សិង្ហបុរី និង Zurich ជាប់ជាទីក្រុងចំណាយថ្លៃបំផុតលើពិភពលោក

បើយោងតាមការសិក្សារបស់ក្រុមហ៊ុន Economist Intelligence Unit បានឲ្យដឹងថា ទីក្រុងសិង្ហបុរី និងទីក្រុង Zurich របស់ប្រទេសស្វីស បានជាប់ជាទីក្រុងដែលមានការចំណាយថ្លៃបំផុតរបស់ពិភពលោកនៅឆ្នាំនេះ ។​

នេះ​ជា​លើក​ទី​ ៩ ហើយ​ក្នុង​រយៈ​ពេល ១១ ឆ្នាំ ដែលទីក្រុងរបស់ប្រទេស​សិង្ហបុរី​បាន​ឈរ​ក្នុង​បញ្ជីកំពូលគេ ខណៈទីក្រុង Zurich របស់ប្រទេសស្វីស បាន​លោត​ចេញ​ពី​ចំណាត់​ថ្នាក់​ទី ៦ ​របស់​ខ្លួន​កាល​ពី​ឆ្នាំ​មុន ។

ចំណែកទីក្រុងញូវយ៉ក បានធ្លាក់ចេញពីចំណាត់ថ្នាក់កំពូលមកកាន់លេខ ៣ វិញ រួមជាមួយនឹងទីក្រុងហ្សឺណែវ ស្របពេលទីក្រុងហុងកុង​ ធ្លាក់មកចំណាត់ថ្នាក់លេខ ៥ ។​

(ទីក្រុង Zurich ប្រទេសស្វីស)

មូលហេតុដែលសិង្ហបុរី​ជាប់ចំណាត់ថ្នាក់កំពូលគេនេះ គឺដោយសារតែមានថ្លៃចំណាយខ្ពស់លើគ្រឿងទេស គ្រឿងស្រវឹង សំលៀកបំពាក់ និងជាម្ចាស់យានយន្តឯកជនច្រើនបំផុត ។ ចំណែកទីក្រុង Zurich ដែលជាប់លេខ ១ ដូចគ្នានោះ គឺមកពីមានរូបិយប័ណ្ណដ៏រឹងមាំ និងតម្លៃខ្ពស់សម្រាប់របស់របរប្រើប្រាស់ក្នុងផ្ទះ រួមជាមួយនឹងសកម្មភាពកម្សាន្តផងដែរ ។

គួរបញ្ជាក់ថា ចំពោះការស្ទង់មតិនេះត្រូវបានធ្វើឡើងចាប់ពីថ្ងៃទី១៤ ខែសីហា ដល់ថ្ងៃទី១១ ខែកញ្ញា ឆ្នាំ ២០២៣ នេះ ដោយប្រៀបធៀបតម្លៃបុគ្គលជាង ៤០០ នៅទូទាំងផលិតផល និងសេវាកម្មជាង ២០០ នៅក្នុងទីក្រុងចំនួន ១៧៣ ៕

ប្រែសម្រួល៖ នាង រតនៈ

ប្រភព៖​​ CNBC