អាល្លឺម៉ង់ បញ្ជូនរថក្រោះខ្លារខិន ២៥គ្រឿងទៀតទៅឲ្យអ៊ុយក្រែន

រដ្ឋាភិបាលសហព័ន្ធអាល្លឺម៉ង់ បានបញ្ជាក់កាលពីថ្ងៃពុធទី២ខែវិច្ឆិកាថា ទីក្រុងបែរឡាំង បានបញ្ជូនរថក្រោះខ្លារខិន ចំនួន២៥គ្រឿងបន្ថែមទៀតទៅឲ្យអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីប្រកាសព័ត៌មានរបស់រដ្ឋាភិបាលទីក្រុងបែរឡាំង, ការដឹកជញ្ជូនចុងក្រោយនេះ នាំឲ្យចំនួនសរុបនៃរថក្រោះខ្លារខិនដែលអាល្លឺម៉ង់ ផ្តល់ទៅឲ្យអ៊ុយក្រែន កើនដល់១១៥គ្រឿង។

ប្រទេសអាល្លឺម៉ង់និងដាណឺម៉ាក បានចាប់ផ្តើមគម្រោងសហការគ្នាមួយ ដើម្បីផ្តល់រថក្រោះប្រយុទ្ធស៊េរីចាស់ធុន 1A5 ទៅឲ្យទីក្រុងកៀវ ហើយការបញ្ជូនថ្មីនេះ គឺមិនត្រឹមតែរថក្រោះមួយមុខប៉ុណ្ណោះទេ ប៉ុន្តែថែមទាំងមានដ្រូនឈ្លបយកការណ៍ជាង២០គ្រឿង និងទូកគ្មានមនុស្សបើកថ្មីចំនួន៥គ្រឿងផងដែរ។

លើសពីនេះ ទីក្រុងបែរឡាំង ថែមទាំងបញ្ជូនរថពាសដែកថ្មី១២គ្រឿង និងរ៉ាដាឃ្លាំមើលដែនអាកាស៦គ្រឿង រួមជាមួយរថយន្តយោធា៣០គ្រឿង និងសម្លៀកបំពាក់រដូវរងា ៣ម៉ឺនឈុត ទៅឲ្យអ៊ុយក្រែនទៀតផង។

យោងតាមទិន្នន័យរបស់រដ្ឋាភិបាលទីក្រុងបែរឡាំង, អាល្លឺម៉ង់ គ្រោងបែងចែកប្រាក់ចំនួន ៥.៤ ពាន់លានអឺរ៉ូ (៥.៧៣ ពាន់លានដុល្លារ) សម្រាប់ជំនួយយោធាដល់ទីក្រុងកៀវនៅឆ្នាំនេះ ខណៈភាគច្រើននៃមូលនិធិទាំងនេះ នឹងត្រូវបានកំណត់ដល់ការផ្គត់ផ្គង់គ្រឿងសឹក និងការបណ្តុះបណ្តាលដល់អ៊ុយក្រែន។

នៅឆ្នាំក្រោយ ប្រទេសអាល្លឺម៉ង់ គ្រោងបង្កើនការចំណាយជិតទ្វេដង ដើម្បីជួយដល់កិច្ចខិតខំប្រឹងប្រែងសង្រ្គាមរបស់អ៊ុយក្រែន។ យោងតាមទិន្នន័យរបស់រដ្ឋាភិបាលបានឲ្យដឹងថា ការសន្យាជំនួយយោធារបស់ប្រទេសនេះសម្រាប់ឆ្នាំ២០២៤ គឺមានប្រហែល ១១.១៥ពាន់លានដុល្លារ៕

ប្រែសម្រួល៖ Vann Vann

ប្រភព៖ RT

ចុចអាន៖ រថក្រោះខ្លារខិនរបស់ន័រវែស ទៅដល់ដៃ អ៊ុយក្រែន ហើយ