ព័ត៌មានអន្ដរជាតិ

មនុស្សរាប់ពាន់នាក់ជាប់គាំងក្នុងហេតុការណ៍ទឹកជំនន់នៅបង់ក្លាដែស ខណៈមួយចំនួនស្លាប់

បានផុស

២ years មុន

នៅ

ថ្ងៃចន្ទ ៧ តុលា ២០២៤

ដោយ

យ៉ាងហោចណាស់មនុស្ស៥នាក់បានស្លាប់ និងជាង ១០ម៉ឺននាក់នៅតែជាប់គាំងដោយសារទឹកជំនន់ដ៏ធ្ងន់ធ្ងរដែលបង្កឡើងមកពីភ្លៀងធ្លាក់ខ្លាំង និងទឹកទន្លេហក់ឡើងហូរហៀបន្តវាយលុកភាគខាងជើងប្រទេសបង់ក្លាដែស។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី៧ខែកញ្ញានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្រុក Sherpur ដែលជាស្រុកភាគខាងជើងដែលរងគ្រោះខ្លាំងបំផុត ដោយកម្រិតទឹកទន្លេសំខាន់ៗបានហក់ឡើង ធ្វើឱ្យលិចទឹកដល់ផ្ទះប្រជាពលរដ្ឋ និងធ្វើឱ្យមនុស្សរាប់ពាន់គ្រួសារផ្លាស់ទីលំនៅ។

អាជ្ញាធរមូលដ្ឋានបារម្ភពីការខូចខាតយ៉ាងធំធេងដល់វិស័យកសិកម្ម ដោយផលដំណាំ និងដីស្រែចម្ការ ជាពិសេសស្រែប្រឈមនឹងការបំផ្លិចបំផ្លាញខ្ពស់ជាងគេ។ លើសពីនេះ ផ្ទះនិងផ្លូវជាច្រើនស្ថិតនៅក្រោមទឹករាប់ម៉ែត្រ ដោយកាត់ផ្តាច់ភូមិនានា និងធ្វើឲ្យអ្នកស្រុកខ្វះខាតការជួយសង្គ្រោះ។ ប្រជាជនបង់ក្លាដែលខ្លះ បាននិយាយថា៖«ពួកគេមិនដែលឃើញទឹកជំនន់ធ្ងន់ធ្ងរបែបនេះពីមុនមកទេក្នុងជីវិតរបស់ពួកគេទេ»។

យ៉ាងណាមិញបុគ្គលិកកងទ័ពបានប្រើទូក និងឧទ្ធម្ភាគចក្រ ចូលរួមកិច្ចខិតខំប្រឹងប្រែងជួយសង្គ្រោះ ផ្តល់ការផ្គត់ផ្គង់សង្គ្រោះបន្ទាន់ និងជម្លៀសអ្នកដែលជាប់គាំងដោយទឹកជំនន់ ប៉ុន្តែស្ពានបានបាក់ស្រុត ហើយផ្លូវត្រូវលិចទឹក ដែលធ្វើឱ្យអាជ្ញាធរមូលដ្ឋានពិបាកទៅដល់តំបន់រងគ្រោះ។

ប្រទេសបង់ក្លាដែសដែលមានប្រជាជនចំនួន១៧០លាននាក់បានជួបប្រទះនឹងទឹកជំនន់ជាច្រើនដង នៅឆ្នាំនេះដែលបញ្ជាក់ថា ប្រទេសនេះងាយរងគ្រោះចំពោះការប្រែប្រួលអាកាសធាតុ។ ការវិភាគរបស់វិទ្យាស្ថានធនាគារពិភពលោកឆ្នាំ ២០១៥ បានប៉ាន់ប្រមាណថាប្រជាជន ៣.៥ លាននាក់នៅក្នុងប្រទេសបង់ក្លាដែសកំពុងប្រឈមនឹងហានិភ័យទឹកជំនន់ទន្លេប្រចាំឆ្នាំ ដែលជាហានិភ័យមួយដែលអ្នកវិទ្យាសាស្ត្រនិយាយថាកាន់តែអាក្រក់ទៅៗដោយសារតែការប្រែប្រួលអាកាសធាតុពិភពលោក។

នៅពេលដែលកម្រិតទឹកបន្តកើនឡើង ក្តីបារម្ភកើនឡើងអំពីផលប៉ះពាល់រយៈពេលវែងលើវិស័យកសិកម្មក្នុងតំបន់ ជាពិសេសដំណាំស្រូវ។ ប្រសិនបើទឹកជំនន់មិនស្រកក្នុងពេលឆាប់ៗទេ ចំនួនសេដ្ឋកិច្ចរបស់កសិករអាចនឹងធ្ងន់ធ្ងរ។បន្ថែមលើក្តីបារម្ភនេះ ការិយាល័យអាកាសធាតុបានព្យាករណ៍ថានឹងមានភ្លៀងធ្លាក់កាន់តែច្រើននៅថ្ងៃខាងមុខ ដែលបង្កើនការភ័យខ្លាចទឹកជំនន់បន្ថែមទៀត។

គួររម្លឹកថា ទឹកជំនន់កាលពីខែសីហានៅភាគខាងកើតប្រទេសបង់ក្លាដែស ដែលបានសម្លាប់មនុស្សជាង ៧០ នាក់ បណ្តាលឱ្យខូចខាតហេដ្ឋារចនាសម្ព័ន្ធនានាគិតជាទឹកប្រាក់ចំនួន ១.២០ ពាន់លានដុល្លារអាមេរិក ខណៈអង្គការសហប្រជាជាតិ និងដៃគូរបស់ខ្លួនបានចាប់ផ្តើមការអំពាវនាវមនុស្សធម៌ចំនួន ១៣៤ លានដុល្លារអាមេរិក ដើម្បីផ្តល់ជំនួយសង្គ្រោះបន្ទាន់ និងការគាំទ្រដល់សហគមន៍ដែលរងផលប៉ះពាល់ដោយសារទឹកជំនន់ និងព្យុះស៊ីក្លូនដែលកំពុងបន្តវាយប្រហារនៅក្នុងប្រទេសបង់ក្លាដែស៕