ព័ត៌មានអន្ដរជាតិ

លោក Blinken៖ អាមេរិក មានផែនការជាក់លាក់ សម្រាប់អនាគតរបស់ អ៊ុយក្រែន

បានផុស

៣ ខែ មុន

នៅ

ថ្ងៃព្រហស្បតិ៍ ២១ ធ្នូ ២០២៣

ដោយ

ក្នុងសន្និសីទសារព័ត៌មានចុងឆ្នាំនៅក្រសួងការបរទេសអាមេរិក កាលពីថ្ងៃពុធទី២០ខែធ្នូ, លោក Antony Blinken និយាយថា ទីក្រុងវ៉ាស៊ីនតោន មានយុទ្ធសាស្ត្រជាក់លាក់សម្រាប់អនាគតរបស់អ៊ុយក្រែន ប៉ុន្តែទន្ទឹមនោះ លោកក៏បានព្រមានដែរថា ការគាំទ្រផ្នែកហិរញ្ញវត្ថុកំពុងស្តួចស្តើងទៅៗ ព្រោះកញ្ចប់ជំនួយនៅសភា នៅជាប់គាំងនៅឡើយ។

រដ្ឋមន្ត្រីការបរទេសអាមេរិកលោក Antony Blinken (រូបថត៖ Xinhua)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសន្និសីទដដែលនោះ លោកលើកឡើងថា ២០២៣ គឺជាឆ្នាំនៃការសាកល្បងដ៏ធំមួយសម្រាប់ទីក្រុងវ៉ាស៊ីនតោន ព្រោះតែខ្លួនត្រូវដោះស្រាយបញ្ហាប្រឈមជាសកលយ៉ាងច្រើន ដូចជានៅអ៊ុយក្រែន ហ្គាហ្សា និងកន្លែងផ្សេងទៀត។

ប៉ុន្តែដោយសារតែ សហរដ្ឋអាមេរិក បានចេញមុខគាំទ្រគាំទ្រទីក្រុងកៀវដោយឥតងាករេ ក្នុងជម្លោះរយៈពេលជិតពីរឆ្នាំជាមួយរុស្ស៊ីមកហើយនោះ លោក Blinken បានបញ្ជាក់ទៅអ្នកសារព័ត៌មានថា ទីក្រុងវ៉ាស៊ីនតោន មានយុទ្ធសាស្ត្រច្បាស់លាស់បំផុត សម្រាប់អនាគតអ៊ុយក្រែន។

លោកនិយាយថា “យើងមានផែនការជាក់លាក់មួយ ដើម្បីធានាថា អ៊ុយក្រែនអាចងើបឈរដោយខ្លួនឯងខាងផ្នែកយោធា សេដ្ឋកិច្ច និងប្រជាធិបតេយ្យដោយមិនចាំបាច់ពឹងអ្នកដទៃ ដូច្នេះកម្រិតនៃការគាំទ្រនិងជំនួយទាំងនេះ ច្បាស់ជាលែងចាំបាច់ទៀតហើយ”។

រដ្ឋមន្ត្រីការបរទេសអាមេរិកលោក Antony Blinken (រូបថត៖ Bloomberg)

ទោះបីជាយ៉ាងណាក៏ដោយ រឿងមួយដែលលោកលើកឡើងគឺថា “ត្រូវផ្តល់ជំនួយហិរញ្ញវត្ថុបន្ថែមទៀតសម្រាប់អ៊ុយក្រែន ដើម្បីឲ្យទីក្រុងកៀវ អាចឆ្លើយតបនឹងបញ្ហាប្រឈមភ្លាមៗរបស់ខ្លួន។ យើងត្រូវតែជួយអ៊ុយក្រែនឲ្យឆ្លងកាត់ដំណាក់កាលបន្ទាប់ ឆ្លងកាត់រដូវរងា ឆ្លងកាត់និទាឃរដូវ និងរដូវក្តៅ។ ខ្ញុំក៏ចង់ឲ្យពួកគេ មានផែនការផ្ទាល់ខ្លួន សម្រាប់ពេលបន្តដែរ”។

មកទល់ពេលនេះ គណបក្សប្រជាធិបតេយ្យ និងសូម្បីតែប្រធានាធិបតីអ៊ុយក្រែន លោក វ្ល៉ាឌីមៀរ ហ្សេលេនស្គី មិនមានទឹកមាត់ប្រៃបញ្ចុះបញ្ចូលគណបក្សសាធារណរដ្ឋនៅក្នុងសភាអាមេរិក ឲ្យឯកភាពលើកញ្ចប់ជំនួយយោធាទឹកប្រាក់៥០ពាន់លានដុល្លារសម្រាប់ទីក្រុងកៀវទេ។

ប្រធានាធិបតីអ៊ុយក្រែន លោក វ្ល៉ាឌីមៀរ ហ្សេលេនស្គី (រូបថត៖ AP)

យ៉ាងណា លោក Blinken បញ្ជាក់ថា អាមេរិកនឹងទៅរកប្រទេសផ្សេងឲ្យជួយផ្តល់ការគាំទ្របន្ថែមទៀតដល់ទីក្រុងកៀវ ហើយធានាថា រុស្ស៊ី នឹងចាញ់សង្គ្រាម។

សូមបញ្ជាក់ជាថ្មី នៅថ្ងៃទី២៤ខែកុម្ភៈឆ្នាំ២០២២ រុស្ស៊ី បានបើកប្រតិបត្តិការយោធាពិសេសក្នុងប្រទេសអ៊ុយក្រែន ក្នុងគោលបំណងរំដោះតំបន់ Donbass ព្រោះថាបើយោងតាមភាគីរុស្ស៊ី, នៅទីនោះប្រជាជននៃសាធារណរដ្ឋ Donetsk និង Lugansk បានរស់នៅក្រោមគ្រាប់ផ្លោងរបស់កងកម្លាំងទីក្រុងកៀវ សឹងរាល់ថ្ងៃ។ មិនត្រឹមប៉ុណ្ណឹង ទីក្រុងមូស្គូថែមទាំងអះអាងដែរថា ខ្លួនចង់លុបបំបាត់មនោគមវិជ្ជាណាស៊ី ក៏ដូចជាភាពគ្មានយោធារបស់អ៊ុយក្រែន ទៀតផង៕

ប្រែសម្រួល៖ Vann Vann

ប្រភព៖ RT

ចុចអាន៖ លោក Blinken ៖ ការប្រកួតប្រជែងរបស់ អាមេរិក ជាមួយចិន និងរុស្ស៊ី ជា សញ្ញាបញ្ចប់សណ្ដាប់ធ្នាប់ពិភពលោក