ព័ត៌មានអន្ដរជាតិ

ក្រុមហ៊ុនស្រាបៀរ អង់គ្លេស ចំនួន ៤៥ ប្រកាសក្ស័យធនក្នុងរយៈពេល ១២ ខែ

បានផុស

៩ ខែ មុន

នៅ

ថ្ងៃចន្ទ ១២ មិថុនា ២០២៣

ដោយ

ក្រុមហ៊ុនផលិតស្រាបៀររបស់ចក្រភពអង់គ្លេសបានទទួលរងផលប៉ះពាល់ជាខ្លាំងកាលពីឆ្នាំមុន ដោយសារតែវិបត្តិតម្លៃរស់នៅបានបំផ្លាញវិស័យបដិសណ្ឋារកិច្ចរបស់ប្រទេសនេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការវិភាគរបស់ក្រុមហ៊ុន Mazars បានឲ្យដឹងថា ក្នុងរយៈពេល ១២ ខែមកនេះ មានក្រុមហ៊ុនស្រាបៀរអង់គ្លេសចំនួន ៤៥ បានប្រកាសក្ស័យធន ជាពិសេសសិប្បកម្មផលិតស្រាតូចៗ គឺមានហានិភ័យខ្ពស់បំផុត ព្រោះប្រជាពលរដ្ឋបានងាកទៅទិញផលិតផលដែលមានតម្លៃទាបជាងនេះទៅទៀត ដោយសារតែវិបត្តិនៃតម្លៃរស់នៅឡើងខ្ពស់ ។

លោក Paul Maloney នាយករងនៅក្រុហ៊ុន Mazars បាននិយាយថា មួយរយៈធំមកនេះ រោងចក្រផលិតស្រាបៀរបានជួបការលំបាកខ្លាំងមែនទែន ដោយសារតែតម្លៃផលិតផលមានការកើនឡើង បូករួមនឹងបញ្ហាប្រឈមផ្នែកហិរញ្ញវត្ថុរបស់អតិថិជន ស្របពេលទីផ្សារសិប្បកម្មស្រាបៀរ មានចំនួនច្រើនមិនធ្លាប់ក្នុងរយៈពេលមួយទសវត្សរ៍ចុងក្រោយនេះ ។

ក្រៅពីក្រុមហ៊ុនផលិតស្រាបៀរ ហាងស្រា និងបារនៅទូទាំងអង់គ្លេសជាង ៥០០ ក៏បានបិទទ្វាផងដែរកាលពីឆ្នាំមុន ។ វិស័យនេះកំពុងជួបការលំបាកខ្លាំង ដោយសារតែកត្តាធំៗចំនួន ២ គឺតម្លៃថាមពលឡើងថ្លៃ និងអតិផរណាឡើងខ្ពស់ជាដើម ។

គួរបញ្ជាក់ថា កាលពីខែកញ្ញា ឆ្នាំ២០២២ រដ្ឋាភិបាលអង់គ្លេសបានបញ្ចេញលុយជាង ២២ ពាន់លានដុល្លារដល់អាជីវកម្មដើម្បីជួយដល់ការចំណាយលើថាមពល ប៉ុន្តែគម្រោងនេះបានបញ្ចប់នៅក្នុងខែមីនា ឆ្នាំ២០២៣ ខណៈពេលដែលមូលនិធិត្រូវបានកាត់បន្ថយមកត្រឹមតែ ៦.៨ ពាន់លានដុល្លារប៉ុណ្ណោះ ក្រោមកញ្ចប់ជំនួយថ្មី ៕