ផ្ទុះការបាញ់បោះដាក់គ្នារវាងក្រុមកុលសម្ព័ន្ធនៅ ប៉ាពូញូវហ្គីណេ ស្លាប់មនុស្សជាង ៦០ នាក់

មនុស្សយ៉ាងតិច ៦៤ នាក់បានស្លាប់រនៅក្នុងការបាញ់បោះដាក់គ្នារវាងក្រុមកុលសម្ព័ន្ធនៅតំបន់ខ្ពង់រាបដាច់ស្រយាលរបស់ប្រទេសប៉ាពូញូវហ្គីណេ ។ នេះបើយោងតាមការចេញផ្សាយរបស់សារពត៌មាន BBC នៅថ្ងៃទី១៩ ខែកុម្ភៈនេះ ។

អ្នកនាំពាក្យប៉ូលិសជាតិបានប្រាប់សារពត៌មាន BBC ថា ជនរងគ្រោះត្រូវបានបាញ់សម្លាប់ ក្នុងអំឡុងពេលជម្លោះកុលសម្ព័ន្ធនៅក្នុងខេត្ត Enga ខណៈតំបន់ខ្ពង់រាបមួយនេះបានតស៊ូជាមួយអំពើហិង្សាជាយូរមកហើយ ប៉ុន្តែការសម្លាប់នេះ គឺជាព្រឹត្តិការណ៍ដ៏អាក្រក់បំផុតក្នុងរយៈពេលប៉ុន្មានឆ្នាំមកនេះ ដោយសារការលំហូរនៃអាវុធខុសច្បាប់ ។

ជម្លោះរបស់កុលសម្ព័ន្ធទាំងនេះភាគច្រើនកើតឡើងជុំវិញការបែងចែកដីធ្លី និងទ្រព្យសម្បត្តិ ដែលនាំឲ្យប៉ូលិសបានដាក់បម្រាមគោចរ និងរឹតបន្តឹងការធ្វើដំណើរ ស្របពេលកុលសម្ព័ន្ធមានរហូតដល់ទៅ ១៧ ក្រុមហើយបានចូលរួមនៅក្នុងការប្រយុទ្ធគ្នានាពេលថ្មីៗនេះ ។

ការប្រយុទ្ធគ្នាកាលពីចុងសប្ដាហ៍ហៀបនឹងផ្ទុះឡើងម្តងទៀតទៅហើយ នៅមុនពេលមានការបង្ក្រាបដោយកងកម្លាំងសន្តិសុខដើម្បីរក្សាសន្តិភាព។ រដ្ឋាភិបាល​របស់ប្រទេសនេះកាលពី​ខែ​មុនក៏​បាន​ប្រកាស​ដាក់​ប្រទេសក្នុង​ភាពអាសន្ន​ផងដែរ បន្ទាប់ពី​កុប្បកម្ម​ និង​ការ​លួច​ប្លន់​ដ៏​ធំ​បាន​បណ្តាល​ឲ្យ​មនុស្ស​យ៉ាងតិច ១៥ នាក់​ស្លាប់​បាត់បង់ជីវិត ។

ពាក់ព័ន្ធនឹងបញ្ហានេះដែរ អូស្ត្រាលីដែលជាសម្ព័ន្ធមិត្តជិតស្និទ្ធបំផុតរបស់ប្រទេសប៉ាពូញូវហ្គីណេបាននិយាយថា ដំណឹងនៃការសម្លាប់នេះគឺ “គួរឲ្យព្រួយបារម្ភ” ខណៈលោកនាយករដ្ឋមន្ត្រី Anthony Albanese បាននិយាយនៅក្នុងបទសម្ភាសន៍តាមវិទ្យុនៅថ្ងៃចន្ទនេះថា អូស្ត្រាលី កំពុងផ្តល់ការគាំទ្រយ៉ាងខ្លាំង ជាពិសេសចំពោះការបណ្តុះបណ្តាលមន្រ្តីប៉ូលិស និងសន្តិសុខនៅក្នុងប្រទេសប៉ាពូញូវហ្គីណេ ៕

អត្ថបទ ៖ ប៊ុន សុភាព