អាស៊ាន៤ប្រទេស ក្លាយជាដៃគូផ្លូវការរបស់ BRICS

តាមការចុះផ្សាយរបស់ CNA កាលពីថ្ងៃព្រហស្បតិ៍ទី២៤ខែតុលាឆ្នាំ២០២៤ ប្រទេសចំនួន៤នៅតំបន់អាស៊ីអាគ្នេយ៍គឺថៃ វៀតណាម ឥណ្ឌូណេស៊ី និងម៉ាឡេស៊ី ត្រូវបានទទួលស្គាល់ជាដៃគូផ្លូវការរបស់ BRICS ហើយ ត្បិតមិនទាន់ក្លាយជាសមាជិកពេញសិទ្ធិក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងការបង្ហោះនៅលើទំព័រ X ផ្លូវការរបស់ខ្លួន, BRICS ប្រកាសថា ក្រៅពីប្រជាជាតិអាស៊ីអាគ្នេយ៍ទាំង៤នេះ នៅមានប្រទេសចំនួន៩ទៀត ក៏ត្រូវបានដាក់បញ្ចូលជាដៃគូរបស់ខ្លួនផងដែរ ដូចជាអាល់ហ្សេរី បេឡារុស បូលីវី គុយបា កាហ្សាក់ស្ថាន នីហ្សេរីយ៉ា តួកគី អ៊ូហ្គង់ដា និងអ៊ូសបេគីស្ថាន ពោលគឺសរុបទាំងអស់មាន១៣ប្រទេស។

ជុំវិញរឿងនេះដែរ អ្នកវិភាគហានិភ័យនយោបាយឯករាជ្យ Halmie Azrie បានប្រាប់ CNA ថា សមាជិកអាស៊ានទាំងបួននេះ ទំនងចង់បង្កើនឱកាសពាណិជ្ជកម្ម និងពង្រីកទំនាក់ទំនងបរទេស ចំពេលភូមិសាស្ត្រនយោបាយកំពុងច្របូកច្របល់ និងសង្រ្គាមនៅអ៊ុយក្រែន ក៏ដូចជានៅមជ្ឈិមបូព៌ា។

ទន្ទឹមនោះ បណ្ឌិត Oh Ei Sun អ្នកជំនាញជាន់ខ្ពស់នៅវិទ្យាស្ថានកិច្ចការអន្តរជាតិសិង្ហបុរីក៏លើកឡើងដែរថា ប្រទេសអាស៊ានទាំងបួន ប្រហែលចង់អែបចិនឲ្យកាន់តែជាប់ ជាមួយក្តីសង្ឃឹមថានឹងទទួលបានលក្ខខណ្ឌពាណិជ្ជកម្ម និងការវិនិយោគកាន់តែប្រសើរឡើងជាមួយទីក្រុងប៉េកាំង ព្រោះថាចិនគឺជាកម្លាំងជំរុញដ៏សំខាន់មួយសម្រាប់ BRICS។

សូមបញ្ជាក់ថា ដើមឡើយ BRICS មានតែប្រេស៊ីល រុស្ស៊ី ឥណ្ឌា និងចិន ប៉ុណ្ណោះ ដោយត្រូវបានបង្កើតឡើងក្នុងឆ្នាំ២០០៩ ជាក្រុមកិច្ចសហប្រតិបត្តិការសម្រាប់ប្រទេសដែលមានសេដ្ឋកិច្ចកំពុងរីកចម្រើន ហើយមិនយូរប៉ុន្មានក៏មានអាហ្វ្រិកខាងត្បូងចូលរួមនៅឆ្នាំ២០១០។ ក្រោ​យមក ប្លុកនេះបានពង្រីកខ្លួន ដោយបន្ថែមសមាជិកថ្មីៗដូចជាអ៊ីរ៉ង់ អេហ្ស៊ីប អេត្យូពី និងអារ៉ាប់រួម។

BRICS តំណាងឲ្យប្រហែល៤០%នៃចំនួនប្រជាជនពិភពលោក និង១ភាគ៥នៃពាណិជ្ជកម្មសកល ប៉ុន្តែក្រុមនេះ ត្រូវបានបណ្តាប្រទេសលោកខាងលិច ចាត់ទុកជាគូប្រជែងរបស់ប្លុកដែលខ្លួនកំពុងដឹកនាំ តួយ៉ាងដូចជា G7 ជាដើម៕

អត្ថបទ៖ សុខ សុវណ្ណ

ចុចអាន៖ ​BRICS ​ចេញសេចក្តី​ថ្លែងការណ៍​មាន​ការចរចា​ឡើង​​វិញ​​នូវ​កម្មវិធីនុយក្លេអ៊ែរអ៊ីរ៉ង់​