ព័ត៌មានអន្ដរជាតិ

កូនប្រុសទី២របស់មេដឹកនាំកំពូលអ៊ីរ៉ង់ ទំនងជាឡើងស្នងតំណែងបន្តពីឪពុក

បានផុស

២ years មុន

នៅ

ថ្ងៃចន្ទ ១៨ វិច្ឆិកា ២០២៤

ដោយ

Chheang

ក្រោយមានព័ត៌មានជាហូរហែពាក់ព័ន្ធនឹងបញ្ហាសុខភាពរបស់មេដឹកនាំកំពូលអ៊ីរ៉ង់ ស្រាប់តែលេចឮដំណឹងថ្មីថា លោក Mojtaba Khamenei ដែលជាកូនប្រុសទី២របស់លោក Ali Khamenei ត្រូវបានគេរៀបចំឲ្យឡើងកាន់តំណែងបន្តវេនពីឪពុក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងរយៈពេល២ឆ្នាំកន្លងមកនេះ លោក Mojtaba បានបង្កើនឥទ្ធិពលជាច្រើននៅក្នុងរបបគ្រប់គ្រងអ៊ីរ៉់ង់ ដែលនេះបង្ហាញយ៉ាងច្បាស់ថា វាជាព័ស្តុតាងនៃការត្រៀមឡើងបន្តវេនពីលោក Ali។

ថ្វីត្បិតលោក Mojtaba មិនសូវបានបង្ហាញមុខមាត់ខ្លាំងជាសាធារណៈក៏ដោយ ក៏លោកមានតួនាទីសំខាន់សម្រាប់ការបញ្ជាដឹកនាំនៅក្នុងការិយាល័យមេដឹកនាំកំពូល។ លោកត្រូវបានគេស្គាល់ច្រើនតាមរយៈការបង្ក្រាបក្រុមបាតុកម្មមុនការបោះឆ្នោតឆ្នាំ២០០៩។

លោក Mojtaba ធ្លាប់បានទទួលងារជា «Ayatollah» នៅក្នុងឆ្នាំ២០២១ ដែលបំពេញតាមលក្ខខណ្ឌរដ្ឋធម្មនុញ្ញសម្រាប់តួនាទីជាមេដឹកនាំកំពូល។

កើតនៅឆ្នាំ១៩៦៩ លោក Mojtaba បានចូលរួមជាមួយកងឆ្មាំបដិវត្តន៍អ៊ីស្លាម (IRGC) បន្ទាប់ពីបានបញ្ចប់ថ្នាក់អនុវិទ្យាល័យនៅឆ្នាំ១៩៨៧។ លោកបានបម្រើការនៅ IRGC នៅចុងសម័យសង្រ្គាមអ៊ីរ៉ាក់-អ៊ីរ៉ង់។

នៅដើមសតវត្សរ៍ទី២១ លោកមានទំនាក់ទំនងជិតស្និទ្ធទាំងនៅក្នុង IRGC និងជាមួយក្រុមបព្វជិតកំពូលអ៊ីរ៉ង់។

ការសម្រេចចិត្តក្នុងការរើសអ្នកស្នងតំណែងកំពូល ត្រូវគេរាយការណ៍ថាបានធ្វើឡើងក្នុងអំឡុងពេលកិច្ចប្រជុំសម្ងាត់នៃក្រុមប្រឹក្សាសភាអ៊ីរ៉ង់។ កិច្ចប្រជុំសម្ងាត់ បានប្រព្រឹត្តទៅនៅក្នុងខែកញ្ញា តាមសំណើរបស់លោក Ali Khamenei។ សភាដែលមានសមាជិកចំនួន៦០រូប ត្រូវគេរាយការណ៍ថាបានប្រឈមមុខនឹងសម្ពាធយ៉ាងខ្លាំងដើម្បីឈានដល់ការសម្រេចចិត្តជាឯកច្ឆ័ន្ទ រួមទាំងការគំរាមកំហែងពីលោក Khamenei និងតំណាងរបស់គាត់។

របាយការណ៍អន្តរជាតិរបស់អ៊ីរ៉ង់ និយាយថា ការសម្រេចចិត្តនេះត្រូវបានរក្សាទុកជាការណ៍សម្ងាត់ ដើម្បីជៀសវាងការរិះគន់ជាសាធារណៈ ដោយបន្ថែមថា៖ «សភាបានប្ដេជ្ញារក្សាការណ៍សម្ងាត់ជាអតិបរមាលើការសម្រេចចិត្ត ដោយសារតែការភ័យខ្លាចចំពោះការរីករាលដាលនៃការតវ៉ាជាសាធារណៈ»។

សូមបញ្ជាក់ថា របាយការណ៍ជាច្រើនកាលពីពេលថ្មីៗ បានឲ្យដឹងថា លោក Ali Khamenei វ័យ៨៥ឆ្នាំ កំពុងធ្លាក់ខ្លួនឈឺធ្ងន់សន្លប់បាត់បង់ស្មារតី។ យ៉ាងណាមិញ ប៉ុន្មានម៉ោងក្រោយការចេញផ្សាយព័ត៌មានទាំងនោះ រដ្ឋាភិបាលអ៊ីរ៉ង់បានបញ្ចេញរូបភាពជាច្រើនសន្លឹកពីមេដឹកនាំកំពូលរបស់ខ្លួននៅក្នុងជំនួបជាមួយលោក Mojtaba Amani ដែលអគ្គរដ្ឋទូតអ៊ីរ៉ង់ប្រចាំប្រទេសលីបង់ កាលពីថ្ងៃអាទិត្យទី១៧ខែវិច្ឆិកា។

ប្រភពព័ត៌មានមួយចំនួន បានអះអាងថា លោក Ali Khamenei គ្រោងផ្ទេរអំណាចទៅឲ្យកូនប្រុស ខណៈខ្លួននៅរស់រានមានជីវិត ដើម្បីធានាបាននូវការផ្ដាស់ប្ដូររបបគ្រប់គ្រង់ដោយរលូន និងជៀសវាងការប្រឆាំង៕

ដោយ៖ ឈាង

Related Topics:ប្រទេសអ៊ីរ៉ង់