតជ្រើសរើសប្រធានាធិបតីនា ២ឆ្នាំខាងមុខ។

មហាសេដ្ឋីវ័យ ៧៦ឆ្នាំដែលធ្លាប់ធ្វើជាប្រធានាធិបតីទី ៤៥របស់សហរដ្ឋអាមេរិក ចន្លោះឆ្នាំ២០១៧-២០២១ បានប្រដូចការអំពាវនាវរបស់ខ្លួន ទៅនឹងស្នាដៃរបស់វិចិត្រករលោក Leonardo da Vinci ដែលព្យួរក្នុងសារមន្ទីរ Louvre នៅទីក្រុងប៉ារីស។

នៅក្នុងបទសម្ភាសន៍ លោក ត្រាំ និយាយថា មនុស្សជាច្រើនដែលទៅទស្សនាគំនូរ Mona Lisa ពួកគេបានស្រឡាញ់គំនូរនេះ ហើយមិនថាពួកគេទស្សនាប៉ុន្មានដងនោះទេ ពួកគេនៅតែស្រឡាញ់ និងចង់ទៅទស្សនាទៀត។ រាល់ពេលដែលទស្សនិកជនទៅទស្សនា ទោះបីរាប់រយដងក៏ដោយ ពួកគេនៅតែទទួលបានចំណីអារម្មណ៍ថ្មីប្លែកជានិច្ច។ មិនខុសពីមនុស្សដែលចូលចិត្តតន្ត្រីរ៉ុកនោះទេ ទោះបីពួកគេស្តាប់បទរ៉ុកប៉ុន្មានដងប៉ុន្មានលើក ពួកគេនៅតែចង់ស្ដាប់មិនចេះជិនណាយ។

អ្នកនយោបាយរូបនេះ បានប្រៀបធៀបរឿងខាងលើទៅនឹងខ្លួនឯងថា មិនខុសពីលោកនោះទេ​ ទោះបីជាលោកធ្លាប់កាន់តំណែងជាប្រធានាធិបតិអាមេរិកម្ដងរួចក្ដី ហើយទោះបីលោកមានវ័យជ្រេបន្តិចក៏ដោយ លោកនៅតែមានសមត្ថភាពអាចក្លាយជាកំពូលមេដឹកនាំដ៏ល្អរបស់អាមេរិក។ លោកថ្លែងការប្រៀបធៀបបែបនេះ ក្នុងបំណងអូសទាញចំណាប់អារម្មណ៍ហ្វូងមនុស្សឱ្យផ្ដល់ការគាំទ្រដល់លោកនៅអំឡុងបោះឆ្នោត នាចុងឆ្នាំ២០២៤ ៕

ប្រែសមម្រួល៖ សន្យា

ប្រភព៖ Asiaone

ចុចអាន៖ អាមេរិក ព្រមានថា សង្គ្រាមតៃវ៉ាន់ នឹងក្លាយជា មហន្តរាយ