អាមេរិក​ នឹង​ប្រកាស​ទណ្ឌកម្ម​ថ្មី​លើ​រុស្ស៊ី ក្នុង​កិច្ច​ប្រជុំ​កំពូល G7

សហរដ្ឋអាមេរិក នឹងប្រកាសពីការដាក់ទណ្ឌកម្មថ្មី និងការត្រួតពិនិត្យការនាំចេញប្រឆាំងនឹងរុស្ស៊ីក្នុងអំឡុងពេលកិច្ចប្រជុំកំពូល G7 នៅភាគខាងត្បូងប្រទេសអ៊ីតាលីនៅចុងសប្តាហ៍នេះ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន​ Reuters នៅថ្ងៃទី ១២ ខែ មិថុនានេះ។

យោងតាមទីប្រឹក្សាផ្នែកទំនាក់ទំនងសន្តិសុខជាតិរបស់សេតវិមាន លោក John Kirby ថ្លែងក្នុងសន្និសីទសារព័ត៌មាននៅទីក្រុងវ៉ាស៊ីនតោន បានឲ្យដឹងថា សហរដ្ឋអាមេរិក និងមេដឹកនាំនៃបណ្តាប្រទេស G7 បានដាក់ទណ្ឌកម្មយ៉ាងធ្ងន់ធ្ងរលើរុស្ស៊ីចំពោះការលុកលុយលើអ៊ុយក្រែនឆ្នាំតាំងពីឆ្នាំ ២០២២ ។ ពួកគេនឹងបន្ថែមការដាក់ទណ្ឌកម្មថ្មី និងការត្រួតពិនិត្យការនាំចេញដែលមានឥទ្ធិពល ដែលសំដៅទៅលើអង្គភាព និងបណ្តាញដែលជួយរុស្ស៊ីក្នុងសង្គ្រាមឈ្លានពានអ៊ុយក្រែន។

លើសពីនេះក៏មានជំហានក្នុងការប្រើប្រាស់ទ្រព្យសម្បត្តិរបស់រុស្ស៊ីដែលបង្កកនឹងត្រូវប្រកាសក្នុងអំឡុងពេលកិច្ចប្រជុំកំពូល G7 នៅអ៊ីតាលីក្នុងសប្តាហ៍នេះ ជាមួយគ្នានឹងដាក់ទណ្ឌកម្មថ្មី និងការត្រួតពិនិត្យការនាំចេញលើការឈ្លានពានរបស់ទីក្រុងមូស្គូទៅកាន់អ៊ុយក្រែនផងដែរ។

មេដឹកនាំ G7 សង្ឃឹមថានឹងយល់ព្រមលើកិច្ចព្រមព្រៀងមួយស្តីពីការប្រើប្រាស់ប្រាក់ចំណេញពីការប្រាក់លើទ្រព្យសម្បត្តិ ៣២៥ ពាន់លានដុល្លារនៃទ្រព្យសកម្មរបស់ធនាគារកណ្តាលរុស្ស៊ីដែលបានបង្កកដើម្បីជួយដល់ទីក្រុង Kyiv។ គំនិតនេះគឺដើម្បីប្រើប្រាស់ប្រាក់ចំណេញជាវត្ថុបញ្ចាំសម្រាប់ប្រាក់កម្ចីរហូតដល់ ៥០ពាន់លានដុល្លារ ប៉ុន្តែនៅតែមានការជជែកវែកញែកអំពីថាតើអ្នកណានឹងចេញបំណុលក៏ដូចជាបញ្ហាបច្ចេកទេសជាច្រើន។

គួរបញ្ជាក់ថា កិច្ចប្រជុំកំពូល G7 ធ្វើឡើងប្រឆាំងនឹងភាពចលាចលសកល និងនយោបាយ ហើយក៏ជំរុញការគាំទ្ររបស់អ៊ុយក្រែន។ ស្របពេលជាមួយគ្នានេះ ប្រធានាធិបតីអ៊ុយក្រែនលោក Volodymyr Zelensky នឹងចូលរួមកិច្ចពិភាក្សាមួយនៅថ្ងៃព្រហស្បតិ៍ស្តីពីសង្គ្រាមរបស់រុស្ស៊ីឈានចូលដល់ឆ្នាំទី៣ ជាកន្លែងដែលលោកនឹងជំរុញម្តងទៀតចំពោះជំនួយបន្ថែមទៀតពីសម្ព័ន្ធមិត្តលោកខាងលិច៕

អត្ថបទ៖ ប៊ុន សុភាព