កូរ៉េខាងជើង យល់ព្រមឆ្លើយតប អំពីទាហានអាមេរិក

មន្ទីរបញ្ចកោណបានឲ្យដឹងនៅថ្ងៃពុធទី២ខែសីហាថា កូរ៉េខាងជើង យល់ព្រមផ្តល់ការឆ្លើយតបយ៉ាងខ្លីទៅកាន់ទីបញ្ជាការអង្គការសហប្រជាជាតិ អំពីទាហានអាមេរិកម្នាក់ ដែលបានឆ្លងកាត់ព្រំដែនមានការយាមកាមយ៉ាងខ្លាំងជាប់ប្រទេសកូរ៉េខាងត្បូង កាលពីថ្ងៃទី១៨ខែកក្កដា ហើយភ្លាមៗនោះ គាត់ត្រូវបានចាប់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាយ៉ាងណាក៏ដោយ អ្នកនាំពាក្យមន្ទីរបញ្ចកោណ លោក Patrick Ryder និយាយថា កូរ៉េខាងជើងពិតជាបានទទួលសំណើរបស់ទីបញ្ជាការអង្គការសហប្រជាជាតិ សម្រាប់ព័ត៌មានអំពីទាហានអាមេរិកឈ្មោះ Travis King មែន ប៉ុន្តែគាត់មិនបានផ្តល់ព័ត៌មានលម្អិតទេ។

លោក Ryder បានប្រាប់សន្និសីទកាសែតមួយថា “ខ្ញុំអាចបញ្ជាក់បាន កូរ៉េខាងជើង ពិតជាឆ្លើយតបទៅនឹងបញ្ជាការអង្គការសហប្រជាជាតិមែន ប៉ុន្តែខ្ញុំមិនទទួលបានព័ត៌មានលម្អិតណាស់ណាទេនាពេលនេះ”។

គួរបញ្ជាក់ជាថ្មី King បានរត់ចូលប្រទេសកូរ៉េខាងជើងនៅថ្ងៃទី១៨ខែកក្កដា ខណៈកំពុងធ្វើដំណើរទៅកាន់តំបន់គ្មានយោធានៅតាមព្រំដែន នាំឲ្យសហរដ្ឋអាមេរិក ត្រូវជាប់ក្នុងស្ថានភាពគំរាមកំហែងផ្នែកការទូតថ្មីទៀត ជាមួយកូរ៉េខាងជើងដែលមានអាវុធនុយក្លេអ៊ែរ។

ដំបូងឡើយ King ត្រូវត្រលប់ទៅសហរដ្ឋអាមេរិកវិញ ដើម្បីប្រឈមមុខនឹងការដាក់ពិន័យ បន្ទាប់ពីជាប់ពន្ធនាគារនៅប្រទេសកូរ៉េខាងត្បូង ប៉ុន្តែផ្ទុយទៅវិញ គាត់បានចាកចេញពីព្រលានយន្តហោះ ទៅចូលរួមក្នុងដំណើរទេសចរណ៍ព្រំដែន ហើយក៏រត់គេចខ្លួនតែម្តង៕

ប្រែសម្រួល៖ Vann Vann

ប្រភព៖ CNA

ចុចអាន៖ អាមេរិក បារម្ភខ្លាំងថា កូរ៉េខាងជើង ធ្វើបាបទាហានរបស់ខ្លួន