UN ចោទ​អ៊ីស្រាអែលថា កំពុង​​​រំលោភ​សន្ធិសញ្ញា​សិទ្ធិ​កុមារ​យ៉ាង​ធ្ងន់ធ្ងរនៅ​ហ្គាហ្សា​

អង្គការសហប្រជាជាតិបានចោទប្រកាន់អ៊ីស្រាអែលពីបទរំលោភបំពានយ៉ាងធ្ងន់ធ្ងរលើសន្ធិសញ្ញាពិភពលោក​ស្តីពី​ការ​ការពារសិទ្ធិកុមារ ដោយនិយាយថា«សកម្មភាពយោធា​របស់​អ៊ីស្រាអែលនៅហ្គាហ្សាបានជះឥទ្ធិពលដ៏​មហន្តរាយដល់កុមារ និងជាការរំលោភបំពានដ៏អាក្រក់បំផុតក្នុងប្រវត្តិសាស្ត្រថ្មីៗនេះ»។ នេះបើយោងតាមការចេញផ្សាយរបស់សារព័ត៌មាន ​Al Jazeera នៅថ្ងៃទី២០ខែកញ្ញានេះ។

គណៈកម្មាធិការអង្គការសហប្រជាជាតិមួយ បានឲ្យដឹងថា អនីតិជនជាង១៥០០០នាក់ត្រូវបានសម្លាប់នៅ​ក្នុង​សង្គ្រាម​​នៅ​ហ្គាហ្សាចាប់តាំងពីការចាប់ផ្តើមនៃសង្រ្គាមដែលបង្កឡើងដោយការវាយប្រហារដឹកនាំដោយក្រុមហាម៉ាសនៅភាគខាងត្បូង​ប្រទេសអ៊ីស្រាអែលកាលពីថ្ងៃទី៧ខែតុលា។

មនុស្សជាង ១១០០ នាក់ភាគច្រើនជាជនស៊ីវិលអ៊ីស្រាអែលត្រូវបានសម្លាប់នៅក្នុងការវាយប្រហារ​​​ថ្ងៃដំបូង​របស់​​ក្រុមហាម៉ាស​ ហើយប្រហែល២៥០នាក់ត្រូវបានចាប់ខ្លួនជាឈ្លើយសឹក។ ជាការឆ្លើយតប អ៊ីស្រាអែលបានធ្វើសង្រ្គាមនៅក្នុងតំបន់ឡោមព័ទ្ធដោយបានសម្លាប់មនុស្សជាង ៤១០០០ នាក់ និងកាន់កាប់ទឹកដីប៉ាឡេស្ទីនដ៏ធំល្វឹងល្វើយ ខណៈការ​ស្លាប់​ដ៏​គួរ​ឲ្យ​សង្វេគ​របស់​កុមារ គឺ​ក្លាយទៅជាប្រវត្តិសាស្ត្រ​។

ជាមួយគ្នានេះក្រុម​អង្គការ​​​មនុស្ស​ធម៌​របស់​អង់គ្លេស Save the Children បានឲ្យដឹង នៅក្នុងរបាយការណ៍មួយថា ចំនួនអ្នកស្លាប់ និងរបួសដែលបាន​កត់​ត្រា​ដោយក្រសួងសុខាភិបាលប៉ាឡេស្ទីននៅហ្គាហ្សា កុមាររាប់ពាន់នាក់ត្រូវបានគេជឿថា បានបាត់ខ្លួននៅក្រោមគំនរបាក់បែក កប់ក្នុងផ្នូរដែលគ្មានស្លាកសញ្ញា ឬរងរបួសយ៉ាងធ្ងន់ធ្ងរដោយគ្រឿងផ្ទុះ។

យោងតាមរបាយការណ៍របស់ Al Jazeera នៅក្នុងខែមករា នៅពេលដែលចំនួនកុមារដែលត្រូវបានសម្លាប់ដោយសង្គ្រាមរបស់អ៊ីស្រាអែលនៅហ្គាហ្សាមានប្រហែល១០០០០នាក់ ដោយកុមារប៉ាឡេស្ទីនម្នាក់ត្រូវបានសម្លាប់នៅទីនោះរៀងរាល់១៥នាទីម្តង។

គណៈកម្មាធិការអង្គការសហប្រជាជាតិដែលមានសមាជិក១៨រូប តាមដានភាព​អនុលោមតាមប្រទេសនានាជាមួយអនុសញ្ញាស្តីពីសិទ្ធិកុមារឆ្នាំ ១៩៨៩ ដែលជាសន្ធិសញ្ញាអនុម័តយ៉ាងទូលំទូលាយស្វែងរកការការពារកុមារពីអំពើហិង្សា និងការរំលោភបំពានផ្សេងៗទៀត។ អ៊ីស្រាអែលក៏បានផ្តល់សច្ចាប័នលើសន្ធិសញ្ញានេះក្នុងឆ្នាំ១៩៩១​ ដោយការ​បញ្ជូនគណៈប្រតិភូដ៏ធំមួយទៅសវនាការរបស់អង្គការសហប្រជាជាតិនៅទីក្រុងហ្សឺណែវនៅថ្ងៃទី៣-៤ខែកញ្ញា។

ពួកគេបានអះអាងថា សន្ធិសញ្ញានេះមិនត្រូវបានអនុវត្តនៅក្នុងតំបន់ហ្គាហ្សា ឬតំបន់ West Bank ដែលកាន់កាប់នោះទេ ប៉ុន្តែ អ៊ីស្រាអែលប្តេជ្ញាគោរពច្បាប់មនុស្សធម៌អន្តរជាតិ។ អ៊ីស្រាអែលបានឲ្យដឹងថា យុទ្ធនាការយោធារបស់ខ្លួននៅហ្គាហ្សាគឺសំដៅលុបបំបាត់ក្រុមហាម៉ាស ហើយវាមិនកំណត់គោលដៅជនស៊ីវិលទេ ប៉ុន្តែពួកយុទ្ធជនប៉ាឡេស្ទីនលាក់ខ្លួនក្នុងចំណោមជនស៊ីវិល។

នៅក្នុងការសន្និដ្ឋានរបស់ខ្លួន គណៈកម្មាធិការនេះបានអំពាវនាវឱ្យអ៊ីស្រាអែលផ្តល់ជំនួយជាបន្ទាន់ដល់កុមាររាប់ពាន់នាក់ដែលពិការ ឬរងរបួសដោយសង្រ្គាម ផ្តល់ការគាំទ្រដល់កុមារកំព្រា និងអនុញ្ញាតឱ្យមានការផ្ដល់ផ្នែកវេជ្ជសាស្រ្តបន្ថែមទៀតដល់តំបន់ហ្គាហ្សា។ ទោះយ៉ាងណា ស្ថាប័នអង្គការសហប្រជាជាតិមិនមានមធ្យោបាយអនុវត្តអនុសាសន៍របស់ខ្លួនទេ ទោះបីជាប្រទេសនានាជាទូទៅមានបំណងអនុវត្តក៏ដោយ៕

អត្ថបទ ៖ ប៊ុន សុភាព