ភ្នំពេញពាក់កណ្ដាលម៉ារ៉ាតុងអន្តរជាតិលើកទី ១៤ មានលក្ខណៈ​ពិសេសជាងឆ្នាំមុនៗ

ទិវារត់ប្រណាំងភ្នំពេញពាក់កណ្ដាលម៉ារ៉ាតុងអន្ដរជាតិ លើកទី១៤ ​នឹង​ប្រព្រឹត្តទៅនៅថ្ងៃ អាទិត្យ ទី១៤ ខែមិថុនា ឆ្នាំ​២០២៦ ដើម្បីអបអរសាទរដល់ព្រះរាជពិធី​បុណ្យ​ចម្រើន​ព្រះជន្ម​ សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ។

លោក វ៉ាត់ ចំរើន រដ្ឋលេខាធិការ ក្រសួងអប់រំ យុវជន និងកីឡា និង​ជាអគ្គលេខាធិការ គណៈកម្មាធិការជាតិអូឡាំពិកកម្ពុជា បានថ្លែងនៅក្នុងសន្និសីទសារព័ត៌មាននារសៀលថ្ងៃ អង្គារ៍ ទី ២៨ ខែ មេសា ឆ្នាំ ២០២៦ ថា ការរៀបចំទិវារត់ប្រណាំងភ្នំពេញពាក់កណ្ដាលម៉ារ៉ាតុងអន្ដរជាតិ លើកទី១៤ មានគោលបំណងធំ ៣។

ទី១. ដើម្បីអបអរសាទរដល់ព្រះរាជពិធី​បុណ្យ​ចម្រើន​ព្រះជន្ម​ សម្តេចព្រះមហាក្សត្រី នរោត្តម មុនិនាថ សីហនុ ក្នុងជន្មាយុ ៩០ ព្រះវស្សា, ទី ២. ធ្វើសប្បុរសធម៌ ដោយត្រៀមថវិការចំនួន ៥,០០០ ដុល្លារអាមេរិក ជួយដល់មន្ទីរពេទ្យគន្ធបុផ្ផា និង​ទី៣. ផ្សព្វផ្សាយកេរ្ត៍ឈ្មោះរបស់រាជធានីភ្នំពេញទៅក្រៅប្រទេស។

លោក វ៉ាត់ ចំរើន បានអំពាវនាវឱ្យប្រជាជនទាំងជាតិ និងអន្តរជាតិចូលរួមរត់ឱ្យបានច្រើនកុះករ ពីព្រោះការរៀបចំឆ្នាំនេះ គឺអធិកអធមខ្លាំង ដោយសារជាការអបអរសាទរដល់ព្រះរាជពិធី​បុណ្យ​ចម្រើន​ព្រះជន្ម​ សម្តេចព្រះមហាក្សត្រី នរោត្តម មុនិនាថ សីហនុ។ ឆ្នាំនេះ​រំពឹង​ទទួល​បាន​អ្នក​ចូលរួម​ចន្លោះពី ៥,០០០ ទៅ ៦,០០០ នាក់។

លោក សែម ផល្លា នាយកបច្ចេកទេសម៉ារ៉ាតុង​កម្ពុជា បានមានប្រសាសន៍ ថា ការរៀបចំទិវារត់ប្រណាំងភ្នំពេញពាក់កណ្ដាលម៉ារ៉ាតុងអន្ដរជាតិ ២០២៦ នេះ គឺមានភាពពិសេស ត្រង់ ថា មានការវាស់វាស់វែងផ្លូវដោយគណៈកម្មការមារ៉ាតុងពិភពលោក ហើយក៏មានការទទួលស្គាល់ផ្លួវការដោយគណៈកម្មការមារ៉ាតុងពិភពលោកផងដែរ។

លោកបានបញ្ជាក់ ថា ការរត់គ្រោងចេញដំណើរពីមុខសួនច្បារវត្តបទុមវតី ប៉ុន្តែបើមានការប្រែប្រួលនៅពេលខាងមុខ អាចនឹងចេញដំណើរពីមុខព្រះបរមរាជ្យវាំងវិញ។ វិញ្ញាសានៃការរត់មាន ៤ គឺវិញ្ញាសារត់ចម្ងាយ ២១ គីឡូម៉ែត្រ, វិញ្ញាសា ១០ គីឡូម៉ែត្រ, វិញ្ញាសា ៥ គីឡូម៉ែត្រ និងវិញ្ញាសា ២.៥ គីឡូម៉ែត្រ។

វិញ្ញាសា រត់ប្រណាំងភ្នំពេញពាក់កណ្ដាលម៉ារ៉ាតុងអន្ដរជាតិ លើកទី១២
-ការ​រត់ចម្ងាយ២១គីឡូម៉ែត្រ ចេញដំណើរម៉ោង ៥:១០ ព្រឹក
-ការរត់ចម្ងាយ១០គីឡូម៉ែត្រ ចេញដំណើម៉ោង ៥:៤៥ ព្រឹក
-ការរត់ចម្ងាយ៥គីឡូម៉ែត្រ ចេញដំណើរម៉ោង ៦:០០ ព្រឹក
-ការរត់ចម្ងាយ២.៥គីឡូម៉ែត្រ ចេញដំណើរម៉ោង ៦:១០ ព្រឹក

អត្ថបទ៖ សេម កុសល