កប៉ាល់ទេសចរណ៍ធំបំផុតលើលោក បង្ហាញខ្លួនជាលើកដំបូង

កប៉ាល់ទេសចរណ៍ដ៏ធំបំផុតរបស់ក្រុមហ៊ុន Royal Caribbean ត្រូវបានគេឃើញធ្វើដំណើរជាលើកដំបូង ខណៈវាឆ្លងកាត់សមុទ្រ មុនពេលបើកដំណើរការក្នុងឆ្នាំ ២០២៤ ។

ទោះយ៉ាងណា កប៉ាល់ទេសចរណ៍ដែលមានឈ្មោះថា Icon of the Seas ក៏បានត្រឡប់ទៅកន្លែងផលិតកប៉ាល់ Meyer Turku ដែលមានទីតាំងក្នុងទីក្រុង Turku របស់ប្រទេសហ្វាំងឡង់វិញផងដែរ បន្ទាប់ពីធ្វើដំណើររាប់រយគីឡូម៉ែត្រនៅលើសមុទ្រ ។

កប៉ាល់ខាងលើមានប្រវែងដល់ទៅ ៣៦៥ ម៉ែត្រ និងមានទម្ងន់សរុប ២៥០,៨០០ តោន ដែលអាចផ្ទុកមនុស្សបាន ៧,៦០០ នាក់ ។ ទន្ទឹមនោះ ក្រុមហ៊ុន Royal Caribbean ទម្លាយថា ការសាកល្បងលើសមុទ្រមានការចូលរួមពីអ្នកឯកទេសជាង ២,០០០ នាក់ ហើយគេបានប្រើទូកទាញទម្ងន់ពី ៣៧ ទៅ ៦៧ តោនចំនួន ៤ គ្រឿង និងចំណាយពេលជាង ៣៥០ ម៉ោង ។

បច្ចុប្បន្ន Icon of the Seas កំពុងទទួលបានងារជាកប៉ាល់ទេសចរណ៍ដ៏ធំបំផុតរបស់ពិភពលោក បន្ទាប់ពីកប៉ាល់របស់ក្រុមហ៊ុន Royal Caribbean មួយទៀតឈ្មោះ Wonder of the Seas មានប្រវែងត្រឹមតែ ៣៦២ ម៉ែត្រ និងទម្ងន់សរុប ២៣៤,៨៥៧ តោនប៉ុណ្ណោះ ។

គួរបញ្ជាក់ថា កប៉ាល់ Icon of the Seas នឹងបង្ហាញខ្លួនជាផ្លូវការដំបូងនៅទីក្រុង Miami ហើយបើកដំណើរទេសចរណ៍រយៈពេល ៧ យប់ក្នុងឆ្នាំ ២០២៤ ខណៈអ្នកអាចរកទិញសំបុត្របាននៅក្នុងគេហទំព័ររបស់ Royal Caribbean ផ្ទាល់តែម្ដង ៕

ប្រែសម្រួល៖ វារី

ប្រភព៖ dailymail

ចុចអាន៖ ស្ថានីយប្រេងឥន្ធនៈធំបំផុតលើលោក បើកជាផ្លូវការហើយ