Taylor Swift លុបចោលការប្រគំតន្ត្រីជាបន្ទាន់ ដោយសារក្រុម ISIS គ្រោងវាយប្រហារភេរវកម្ម

តាមការចុះផ្សាយរបស់ BBC នៅថ្ងៃព្រហស្បតិ៍ទី៨ខែសីហាឆ្នាំ២០២៤, កំពូលតារាចម្រៀងអាមេរិក Taylor Swift បានលុបចោលការប្រគំតន្ត្រីចំនួន៣ នៅទីក្រុងវីយែន នៃប្រទេសអូទ្រីស ជាបន្ទាន់ បន្ទាប់ពីអាជ្ញាធរចាប់បានជនសង្ស័យពីរនាក់ ពាក់ព័ន្ធការរៀបចំផែនការវាយប្រហារភេរវកម្មអំឡុងព្រឹត្តិការណ៍នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមគម្រោង, Taylor Swift នឹងត្រូវសម្តែងនៅកីឡដ្ឋាន Ernst Happel ក្នុងទីក្រុងវីយែននៅថ្ងៃទី៨, ៩ និង១០ខែសីហា សម្រាប់ព្រឹត្តិការណ៍តន្ត្រីទេសចរណ៍ Eras Tour។

ការប្រគំតន្ត្រីនេះ នឹងមានអ្នកចូលរួមក្នុងកីឡដ្ឋាន ៦៥ ០០០នាក់សម្រាប់កម្មវិធីនីមួយៗ បូករួមអ្នកគាំទ្របន្ថែមចន្លោះពី ១០ ០០០ទៅ ១៥ ០០០នាក់នៅខាងក្រៅ។ ហេតុនេះហើយទើប មេប៉ូលិសក្រុងវីយែនលោក Gerhard Purst អះអាងថា ហានិភ័យនេះសមហេតុផលណាស់ ដើម្បីបង្កើនការប្រុងប្រយ័ត្នផ្នែកសន្តិសុខ។

Barracuda Music ដែលជា Promoter ការប្រគំតន្ត្រីនេះ បានបង្ហោះ Instagram ថា «ដោយសា​រតែការបញ្ជាក់ពីមន្ត្រីរដ្ឋាភិបាល អំពីផែនការវាយប្រហារភេរវកម្ម នៅកីឡដ្ឋាន Ernst Happel, យើងគ្មានជម្រើសអ្វីក្រៅតែពីការលុបចោលកម្មវិធីចំនួនបីនេះ ដើម្បីសុវត្ថិភាពរបស់អ្នកគ្រប់គ្នា។ សំបុត្រទាំងអស់ នឹងត្រូវសងវិញដោយស្វ័យប្រវត្តិក្នុងរយៈពេល១០ថ្ងៃ»។

ពាក់ព័ន្ធរឿងនេះ ប៉ូលិស​អូទ្រីស​បាន​ចាប់​ខ្លួន​បុរស​អាយុ១៩ឆ្នាំ​ម្នាក់ ​ដែល​ប្តេជ្ញាចុះចូលជាមួយ​ក្រុម​រដ្ឋ​ឥស្លាម (ISIS) នៅ​តំបន់ Ternitz ភាគ​ខាង​ត្បូងទី​ក្រុង​វីយែន ហើយក្រោយ​មក ​ជន​សង្ស័យ​ម្នាក់​ទៀត ក៏​ត្រូវ​បាន​ចាប់​ខ្លួន​នៅ​រដ្ឋធានីដែរ។

ស្របពេលជាមួយគ្នានោះដែរ លោក Franz Ruf អគ្គនាយកទទួលបន្ទុកសុវត្ថិភាពសាធារណៈនៅក្រសួងមហាផ្ទៃអូទ្រីស បានប្រាប់អ្នកសារព័ត៌មានថា ជនសង្ស័យជាជនជ្រុលនិយមមានមនោគមន៍តាមអ៊ីនធឺណិត ហើយគ្រោងវាយប្រហារទីក្រុងវីយែន ជាពិសេសចំពោះការប្រគំតន្ត្រីរបស់ Taylor Swift តែម្តង។

តាមការបញ្ជាក់ពីប៉ូលិស សារធាតុគីមីត្រូវបានរកឃើញនៅក្នុងផ្ទះជនសង្ស័យអាយុ១៩ឆ្នាំ ដោយគេគិតថា ប្រហែលជារូបគេកំពុងផលិតឧបករណ៍ផ្ទុះ ខណៈរឿងនេះកំពុងស្ថិតក្នុងការស៊ើបអង្កេត។

គួរបញ្ជាក់ថា Taylor Swift បានចាប់ផ្តើមការប្រគំតន្ត្រី Eras Tour ក្នុងខែមីនា ឆ្នាំ ២០២៣ ជាមួយគោលបំណងប្រគំតន្ត្រី១៥២លើក នៅទូទាំងទ្វីបចំនួន៥។ តារា​ចម្រៀង​វ័យ៣៤ឆ្នាំ​រូប​នេះ​ត្រូវ​​គេ​រំពឹង​ថា​នឹង​រក​ប្រាក់បាន២ពាន់​លាន​ដុល្លារ​ពី​ការ​ប្រគំ​តន្ត្រី​ ​ដែលនឹង​បញ្ចប់​ក្នុង​ខែ​ធ្នូ៕

អត្ថបទ៖ សុខ សុវណ្ណ

ចុចអាន៖ Taylor Swift ជាប់ជាបុគ្គលឆ្នើមប្រចាំ​ឆ្នាំរបស់ទស្សនាវដ្ដី Time