ព័ត៌មានអន្ដរជាតិ

អ៊ុយក្រែន ទទួលបានគ្រាប់កាំភ្លើងធំពី EU ជាង៩៨ម៉ឺនគ្រាប់

បានផុស

២ years មុន

នៅ

ថ្ងៃអង្គារ ១២ វិច្ឆិកា ២០២៤

ដោយ

Chheang

សហភាពអឺរ៉ុប (EU) បានផ្គត់ផ្គង់គ្រាប់កាំភ្លើងធំចំនួនច្រើនជាង ៩៨ម៉ឺនគ្រាប់ ឲ្យទៅប្រទេសអ៊ុយក្រែន សម្រាប់ធ្វើសង្គ្រាមជាមួយរុស្ស៊ី ហើយគ្រោងនឹងបង្កើនតួលេខនេះឲ្យបានដល់ ១លានគ្រាប់មុនដំណាច់ឆ្នាំ២០២៤។ នេះបើយោងតាមការលើកឡើងរបស់លោក Josep Borrell ប្រធានគោលនយោបាយការបរទេសរបស់ EU នៅថ្ងៃទី១១ខែវិច្ឆិកាឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដំបូងឡើយ EU គ្រោងផ្ដល់គ្រាប់កាំភ្លើងធំប្រវែង ១៥៥មិល្លិម៉ែត្រចំនួន ១លានគ្រាប់ ត្រឹមខែមីនាឆ្នាំនេះ ប៉ុន្តែត្រូវបានអូសបន្លាយមកទល់នឹងពេលបច្ចុប្បន្ន ព្រោះសមត្ថភាពផលិតគ្រាប់កាំភ្លើងទាំងនោះនៅមានកង្វះខាត និងមិនទាន់តម្រូវការ។

លោក Borrell បានប្រាប់សារព័ត៌មាន European Pravda របស់អ៊ុយក្រែន ថា៖ «ខ្ញុំដឹងថា យើងធ្លាប់បានប្ដេជ្ញាសម្រេចគោលដៅនៅត្រឹមនិទាឃរដូវ ហើយយើងទទួលបរាជ័យ។ ប៉ុន្តែយើងអាចធ្វើវានៅមុនដំណាច់ឆ្នាំនេះ»។

គួរបញ្ជាក់ថា នាយករដ្ឋមន្ត្រីឆែក លោក Petr Fiala ក៏ធ្លាប់បានលើកឡើងថា ប្រទេសរបស់លោក នឹងបញ្ជូនគ្រាប់កាំភ្លើងធំចំនួន ៥០ម៉ឺនគ្រាប់ទៅឲ្យអ៊ុយក្រែននៅចុងឆ្នាំនេះ។

អ៊ុយក្រែន បាននិងកំពុងបង្កើនផលិតកម្មការពារនៅក្នុងស្រុកផងដែរ ដើម្បីព្យាយាមកាត់បន្ថយការពឹងផ្អែកលើជំនួយយោធាពីសម្ព័ន្ធមិត្ត និងធានាបាននូវការផ្គត់ផ្គង់ទាន់ពេលវេលា។

មេបញ្ជាការប្រដាប់អាវុធកំពូលរបស់អ៊ុយក្រែន បាននិយាយថា ក្រុងកៀវបានបង្កើនការផលិតគ្រាប់កាំភ្លើងពីគ្មានទាល់តែសោះនៅមុនពេលសង្គ្រាមជាមួយរុស្ស៊ី ឲ្យបានដល់រាប់លានគ្រាប់ឯណោះក្នុងមួយឆ្នាំ៕

ដោយ៖ ឈាង