កាសែតអាមេរិក WSJ ៖ ក្រុមហាម៉ាស នៅមានអាវុធពេញដៃបន្តសឹកសង្គ្រាម​ជាមួយ អ៊ីស្រាអែល រាប់ខែទៀត

ទីភ្នាក់ងារស៊ើបការណ៍សម្ងាត់សហរដ្ឋអាមេរិកបានប៉ាន់ស្មានថា ក្រុមប្រដាប់អាវុធប៉ាឡេស្ទីនហាម៉ាសនៅតែមានអាវុធពេញក្នុងដៃដើម្បីបន្តធ្វើសឹកសង្គ្រាមរាប់ខែទៀត ក៏ដូចជាបើកការបាញ់បោះណាមួយបទៅលើកម្លាំងទ័ពអ៊ីស្រាអែលនៅក្នុងតំបន់ហ្គាហ្សា ។ នេះបើយោងតាមការចុះផ្សាយដោយកាសែតអាមេរិក The Wall Street Journal (WSJ) កាលពីថ្ងៃទី២១ ខែមករាកន្លងទៅ ។

ក្នុងអត្ថបទកាសែតនោះបានសរសេររ៉ាយរ៉ាប់ទៀតថា នៅមុនពេលផ្ទុះឆេះភ្លើងសង្គ្រាម ក្រុមហាម៉ាសមានអ្នកប្រយុទ្ធរហូតទៅដល់ ៣០,០០០ នាក់ ហើយរហូតមកដល់ពេលនេះពួកគេប្រមាណ ២០ ទៅ ៣០ ភាគរយត្រូវបានសម្លាប់ក្រោមកណ្ដាប់ដៃកងទ័ពអ៊ីស្រាអែលក្នុងព្រឹត្តិការណ៍ ៧ តុលា ២០២៣ ខណៈប្រហែល ១១,០០០ នាក់រងរបួស ប៉ុន្តែអាចកាន់កាំភ្លើងត្រឡប់ទៅសមរភូមិប្រយុទ្ធវិញបាន ។

ស្របពេលជាមួយគ្នានេះ សារព័ត៌មាន Arab News ក៏បានរាយការណ៍ដែរថា ក្រៅពីមានសមត្ថភាពវាយលុកដោយគ្រាប់រ៉ុកកែតទៅលើកងទ័ពអ៊ីស្រាអែលហើយនោះ ក្រុមហាម៉ាសថែមទាំងអាចបង្កើតកម្លាំងប៉ូលិសរបស់ខ្លួនឡើងវិញផងដែរ នៅក្នុងផ្នែកខ្លះនៃទីក្រុងហ្គាហ្សា ។

ក្រុមហាម៉ាសដែលក្ដោបក្ដាប់តំបន់ហ្គាហ្សាតាំងតែពីឆ្នាំ ២០០៧ ហាក់ដូចជាប្ដូរក្បួនយុទ្ធសាស្ត្រទប់ទល់នឹងការវាយសន្ធាប់របស់កម្លាំងទ័ពអ៊ីស្រាអែល ខណៈក្រុមអ្នកវិភាគបានលើកឡើងថា ក្រុមប្រដាប់អាវុធប៉ាឡេស្ទីនមួយនេះកំពុងប្រតិបត្តិការនៅក្នុងអង្គភាពតូចៗ និងប្រើប្រាស់យុទ្ធសាស្ត្រទ័ពព្រៃដើម្បីពួនស្ទាក់ចាប់ទាហានអ៊ីស្រាអែល ។

ពាក់ព័ន្ធនឹងបញ្ហានេះទៀតសោត កាសែត WSJ បានចុះផ្សាយដោយដកស្រង់ប្រភពចេញពីមន្ត្រីយោធាជាន់ខ្ពស់អ៊ីស្រាអែលថា ទោះបីជាក្រុមហាម៉ាសរងទុក្ខវេទនា ក៏ដូចជាមានសមាជិកស្លាប់បាត់បង់ជីវិតរាប់ពាន់នាក់ក៏ដោយ ក៏ក្រុមប្រដាប់អាវុធមួយនេះនៅតែមានកម្លាំងស៊ូទ្រាំទប់ភ្លើងសង្គ្រាម ក្រោមគោលការណ៍ “អ្នកមិនចាំបាច់ឈ្នះសង្គ្រាមនោះទេ ប៉ុន្តែក៏មិនត្រូវចាញ់ដែរ” ។

គួរបញ្ជាក់ថា អ៊ីស្រាអែលបានបើកការវាយប្រហារយ៉ាងមិនប្រណីដៃទាំងតាមផ្លូវអាកាស និងដីគោកលើតំបន់ហ្គាហ្សាស្ទ្រីប ដោយបានសម្លាប់ជនជាតិប៉ាឡេស្ទីនជាង ២៥,០០០ នាក់ ដែលភាគច្រើនជាកុមារ និងស្ត្រី ហើយជាង ៦២,៦០០ នាក់ផ្សេងទៀតរងរបួស ដើម្បីជាការសងសឹកចំពោះការវាយឆ្មក់របស់ក្រុមហាម៉ាសក្នុងព្រឹត្តិការណ៍ ៧ តុលា ២០២៣ ។ ចំណែកខាងអ៊ីស្រាអែលវិញមានមនុស្សជិត ១,២០០ បានបាត់បង់ជិវិត ខណៈចំណាប់ខ្មាំងជាង ១៣០ នាក់នៅតែស្ថិតក្នុងកណ្ដាប់ដៃក្រុមហាម៉ាសដដែល ៕

ដោយ ៖ សុខ ជីវ័ន្ត

ចុចអាន ៖ ក្រុមហេសបូឡា ព្រមាន អ៊ីស្រាអែល ប្រយ័ត្នស៊ីកំផ្លៀង បើស្ថានការណ៍តំបន់ ព្រំដែន លីបង់ នៅតែដុតរោល