ទឹកជំនន់បង្កផល​ប៉ះពាល់ដល់មនុស្ស ៤,៥ លាននាក់នៅបង់ក្លាដែសនិងភាគឦសានឥណ្ឌា

មនុស្ស​៤,៥លាននាក់បាន​និងកំពុង​រងផលប៉ះពាល់ដោយទឹកជំនន់ដែលបង្កឡើងដោយភ្លៀងធ្លាក់ខ្លាំងនៅភាគខាងកើតនៃ​ប្រទេសបង់ក្លាដែស​និងភាគឦសាននៃប្រទេសឥណ្ឌា ព្រម​ទាំង​បាន​បង្ក​ឲ្យ​មាន​មនុស្ស​ស្លាប់​​ជា​បន្តបន្ទាប់​​។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី២៣ខែសីហានេះ។

ទឹកជំនន់ដែលបង្កឡើងដោយភ្លៀងធ្លាក់ខ្លាំងបានលេបត្របាក់តំបន់ទំនាបបង់ក្លាដែស ហើយក្រុមអ្នកជួយសង្គ្រោះកំពុងព្យាយាមជម្លៀសសហគមន៍ដែលលិចទឹកចេញដោយមានមនុស្សជិត១៩០០០០នាក់ត្រូវបានបញ្ជូនទៅទីជម្រកសង្គ្រោះបន្ទាន់ ហើយស្រុកចំនួន១១ក្នុងចំណោមស្រុកចំនួន៦៤របស់ប្រទេសត្រូវបានរងផលប៉ះពាល់ដោយទឹកជំនន់។

ជាមួយគ្នានេះយ៉ាងហោចណាស់មនុស្ស ១១នាក់បានស្លាប់នៅក្នុងរដ្ឋ Tripura របស់​ប្រទេសឥណ្ឌា ខណៈមជ្ឈមណ្ឌលប្រតិបត្តិការសង្គ្រោះបន្ទាន់របស់រដ្ឋ បានបង្ហាញ​ថា នៅទីក្រុង Tripura មនុស្សជាង ៦៤០០០នាក់កំពុងស្វែងរកទីជម្រកនៅក្នុងជំរុំសង្គ្រោះ។

ពាក់ព័ន្ធបញ្ហាទឹកជំនន់នេះដែរ ក្រសួងកិច្ចការបរទេសរបស់ប្រទេសឥណ្ឌាបានច្រានចោលការចោទប្រកាន់ដែលថាទឹកជំនន់នេះគឺដោយសារតែការបង្ខំឱ្យបើកទំនប់នៅលើទន្លេ Gomati ដែលហូរកាត់តាម Tripura និងចូលប្រទេសបង់ក្លាដែសតាមរយៈស្រុក Comilla ដែលតាមពិតទឹកជំនន់នេះត្រូវបានបង្កឡើងដោយភ្លៀងធ្លាក់ខ្លាំងបំផុតក្នុងឆ្នាំនេះក្នុងរយៈពេលប៉ុន្មានថ្ងៃចុងក្រោយនេះ។

ទឹកជំនន់និងការរអិលបាក់ដីយ៉ាងធ្ងន់ធ្ងរបានសម្លាប់មនុស្សរាប់រយនាក់ ជម្លៀសមនុស្សរាប់លាននាក់ និងបំផ្លាញហេដ្ឋារចនាសម្ព័ន្ធនៅទូទាំងប្រទេសបង់ក្លាដែសក្នុងរយៈពេលប៉ុន្មានខែថ្មីៗនេះ។ ខណៈពេលដែលទឹកជំនន់កើតមានជាទូទៅនៅក្នុងតំបន់ក្នុងរដូវភ្លៀងធ្លាក់ អ្នកវិទ្យាសាស្ត្រនិយាយថា វិបត្តិអាកាសធាតុដែលបង្កឡើងដោយមនុស្សបានធ្វើឱ្យការប្រែប្រួលអាកាសធាតុកាន់តែធ្ងន់ធ្ងរ និងធ្វើឱ្យពួកគេស្លាប់កាន់តែច្រើន។

ប្រទេសនេះមានប្រជាជនចំនួន១៧០លាននាក់ រស់នៅតាមដងទន្លេ និងមានទឹកជំនន់ញឹកញាប់ក្នុងប៉ុន្មានទសវត្សរ៍ថ្មីៗនេះ ខណៈវាស្ថិតក្នុងចំណោមប្រទេសដែលងាយរងគ្រោះបំផុតចំពោះគ្រោះមហន្តរាយ និងការប្រែប្រួលអាកាសធាតុ នេះបើយោងតាមសន្ទស្សន៍ហានិភ័យអាកាសធាតុសកល៕

អត្ថបទ៖ ប៊ុន សុភាព