អ្នកទោស នីហ្សេរីយ៉ា ជាង ១០០ នាក់ឆ្លៀតឱកាសរត់គេចខ្លួន ក្រោយ​ភ្លៀងធ្លាក់ខ្លាំងលិចពន្ធនាគារ

អ្នកទោសជាង ១០០ នាក់បានរត់គេចខ្លួនចេញពីពន្ធនាគារមួយកន្លែងក្នុងប្រទេសនីហ្សេរីយ៉ា បន្ទាប់ពីភ្លៀងធ្លាក់ខ្លាំងបានលិច និងបំផ្លាញផ្នែកខ្លះនៃអគារពន្ធនាគារ ។ នេះបើយោងតាមការចេញផ្សាយរបស់សារព័ត៌មាន CNN នៅថ្ងៃទី ២៦ ខែមេសា ។

អ្នកទោសសរុបចំនួន ១១៨ នាក់នៅពន្ធនាគារក្នុងតំបន់ Suleja រដ្ឋ Niger ប្រទេសនីហ្សេរីយ៉ាបានភៀសខ្លួនចេញ កាលពីយប់ថ្ងៃព្រហស្បតិ៍ ប៉ុន្តែក្នុងនោះមាន ១០ នាក់ត្រូវបានចាប់ខ្លួន និងយកទៅឃុំឃាំងវិញ ដោយសារតែទឹកភ្លៀងបានបំផ្លាញផ្នែកខ្លះនៃអគារ និងបរិវេណពន្ធនាគារ ។ ម្យ៉ាងវិញទៀត អគារភាគច្រើនគឺមានសភាពចាស់ទ្រុឌទ្រោម ដោយសារសាងសង់ឡើងតាំងពីក្នុងសម័យអាណានិគមមកម្ល៉េះ ។

ការហែកគុកពីសំណាក់អ្នកទោសមិនមែនជារឿងចម្លែកនោះទេនៅក្នុងប្រទេសនីហ្សេរីយ៉ា ដោយសារតែចំនូនអ្នកទោសកើនឡើងជាបន្តបន្ទាប់ក្នុងប៉ុន្មានឆ្នាំថ្មីៗនេះ ។ ក្នុងឆ្នាំ ២០២២ អ្នកទោសជាង ៣០០ នាក់ត្រូវបានដោះលែង បន្ទាប់ពីក្រុមសកម្មប្រយុទ្ធ Boko Haram បានវាយឆ្មក់ពន្ធនាគារមួយកន្លែងនៅក្នុងរដ្ឋធានី Abuja ។

កាលពីមួយឆ្នាំមុន អ្នកទោសជាង ២០០ នាក់បានភៀសខ្លួនចេញពីគុកមួយកន្លែងនៅក្នុងរដ្ឋ Kogi បន្ទាប់ពីខ្មាន់កាំភ្លើងបានបើកការវាយប្រហារមន្ទីរអប់រំកែប្រែ ដោយបានសម្លាប់ប៉ូលិសម្នាក់ ។ ៥ ខែមុនពេលវាយឆ្មក់នោះ ក៏មានអ្នកទោសជាង ២,០០០ នាក់បានរត់គេចខ្លួនផងដែរ ក្នុងអំឡុងពេលការវាយប្រហារស្រដៀងគ្នាដោយក្រុមប្រដាប់អាវុធនៅឯពន្ធនាគារមួយផ្សេងទៀតនៅរដ្ឋ Imo ភាគអាគ្នេយ៍ ខណៈអាជ្ញាធរបាននិយាយថា ខ្មាន់កាំភ្លើងបានប្រើប្រាស់គ្រឿងផ្ទុះដើម្បីបំផ្ទុះផ្នែកខ្លះនៃពន្ធនាគារ ៕

អត្ថបទ ៖ ប៊ុន សុភាព