អ៊ីស្រាអែល សម្លាប់មនុស្ស ១៤៣នាក់ទៀតនៅហ្គាហ្សា, អាមេរិក ថា ខ្លួនស្លុតចិត្តណាស់

តាមសេចក្តីរាយការណ៍របស់ Aljazeera, អ៊ីស្រាអែល បានបើកការវាយប្រហារអាកាស ទូទាំងតំបន់ហ្គាហ្សាកាលពីថ្ងៃអង្គារទី២៩ខែតុលាឆ្នាំ២០២៤ សម្លាប់ពលរដ្ឋប៉ាឡេស្ទីនចំនួន១៤៣នាក់ ដោយក្នុងនោះមាន១៣២នាក់ បាត់បង់ជីវិតនៅដែនដីប៉ែកខាងជើង ខណៈសហរដ្ឋអាមេរិក និយាយថា ខ្លួនស្លុតចិត្តណាស់ចំពោះការវាយប្រហារនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងសុខាភិបាលគ្រប់គ្រងដោយក្រុមហាម៉ាស អះអាងថា អ៊ីស្រាអែល បានបាញ់មីស៊ីលដាក់អគារលំនៅដ្ឋានកម្ពស់៥ជាន់នៅតំបន់ Beit Lahia ហើយអ៊ីស្រាអែល ក៏ទទួលស្គាល់ដែរថា ខ្លួនដឹងពីរបាយការណ៍នៃប៉ះពាល់ដល់ជនស៊ីវិលដែរ ប៉ុន្តែនឹងពិនិត្យលម្អិត។

ជុំវិញបញ្ហានេះ អ្នកនាំពាក្យក្រសួងការបរទេសអាមេរិក លោក Matthew Miller លើកឡើងថា «ទីក្រុងវ៉ាស៊ីនតោន ពិតជាព្រួយបារម្ភខ្លាំងណាស់ចំពោះការបាត់បង់អាយុជីវិតជនស៊ីវិលនៅក្នុងឧបទ្ទវហេតុនេះ។ វាគឺជាឧប្បត្តិហេតុដ៏រន្ធត់ ជាមួយនឹងលទ្ធផលធ្វើឲ្យយើងស្លុតចិត្ត»។

លោកបន្តថា «សោកនាដកម្មសម្រាប់ជនស៊ីវិល នៅក្នុងការវាយប្រហារចុងក្រោយបង្អស់នេះ បានដាស់តឿនឲ្យយើង ដឹងពីមូលហេតុដែលយើងចាំបាច់ត្រូវបញ្ចប់សង្រ្គាមនេះ»។

សូមបញ្ជាក់ថា កងកម្លាំងការពារអ៊ីស្រាអែល (IDF) បាននិងកំពុងប្រតិបត្តិការនៅជ្រោយហ្គាហ្សាភាគខាងជើង ក្នុងរយៈពេលពីរសប្តាហ៍កន្លងមកនេះ ជាពិសេសនៅតំបន់ Jabalia, Beit Lahia និង Beit Hanoun តែម្តង ដោយអះអាងថា ប្រតិបត្តិការរបស់ខ្លួននៅទីនោះ គឺដើម្បីការពារក្រុមហាម៉ាសឲ្យប្រមូលផ្តុំគ្នាឡើងវិញ ហើយចោទពួកគេថា បានបង្កប់ខ្លួនក្នុងចំណោម ជនស៊ីវិល។

អ៊ីស្រាអែល បានបើកយុទ្ធនាការកម្ទេចក្រុមហាម៉ាស ជាការសងសឹកចំពោះទង្វើយ៉ាងគឃ្លើនរបស់ក្រុមនេះ នៅភាគខាងត្បូងប្រទេសអ៊ីស្រាអែលកាលពីថ្ងៃទី៧ខែតុលាឆ្នាំ២០២៣ ដែលកាលនោះបានសម្លាប់មនុស្សប្រហែល១ ២០០នាក់ខណៈ២៥១នាក់ផ្សេងទៀត ត្រូវចាប់ធ្វើជាចំណាប់ខ្មាំង។ ចំណែកការសងសឹករបស់អ៊ីស្រាអែលនោះ បានសម្លាប់មនុស្សជាង ៤២ ៩២៤នាក់៕

អត្ថបទ៖ សុខ សុវណ្ណ

ចុចអាន៖ លោក បៃដិន ថា សង្គ្រាម​នៅ​ហ្គាហ្សា​គួរ​តែ​បញ្ចប់ ខណៈ​តួ​លេខ​អ្នក​ស្លាប់​លើស​ពី ៤៣ ០០០​នាក់ហើយ