ព្រឹទ្ធសភាអាមេរិក រារាំងការផ្តល់មូលនិធិ ជួយដល់អ៊ុយក្រែន

សំណើរបស់សេតវិមានទៅកាន់ព្រឹទ្ធសភាដែលរួមបញ្ចូលថវិកាជាង ៦០ ពាន់លានដុល្លារសម្រាប់ទីក្រុងកៀវ ត្រូវរងបរាជ័យកាលពីថ្ងៃពុធ ដោយមិនទទួលបានសំឡេងគាំទ្រចាំបាច់ចំនួន ៦០ នោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបោះឆ្នោតចុងក្រោយបានទទួលសំឡេងគាំទ្រត្រឹម ៤៩ និងប្រឆាំងរហូតដល់ ៥១ សំឡេង ខណៈព្រឹទ្ធសមាជិកឯករាជ្យលោក Bernie Sanders ដែលតែងតែបោះឆ្នោតឲ្យគណបក្សប្រជាធិបតេយ្យនោះ ស្រាប់​តែពេលនេះ បានចូលរួមជាមួយគណបក្សសាធារណរដ្ឋទៅវិញ ។ ចំណែកមេដឹកនាំសំឡេងភាគច្រើនលោក Chuck Schumer ដែលជាអ្នកប្រជាធិបតេយ្យនៅញូវយ៉ក ក៏បោះឆ្នោតប្រឆាំងដែរ ។

ដើមឡើយ សេតវិមានបានស្នើសុំថវិកាចំនួន ១០៥ ពាន់លានដុល្លារជាជំនួយ “សន្តិសុខជាតិ” គ្រាមានអាសន្ន ប៉ុន្តែគណបក្សទាំងពីរ មានការខ្វែងគំនិតគ្នាម្តងហើយម្តងទៀតរឿងជំនួយនេះ ដោយគណបក្សសាធារណរដ្ឋចង់ឲ្យគណបក្សប្រជាធិបតេយ្យគិតគូរដល់បញ្ហាក្នុងប្រទេសសិន ជាជាងបែងចែកជំនួយទៅឲ្យអ៊ុយក្រែន តៃវ៉ាន់ និងអ៊ីស្រាអែល ។

នៅព្រឹកថ្ងៃពុធ ប្រធានាធិបតី ចូ បៃដិន បានជំរុញឲ្យព្រឹទ្ធសភាអនុម័តច្បាប់នេះ ដោយចោទប្រកាន់ក្រុមអ្នកសាធារណរដ្ឋថា ពួកគេចង់ឲ្យអ៊ុយក្រែនបរាជ័យនៅលើសមរភូមិ និងធ្វើឲ្យខូចសន្តិសុខជាតិ ។

លោក បៃដិន បានប្រាប់អ្នកយកព័ត៌មានថា “តាមពិត ពិភពលោកទាំងមូលកំពុងមើលឃើញថា តើអាមេរិកនឹងធ្វើអ្វី។ បើអាមេរិកមិនដឹកនាំទេ G7, សហភាពអឺរ៉ុប និងជប៉ុន ប្រហែលមិនបន្តគាំទ្រទីក្រុងកៀវបានឡើយ ហើយច្បាស់ជាប្រគល់ជ័យជម្នះជូនប្រធានាធិបតីរុស្ស៊ី លោក វ្ល៉ាឌីមៀរ ពូទីន ជាក់ជាមិនខាន”។

សូមបញ្ជាក់ថា សហរដ្ឋអាមេរិកបានបញ្ជូនជំនួយជាង ១០០ ពាន់លានដុល្លារដល់ទីក្រុងកៀវ ចាប់តាំងពីជម្លោះជាមួយរុស្ស៊ីផ្ទុះឡើងក្នុងខែកុម្ភៈ ឆ្នាំ២០២២ រួមទាំងអាវុធ គ្រាប់រំសេវ ការផ្គត់ផ្គង់នានា ក៏ដូចជាសាច់ប្រាក់ ដើម្បីជំរុញរូបិយប័ណ្ណអ៊ុយក្រែន ក៏ដូចជាផ្តល់ប្រាក់សោធននិវត្តន៍ និងប្រាក់ខែដល់មន្ត្រីរដ្ឋផងដែរ ។

លើសពីនេះ រដ្ឋមន្ត្រីក្រសួងរតនាគារលោកស្រី Janet Yellen បានអះអាងកាលពីថ្ងៃអង្គារថា អ៊ុយក្រែននឹងចាញ់សង្គ្រាម បើគ្មានមូលនិធិបន្ថែម ហើយនេះនឹងក្លាយជាកំហុសទាំងស្រុងរបស់ទីក្រុងវ៉ាស៊ីនតោន ៕

ប្រែសម្រួល៖ Vann Vann

ប្រភព៖ RT

ចុចអាន៖ សេតវិមានសារភាពចំៗថា អាមេរិក ជិតអស់លុយជួយដល់ អ៊ុយក្រែន ហើយ