កូរ៉េខាងជើង ព្រមានជាថ្មីថា ការបញ្ជូន F-16 ទៅឲ្យអ៊ុយក្រែន នឹងនាំពិភពលោក ខិតកាន់តែជិតសង្គ្រាមនុយក្លេអ៊ែរ

កូរ៉េខាងជើង បានគូសបញ្ជាក់នៅថ្ងៃចន្ទទី២៨ខែសីហាថា ផែនការបញ្ជូនយន្តហោះចម្បាំង F-16 ដែលផលិតដោយសហរដ្ឋអាមេរិក ទៅកាន់ប្រទេសអ៊ុយក្រែន នឹងនាំពិភពលោកឲ្យខិតកាន់តែជិតសង្គ្រាមនុយក្លេអ៊ែររវាងទីក្រុងវ៉ាស៊ីនតោន និងមូស្គូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វិទ្យាស្ថានសិក្សាអន្តរជាតិរបស់ទីក្រុងព្យុងយ៉ាង បានព្រមាននៅក្នុងសេចក្តីថ្លែងការណ៍មួយ ដែលផ្សាយដោយទីភ្នាក់ងារសារព័ត៌មានរដ្ឋកូរ៉េ (KCNA) ថា “ការសម្រេចចិត្តរបស់ពួកគេ ក្នុងការផ្គត់ផ្គង់សូម្បីតែយុទ្ធជន គឺជាទង្វើប្រឆាំងនឹងសន្តិភាព ញុះញង់ឲ្យមានសង្រ្គាមអូសបន្លាយ ព្រមទាំងបំផ្លាញសន្តិភាព និងស្ថិរភាពក្នុងតំបន់ទាំងស្រុងទៀតផង”។

លើសពីនេះ វិទ្យាស្ថានខាងលើបានបន្តរិះគន់ចេតនាដ៏អាក្រក់របស់ទីក្រុងវ៉ាស៊ីនតោន ដែលប៉ុនប៉ងធ្វើឲ្យរុស្ស៊ីបរាជ័យ ទោះក្នុងតម្លៃណាក៏ដោយ។

តាមសេចក្តីថ្លែងការណ៍នោះ, “ការពិតបានបង្ហាញឲ្យឃើញយ៉ាងច្បាស់ថា សហរដ្ឋអាមេរិកគឺជាឧក្រិដ្ឋជនដែលរារាំងការដោះស្រាយជម្លោះដោយសន្តិវិធី និងរុញច្រានអឺរ៉ុបទាំងមូល ឲ្យធ្លាក់ចូលទៅក្នុងភាពផុយស្រួយនៃសង្គ្រាមនុយក្លេអ៊ែរដ៏អាក្រក់ ដោយការញុះញង់អ្នកដើរតាមរបស់ខ្លួនឲ្យផ្តល់អាវុធសាហាវៗច្រើនប្រភេទ ទៅឲ្យអ៊ុយក្រែន”។

កាលពីសប្តាហ៍មុន ហូឡង់ ដាណឺម៉ាក និងន័រវែស បានយល់ព្រមផ្តល់យន្តហោះចម្បាំង F-16 ដល់អ៊ុយក្រែន ខណៈទីក្រុងកៀវសង្ឃឹមថា យន្តហោះប្រភេទនេះ នឹងជួយខ្លួនក្នុងការវាយបកទៅរុស្ស៊ីវិញ។

ថ្វីបើអាមេរិកបដិសេធបរិច្ចាគយន្តហោះរបស់ខ្លួនដោយផ្ទាល់ក៏ដោយ ប៉ុន្តែមន្ទីរបញ្ចកោណនិយាយថា កងទ័ពអ៊ុយក្រែន នឹងចាប់ផ្តើមហ្វឹកហាត់ដើម្បីប្រតិបត្តិការយន្តហោះ F-16 នៅរដ្ឋ Arizona នាខែតុលាខាងមុខ។

យ៉ាងណាក្តី​ រុស្ស៊ីបានសង្កត់ធ្ងន់ម្តងហើយម្តងទៀតថា ការប្រគល់សព្វាវុធរបស់លោកខាងលិចទៅឲ្យអ៊ុយក្រែន កំពុងអូសទាញសមាជិកអង្គការណាតូ ឲ្យខិតកាន់តែជិតនឹងការប្រឈមមុខដាក់គ្នាជាមួយទីក្រុងមូស្គូ៕

ប្រែសម្រួល៖ Vann Vann

ប្រភព៖ RT

ចុចអាន៖ គូប្រជែងលោក បៃដិន ថា មនុស្សជាតិនឹងជួបមហន្តរាយ ពេល F-16 ទៅដល់ដៃ អ៊ុយក្រែន