ព័ត៌មានអន្ដរជាតិ

McDonald’s នៅ វៀតណាម សុំទោសពាក្យស្លោក ចំអកឲ្យបុរសចិនលោតទឹកស្លាប់ ក្រោយអតិថិជនធ្វើពហិការ

បានផុស

២ years មុន

នៅ

ថ្ងៃពុធ ៨ ឧសភា ២០២៤

ដោយ

McDonald’s ស្ថិតក្នុងប្រទេសវៀតណាម បានសុំទោសចំពោះពាក្យស្លោកថ្មីរបស់ខ្លួនដែល ប្រើពាក្យមិនសមរម្យសម្ដៅលើការស្លាប់របស់បុរសជនជាតិចិន (Patcat) បានធ្វើអត្តឃាតកាលពីប៉ុន្មានខែមុន ហើយក្លាយជារឿងរ៉ាវរសើបខ្លាំង សូម្បីតែនៅប្រទេសកម្ពុជា។

យោងតាមការចុះផ្សាយពី VnExpress កាលពីថ្ងៃទី០៧ ខែមេសា បានបញ្ចាក់ឲ្យដឹងដែរថា កាលពីថ្ងៃចន្ទសង្វាក់អាហាររហ័សរបស់សហរដ្ឋអាមេរិកក្នុងប្រទេសវៀតណាម បានបង្ហាញពាក្យស្លោកសម្រាប់មុខម្ហូបថ្មីចំនួនបីដែលនិយាយថា “ប្រសិនបើអ្នកមិនចូលចិត្តបន្លែ ចូរញ៉ាំសាច់មាន់ជាមួយឈីស BBQ”។

ទោះយ៉ាងណាក៏ដោយ ពាក្យស្លោកថ្មីមួយនេះបានបណ្តាលឲ្យមានការខឹងសម្បារយ៉ាងខ្លាំង ក្នុងចំណោមអ្នកលេងអ៊ីនធឺណិត ដែលភាគច្រើនបានរិះគន់ខ្សែសង្វាក់នេះថា ឈាមត្រជាក់ និងមិនមានគោលការណ៍ច្បាស់លាស់ក្នុងវិស័យរបស់ខ្លួន។

ការចោទប្រកាន់នេះគឺសំដៅទៅលើយុវជនជនជាតិចិនជាអ្នកលេងហ្គេមអាជីពមានរហស្សនាមថា Fat Cat អាយុ ២១ ឆ្នាំ ដែលបានលោតពីលើស្ពានក្នុងទីក្រុង Chongqing ធ្វើអត្តឃាតកាលពីថ្ងៃទី ១១ ខែមេសា ដោយខូចចិត្ត បន្ទាប់ពីបែកបាក់ជាមួយមិត្តស្រីអាយុ២៧ឆ្នាំរបស់គាត់។

ទន្ទឹមនោះទៀតសោត យោតាមប្រភពពីសារព័ត៌មាននៅក្នុងប្រទេសចិន មុនពេលយុវជនរូបនេះស្លាប់ គាត់ធ្លាប់បានបង្ហោះរូបភាពឆ្មាមួយក្បាល និងចំណងជើងថា “ខ្ញុំមិនចង់ញ៉ាំបន្លែទៀតទេ ខ្ញុំចង់ញ៉ាំ McDonald’s”។

**McDonald’s** **ដែលមនុស្សជាច្រើនយកដាក់ឲ្យ Patcat**

លើសពីនេះ យោងតាមគេហទំព័រព័ត៌មានចិន 163.com បុរសម្នាក់នេះបានប្រឹងប្រែងធ្វើការទាំងយប់ទាំងថ្ងៃ ហើយបានចំណាយលើថ្លៃអាហារតិចតួច ដើម្បីទុកប្រាក់ផ្ញើទៅគូស្នេហ៍។ គាត់ត្រូវបានគេរាយការណ៍ថាបានផ្តល់ឲ្យនាងចំនួន ៥១០,0០០០ យន់ (៧០,០០០ ដុល្លារអាមេរិក) ហើយនាងបានប្រើប្រាស់វាដើម្បីទូទាត់វិក្កយបត្រ បើកហាង និងការធ្វើដំណើរជាមួយក្រុមមិត្តស្រីរបស់នាង។

ភ្លាមៗនោះដែរ អ្នកលេងអ៊ីនធឺណិតនៅក្នុងប្រទេសវៀតណាមជាច្រើនបានប្រមូលផ្ដុំគ្នា ដោយសម្ដែងការខឹងសម្បាចំពោះពាក្យស្លោកនេះ ហើយបានអំពាវនាវឲ្យធ្វើពហិការចំពោះម៉ាកយីហោមួយនេះក្នុងប្រទេសខ្លួន។ ក្រោយមក ទើបខ្សែសង្វាក់បានបង្ហោះសារសុំទោសនៅលើទំព័រហ្វេសប៊ុករបស់ខ្លួនដោយមានន័យថា “McDonald’s ចង់សុំទោសដោយស្មោះចំពោះ Fat Cat ក្រុមគ្រួសារ និងអតិថិជនរបស់គាត់។ យើងនឹងលុបខ្លឹមសារប្រមាថទាំងអស់ដែលមានវត្តមាននៅលើវេទិកាទាំងអស់។ McDonald’s យល់ពីភាពធ្ងន់ធ្ងរនៃឧប្បត្តិហេតុនេះ ហើយនេះគឺជាមេរៀនដ៏ធំមួយសម្រាប់ដំណើរការទំនាក់ទំនងរបស់យើង”។

សូមជម្រាបជូនដែរថា McDonald’s មានវត្តមាននៅក្នុងប្រទេសជាង ១១៨ ជាមួយនឹងភោជនីយដ្ឋានចំនួន ៣៥,០០០ ដែលបម្រើមនុស្សជិត ៧០លាននាក់ក្នុងមួយថ្ងៃ។ យីហោប្រណិតមួយនេះ បើកហាងដំបូងរបស់ខ្លួននៅប្រទេសវៀតណាមក្នុងឆ្នាំ ២០១៤ ហើយឥឡូវនេះមាន ២៥ កន្លែងនៅទីក្រុងហូជីមិញ ហាណូយ Binh Duong និង Nha Trang ៕