ព្យុះសង្ឃរា Oscar វាយប្រហារគុយបា ចំពេល​ដាច់​ចរន្តអគ្គិសនី

ព្យុះសង្ឃរា Oscar បោកបក់លើឆ្នេរភាគឦសាននៃប្រទេសគុយបាដែល​នៅ​កៀក​សហរដ្ឋ​អាមេរិក ខណៈដែលប្រទេស​កោះ​មួយនេះកំពុងដាច់ចរន្តអគ្គិសនីទូទាំងប្រទេស។ នេះបើយោងតាមការចេញផ្សាយរបស់សារព័ត៌មាន​ Jazeera នៅថ្ងៃទី២១ខែតុលានេះ។

​ការ​ផ្សព្វផ្សាយ​ចុងក្រោយបំផុតរបស់មជ្ឈមណ្ឌលព្យុះសង្ឃរាជាតិ (NHC) នៅសហរដ្ឋអាមេរិក បាននិយាយថា ព្យុះនេះបានបោកបក់កាលពីល្ងាចថ្ងៃអាទិត្យនៅជិតទីក្រុង Baracoa ក្នុងខេត្ត Guantanamo ជាមួយនឹងកម្លាំងខ្យល់​អតិ​បរមា​ប្រហែល​១៣០​គីឡូម៉ែត្រក្នុងមួយម៉ោង។ ក្រសួង​ឧតុនិយមគុយបាក៏បានព្រមានអំពី «ស្ថានភាព​ដ៏គ្រោះថ្នាក់បំផុត» នៃការមកដល់របស់ព្យុះOscarនៅភាគខាងកើតនៃប្រទេស ដែលភាគច្រើនគ្មានអគ្គិសនីនោះទេ ។

ព្យុះនេះបានវាយប្រហារតែប៉ុន្មានថ្ងៃបន្ទាប់ពីការបិតទ្វាររោងចក្រថាមពលដ៏ធំបំផុតរបស់ប្រទេសគុយបាបានធ្វើឱ្យខូចបណ្តាញអគ្គិសនីជាតិ ដោយដាក់សម្ពាធបន្ថែមទៀតលើប្រទេសមួយដែលកំពុងប្រឈមនឹងការខ្វះខាតស្បៀងអាហារ ថ្នាំពេទ្យ ប្រេងឥន្ធនៈ និងទឹកស្រាប់ទៅហើយ។

កាលពីថ្ងៃសៅរ៍ ប្រធានាធិបតីគុយបា លោក Miguel Diaz-Canel បានបង្ហោះនៅលើប្រព័ន្ធផ្សព្វផ្សាយសង្គមថា ក្រុម​មន្ត្រីនៅភាគខាងកើតនៃប្រទេសនេះកំពុងធ្វើការយ៉ាងលំបាកដើម្បីការពារប្រជាជន និងធនធានសេដ្ឋកិច្ច ដោយសារការមកដល់នៃព្យុះសង្ឃរា Oscar ទោះយ៉ាងណាមនុស្សរាប់លាននាក់នៅតែគ្មានថាមពលប្រើប្រាស់កាលពីថ្ងៃអាទិត្យ។

ជាមួយគ្នានេះនាយករដ្ឋមន្ត្រី Manuel Marrero Cruz ធ្លាប់បានប្រកាស «គ្រាអាសន្នថាមពល» ដោយផ្អាកសេវាសាធារណៈដែលមិនសំខាន់ ដើម្បីផ្តល់អាទិភាពដល់ការផ្គត់ផ្គង់អគ្គិសនីដល់ផ្ទះ។ ឥឡូវនេះសាលារៀនទូទាំងប្រទេសត្រូវបានបិទរហូតដល់ថ្ងៃពុធ មានតែកម្មករសំខាន់ៗប៉ុណ្ណោះដែលត្រូវទៅធ្វើការនៅថ្ងៃចន្ទនេះ។ លោក Diaz-Canel បានស្តីបន្ទោសស្ថានភាពរលំបាករបស់ប្រទេសគុយបាថាដោយសារការរឹតបន្តឹងពាណិជ្ជកម្មរបស់សហរដ្ឋអាមេរិករយៈពេលប្រាំមួយទសវត្សរ៍នេះ។

គួររម្លឹកថានៅក្នុងខែកក្កដា ឆ្នាំ ២០២១ ការដាច់ចរន្តអគ្គិសនីបានជំរុញឱ្យមានកំហឹងពីសាធារណៈជនមិនធ្លាប់មានពីមុនមក បង្កបាតុកម្មពេញផ្លូវ បណ្តាលឲ្យមនុស្សម្នាក់ស្លាប់ និងរាប់សិបនាក់រងរបួស។ នៅឆ្នាំ ២០២២ ប្រទេសកោះនេះក៏បានទទួលរងនូវការដាច់ចរន្តអគ្គីសនីជាច្រើនម៉ោងជារៀងរាល់ថ្ងៃ ដែលបណ្តាលមកពីព្យុះសង្ឃរា Ian៕

អត្ថបទ៖ ប៊ុន សុភាព