ព័ត៌មានអន្ដរជាតិ

កូរ៉េខាងជើង អួតថា យុទ្ធជនជាង១លាននាក់ស្ម័គ្រចិត្តធ្វើទាហាន ក្រោយភាពតានតឹងកើនឡើង

បានផុស

២ years មុន

នៅ

ថ្ងៃពុធ ១៦ តុលា ២០២៤

ដោយ

Chheang

បើយោងតាមសារព័ត៌មានរដ្ឋ KCNA យុទ្ធជនវ័យក្មេងប្រមាណ ១,៤លាននាក់ បានចុះឈ្មោះ ឬត្រឡប់ចូលទៅធ្វើជាទាហានឡើងវិញ នៅក្នុងសប្ដាហ៍នេះ បន្ទាប់ពីភាពតានតឹងនៅក្នុងឧបទ្វីបកូរ៉េបានកើនឡើងខ្លាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

KCNA បានរាយការណ៍នៅថ្ងៃទី១៦ខែតុលាថា ប្រជាជនវ័យក្មេងរបស់កូរ៉េខាងជើង មានការប្ដេជ្ញាចិត្តប្រយុទ្ធនៅក្នុងសមរភូមិ «ដើម្បីកម្ទេចសត្រូវដោយប្រើអាវុធបដិវត្តន៍»។ ការចូលរួមរបស់យុទ្ធជននេះ ធ្វើឡើងរយៈពេលត្រឹមតែ២ថ្ងៃប៉ុណ្ណោះ ក្រោយភាពថ្នើងថ្នាក់រវាងកូរ៉េខាងជើង និងកូរ៉េខាងត្បូងកំពុងឆេះឆួលខ្លាំងគួរឲ្យកត់សម្គាល់។

កាលពីឆ្នាំ២០២៣ ប្រព័ន្ធផ្សព្វផ្សាយកូរ៉េខាងជើង ធ្លាប់បានចុះផ្សាយស្រដៀងគ្នានេះម្ដងដែរ ពាក់ព័ន្ធនឹងការស្ម័គ្រចិត្តចុះឈ្មោះចូលក្នុងជួរយោធា ដើម្បីប្រយុទ្ធប្រឆាំងនឹងសហរដ្ឋអាមេរិក។

គួររំឭកថា កាលពីថ្ងៃអង្គារ កូរ៉េខាងជើង បានបំផ្ទុះកម្ទេចផ្លូវចំនួន២ខ្សែដែលតភ្ជាប់ទៅកូរ៉េខាងត្បូង ដើម្បីបង្ហាញពីកំហឹង ខណៈប៉ុន្មានថ្ងៃមកនេះ ភាគីទាំងពីរក៏បោះពាក្យសម្តីខ្លាំងៗដាក់គ្នាមិនស្ទើរដែរ ធ្វើឲ្យគេបារម្ភថា ជម្លោះអាចកាន់តែរីកធំ។ ក្រោយការបំផ្ទុះ យោធាកូរ៉េខាងត្បូងក៏បានធ្វើការបាញ់ព្រមានផងដែរ។

ទីក្រុងព្យុងយ៉ាង ក៏បានចោទប្រកាន់ទីក្រុងសេអ៊ូលថាបានបញ្ជូនដ្រូនហោះឆ្លងកាត់រដ្ឋធានីកូរ៉េខាងជើង ហើយប្រទេសកូរ៉េទាំងពីរបានប៉ះទង្គិចគ្នាជុំវិញការបង្ហោះប៉េងប៉ោងសំរាមតាំងពីខែឧសភា។ ក្រុងព្យុងយ៉ាង បាននិយាយថា ការបាញ់បង្ហោះប៉េងប៉ោងនេះគឺជាការឆ្លើយតបទៅនឹងប៉េងប៉ោងដែលបង្ហោះដោយសកម្មជនកូរ៉េខាងត្បូងដែលប្រឆាំងរដ្ឋាភិបាលកូរ៉េខាងជើង៕

ដោយ៖ ឈាង

ចុចអាន៖ កូរ៉េខាងជើង បំផ្ទុះកម្ទេចផ្លូវតភ្ជាប់ទៅ កូរ៉េខាងត្បូង