ថៃបង្ក្រាបថ្នាំញៀនប្រភេទម៉ាទឹកកកបានជាង​១តោន

គ្រឿងញៀនប្រភេទម៉ាទឹកកកប្រមាណជាង១តោន ត្រូវបានកម្លាំងនាយកដ្ឋានប្រឆាំងបទល្មើសគ្រឿងញៀន ចុះប្រតិបត្តិការបង្ក្រាបបាន រួមជាមួយមុខសញ្ញាចំនួន៧នាក់ផងដែរ ខណ:ដែលថ្នាំញៀនទាំងនេះត្រៀមបញ្ជូនទៅភាគខាងត្បូងប្រទេសថៃ ដើម្បីលក់ទៅប្រទេសទី៣ នេះបើយោងតាមការផ្សាយរបស់គេហទំព័រ Thai PBS ។

លោកឧត្តមសេនីយ៍ វិឆ័យ ឆៃមង្គល លេខាធិការដ្ឋាន នៃនាយកដ្ឋានប្រឆាំងគ្រឿងញៀន បានលើកឡើងថា កាលពីប៉ុន្មានថ្ងៃមុននេះ កម្លាំងសមត្ថកិច្ចបានឃាត់មុខសញ្ញាមួយដោយបានទាំងថ្នាំញៀនប្រភេទម៉ាទឹកកកចំនួន ១.២០០ kg នៅភាគខាងជើងនៃប្រទេសថៃ ដែលថ្នាំទាំងនេះត្រៀមបញ្ជូនទៅកាន់ភាគខាងត្បូង និងបន្តទៅកាន់ប្រទេសម៉ាឡេ។

លោកបានបន្តថា ក្រោយពីទទួលបាននូវចម្លើយសារភាពរួចមក កម្លាំងបានបើកការស្រាវជ្រាវរហូតទទួលបានច្បាស់ការ ក៏បានចេញប្រតិបត្តិការកាលពីម្សិលមិញនេះ ទៅកាន់ផ្ទះជួលមួយកន្លែង ស្ថិតក្នុងឃុំខ្លងតាខុត ស្រុកពោធិ៍ថារាម ខេត្តរ៉ាតបុរី និងបានធ្វើការឃាត់ខ្លួនមុខសញ្ញាដែលនៅក្នុងផ្ទះនោះបានចំនួន៧នាក់ ។

នៅក្នុងកិច្ខប្រតិបត្តិការនេះ សមត្ថកិច្ចបានរកឃើញថ្នាំញៀនប្រភេទម៉ាទឹកកក ដែលគេច្រកក្នុងការ៉ុងចំនួន២៤ការ៉ុង ដែលមានទម្ងន់សរុប ៩៦០ kg ដែលថ្នាំញៀនទាំងនេះត្រៀមបញ្ជូនទៅកាន់ប្រទេសទី៣ ដូចគ្នា តាមរយ:ការឆ្លងកាត់ទៅភាគខាងត្បូងនៃប្រទេសថៃ ។

លោកឧត្តមសេនីយ៍បានសង្កត់ធ្ងន់ថា ថ្នាំទាំងអស់នេះ បើគេបញ្ជូនចេញទៅក្រៅប្រទេសបាន គឺគេទទួលបានតម្លៃគុណនឹង១០ បើប្រៀបធៀបនឹងតម្លៃលក់ក្នុងស្រុក ប៉ុន្តែសម្រាប់ថ្នាំញៀនច្រើនៗបែបនេះ ភាគច្រើនគឺគេមិនសូវបញ្ចេញលក់ក្នុងស្រុកទេ គឺគេត្រូវនាំចេញដោយយកប្រទេសថៃជាទីតាំងស្តុក ឬជាកន្លែងឆ្លងកាត់តែប៉ុណ្ណោះ ៕

អត្ថបទ៖ សោ និយមរ័ត្ន