ចិន ព្រមាន​និស្សិត​កុំ​ឲ្យចាញ់​បោក​ប្រុស​ស្អាត​ស្រី​ស្អាត ខ្លាច​គេ​ល្បូង​ធ្វើ​ជា​ចារកម្ម

ទីភ្នាក់ងារចារកម្មកំពូលរបស់ប្រទេសចិន បានព្រមាននិស្សិត​ដែលមានសិទ្ធិចូលប្រើទិន្នន័យសំខាន់ៗ ឲ្យ​ចេះ​ប្រុងប្រយ័ត្នចំពោះ «បុរសសង្ហា និងនារីស្រស់ស្អាត» ដែលអាច​បន្លំ​ខ្លួន​ទាក់ទាញពួកគេឲ្យ​ធ្វើចារកម្មសម្រាប់អង្គភាពបរទេស ដែលប៉ះពាល់ដល់សន្តិសុខជាតិ។

ក្រសួងសន្តិសុខរដ្ឋចិន កាលពីថ្ងៃពុធបានចេញផ្សាយនៅលើគណនីបណ្ដាញ​​សង្គម WeChat ជាសាធារណៈ​អំពី​វិធី​ល្បួង​របស់​​​ចារកម្ម​​ជាច្រើន​របៀប​ក្នុង​ការ​ធ្វើ​​ឲ្យ​ក្រុម​និស្សិត​ប្រគល់​ព័ត៌មាន​រស៊ើប​ឲ្យ​​​បរទេស។

នាយកដ្ឋានសន្តិសុខ​ចិន បាន​រកឃើញថា ក្រុម​ចារកម្មបរទេស និង​​ក្រុម​ស៊ើបការណ៍សម្ងាត់ បានអនុវត្តការ​បន្លំ​ខ្លួន​ និង​​ការ​ចែចង់​​​និស្សិត​វ័យ​ក្មេង។

សេចក្តី​ថ្លែងការណ៍​មួយ​​របស់​ចិន បាន​ប្រកាស​ថា​៖ «​ពួកគេ​ទាញយក​ប្រយោជន៍​ពី​លក្ខណៈ​ចរិក​នៃ​ការ​ចង់​ដឹង​ចង់​ស្គាល់​​ខ្លាំង​របស់​សិស្ស​ក្មេងៗ និង​ឆន្ទៈ​ក្នុង​ការ​សាកល្បង​អ្វីៗ​​ដែល​ថ្មី​»។

ប្រទេស​ចិន​បាន​និង​​កំពុង​បង្ក្រាប​លើ​ការ​គំរាម​កំហែង​ដល់​សន្តិសុខ​ជាតិ​របស់​ខ្លួន ដោយ​បាន​ចេញ​ការ​ព្រមាន​ជា​ច្រើន​ក្នុង​ឆ្នាំ​នេះ​ដល់​ពលរដ្ឋ​ និង​បង្ហាញ​ពី​ករណី​ចារកម្ម​ដែល​ខ្លួន​បាន​រក​ឃើញ។

ចារកម្មបរទេស បាន​ផ្តោតជាពិសេសទៅលើនិស្សិតមហាវិទ្យាល័យ ដែលមានលទ្ធភាពទទួលបានទិន្នន័យស្រាវជ្រាវវិទ្យាសាស្ត្រថ្នាក់ជាតិ និង​ព័ត៌មាន​សំខាន់ៗ។ ពួក​គេ​​បាន​បន្លំខ្លួនជា​និស្សិត​សកលវិទ្យាល័យ និងបុគ្គលិកនៃស្ថាប័នស្រាវជ្រាវវិទ្យាសាស្ត្រ និងក្រុមហ៊ុនប្រឹក្សាយោបល់ ជា​ដើម។ បន្ទាប់​មក ពួកគេបានទាក់ទាញនិស្សិតវ័យក្មេង «ជាមួយនឹងឱកាសក្រៅម៉ោងដែលមានប្រាក់ខែខ្ពស់ ក្នុងរូបភាព​ជា​ការស្រាវជ្រាវទីផ្សារ និង​ការផ្លាស់ប្តូរការសិក្សា»។

បន្ទាប់ពីនិស្សិតបង្ហាញ​ពី​ចំណាប់អារម្មណ៍ ពួកគេ​បាន​បញ្ចុះ​បញ្ចូល​ថា ទីភ្នាក់ងារស៊ើបការណ៍សម្ងាត់បរទេសនឹងផ្តល់អ្វីដែលគេហៅថាការបណ្តុះបណ្តាល និងការណែនាំដោយឥតគិតថ្លៃតាមរយៈ​សន្និសីទ​លើ​ប្រព័ន្ធ​បណ្ដាញ​សង្គម ទូរសព្ទ ឬ​​វីដេអូ​ខល។

ពួកគេថែមទាំងដាក់​​បុរសសង្ហា និងស្រីស្អាត បន្លំ​ខ្លួន​ធ្វើ​​ជា​ស្និទ្ធស្នាល និងចេះ​យក​ចិត្ត​ទុក​ដាក់ រួច​មក​អូសទាញ​និស្សិត​ក្មេងៗ ឲ្យ​ធ្លាក់ក្នុងអន្ទាក់នៃ​សេចក្ដី​ស្នេហា​ក្លែងក្លាយ។

យ៉ាង​ណា ទីភ្នាក់ងារ​របស់​ចិន​មិនបានផ្តល់ព័ត៌មានលម្អិតជាក់លាក់អំពី​អង្គភាព​បរទេសណាមួយ ដែលបានកំណត់គោលដៅ​លើ​និស្សិតនោះទេ៕

ដោយ៖ ឈាង