IMF ថា ជនអន្តោប្រវេសន៍អាចជួយកាត់បន្ថយអតិផរណារបស់ អង់គ្លេស

បើយោងតាមអនុប្រធានមូលនិធិរូបិយវត្ថុអន្តរជាតិ (IMF) បានឲ្យដឹងថា ជន​អន្តោប្រវេសន៍អាចជួយកាត់បន្ថយអតិផរណានៅក្នុងចក្រភពអង់គ្លេស តាមរយៈការដោះស្រាយគម្លាតនៅក្នុងទីផ្សារការងារកម្លាំងពលកម្ម​ ។

នៅក្នុងបទសម្ភាសន៍ជាមួយសារព័ត៌មាន BBC លោកស្រី Gita Gopinath បាននិយាយថា ដោយសារអត្រាអតិផរណាខ្ពស់នៅក្នុងចក្រភពអង់គ្លេស វត្តមានរបស់ពលករបរទេស​ អាចជាអត្ថប្រយោជន៍មួយជួយដោះស្រាយបញ្ហានេះបាន ។

បើយោងតាមការិយា​ល័យ​ស្ថិតិជាតិ​អង់គ្លេសបានឲ្យដឹងថា ការធ្វើចំណាកស្រុកទៅកាន់ចក្រភពអង់គ្លេស​បានកើនឡើងដល់ ៦០៦,០០០ នាក់នៅក្នុងខែធ្នូ ឆ្នាំ២០២២ ដែលលើសពីកំណត់ត្រាមុនចំនួន ៥០៤,០០០ នាក់កាលពី ៦ ខែមុន ។

ដោយឡែក​ថ្មីៗនេះ រដ្ឋាភិបាលចក្រភពអង់គ្លេសបានខិតខំកាត់បន្ថយតួលេខជនអន្តោប្រវេសន៍ បើទោះបីជាអង្គការសិទ្ធិមនុស្សអន្តរជាតិ បានរិះគន់ជាញឹកញាប់អំពី​គោលនយោបាយប្រឆាំងនឹងជនចំណាកស្រុកក៏ដោយ ។

អតិផរណាអ្នកប្រើប្រាស់នៅចក្រភពអង់គ្លេស បានធ្លាក់ចុះដល់ ៨.៧ ភាគរយ បើប្រៀបធៀបនឹងខែមេសា ដែលធ្លាក់ចុះពី ១០.១ ភាគរយក្នុងខែមីនា ប៉ុន្តែលើសពីការរំពឹងទុក ៨.២ ភាគរយ ។

ទន្ទឹមនោះ ការិយាល័យស្ថិតិជាតិអង់គ្លេស ONS ក៏​បាន​បង្ហាញ​ផង​ដែរ​ថា តម្លៃ​ម្ហូប​អាហារ​បាន​បន្ត​កើន​ឡើង​យ៉ាង​ឆាប់​រហ័ស ដោយ​ឈាន​ដល់​អត្រា​ខ្ពស់​បំផុត​ក្នុង​រយៈ​ពេល​ជិត ៤៥ ឆ្នាំ​មក​នេះ ។​ ចំណែក អត្រាកំណើននៃតម្លៃគ្រឿងទេស បានធ្លាក់ចុះ បើធៀបនឹងខែមេសាក្នុងឆ្នាំនេះ បើទោះបីជាឈានដល់កម្រិតកំណត់ត្រា ១៩.១ ភាគរយក៏ដោយ ៕

ប្រែសម្រួល៖ នាង រតនៈ

ប្រភព៖ Anadolu