មេប៉ូលិសអ៊ីស្រាអែល គំរាមបញ្ជូនបាតុករប្រឆាំងសង្គ្រាម ទៅ ហ្គាហ្សា

មេប៉ូលិសអ៊ីស្រាអែល លោក Kobi Shabtai និយាយថា នឹងគ្មានការអត់ឱនឡើយ ចំពោះបាតុកម្មគាំទ្រហ្គាហ្សា ក្នុងប្រទេសអ៊ីស្រាអែល ដោយលោកគំរាមបញ្ជូនក្រុមបាតុករប្រឆាំងសង្គ្រាម ទៅកាន់ទឹកដីរបស់ប៉ាឡេស្ទីន ដែលអ៊ីស្រាអែលបានទម្លាក់គ្រាប់បែកលើជារៀងរាល់ថ្ងៃ អស់រយៈពេលជិតពីរសប្តាហ៍មកហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអត្ថាធិប្បាយរបស់ Shabtai ធ្វើឡើងនៅក្នុងវីដេអូដែលបង្ហោះលើឆានែល TikTok របស់ប៉ូលិសអ៊ីស្រាអែលផ្ទាល់ កាលពីថ្ងៃអង្គារទី១៧ខែតុលា ហើយប្រព័ន្ធ​ផ្សព្វផ្សាយ​អ៊ីស្រាអែល ក៏​បាន​យក​វា​មក​ផ្សាយ​នៅ​ថ្ងៃ​ពុធ ​បន្ទាប់​ពី​ប៉ូលិស​​បំបែក​ការ​ជួប​ជុំ​គាំទ្រហ្គាហ្សា​ក្នុង​ទីក្រុង Haifa ដោយ​ចាប់​ខ្លួន​មនុស្សចំនួន៦នាក់​។

លោក Shabtai និយាយថា “អ្នកណាដែលចង់ក្លាយជាពលរដ្ឋអ៊ីស្រាអែល សូមស្វាគមន៍។ អ្នក​ណា​ដែល​ចង់​កំណត់​អត្តសញ្ញាណ​ជាមួយ​ហ្គាហ្សា​ សូមស្វាគមន៍។ ខ្ញុំ​នឹង​ដាក់ពួកគេទាំងឡានៗ ទៅទីនោះ”។

ក្នុង​វីដេអូ​ដដែល, លោក Shabtai ក៏​​និយាយដែរ​ថា ​“នឹង​គ្មាន​ការ​អត់ឱនឡើយ ​ចំពោះ​ករណី​ញុះញង់​ណា​មួយ ហើយនឹង​មិន​មាន​ការ​អនុញ្ញាត​សម្រាប់​ការ​តវ៉ា​ឡើយ។ អ៊ីស្រាអែល​កំពុង​មាន​​សង្រ្គាម យើង​មិន​ស្ថិត​ក្នុង​ស្ថានភាព​ដែល​​អនុញ្ញាត​ឲ្យ​មនុស្ស​គ្រប់​ប្រភេទ ​មកសាក​ល្បង​យើង​ទេ”។

ទន្ទឹមនោះ អ្នកនាំពាក្យប៉ូលិសអ៊ីស្រាអែល លោក Eli Levy បានប្រាប់វិទ្យុកងទ័ព កាលពីថ្ងៃពុធថា តាំងពីការចាប់ផ្តើមសង្រ្គាមហ្គាហ្សា កាលពីថ្ងៃទី៧ខែតុលាមក មនុស្សចំនួន៦៣នាក់ក្នុងប្រទេសអ៊ីស្រាអែល ត្រូវបានចាប់ខ្លួនពីបទសង្ស័យថា គាំទ្រឬញុះញង់អំពើភេរវកម្ម៕

ប្រែសម្រួល៖ Vann Vann

ប្រភព៖ Aljazeera

ចុចអាន៖ ការវាយប្រហារអាកាសរបស់អ៊ីស្រាអែល សម្លាប់ពលរដ្ឋប៉ាឡេស្ទីន ជាង៤០នាក់ទៀត