ព័ត៌មានអន្ដរជាតិ

ឡានដឹកជំនួយជិត១០០គ្រឿងនៅហ្គាហ្សា ត្រូវគេប្លន់

បានផុស

៤ ខែ មុន

នៅ

ថ្ងៃអង្គារ ១៩ វិច្ឆិកា ២០២៤

ដោយ

Chheang

ទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីន UNRWA បានឲ្យដឹងថា រថយន្តដឹកជំនួយជិត១០០គ្រឿងរបស់ខ្លួន ត្រូវបានគេប្លន់ ដែលហេតុការណ៍នេះបានកើតឡើងនៅភាគខាងត្បូងតំបន់ហ្គាហ្សា កាលពីថ្ងៃសៅរ៍សប្ដាហ៍មុន។ UNRWA បានពណ៌នាថា វាជាឧបទ្ទវហេតុដ៏អាក្រក់បំផុតមួយដែលមិនធ្លាប់មាន។

រថយន្តដឹកជំនួយចូលហ្គាហ្សានាពេលកន្លងមក (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

UNRWA បានប្រាប់សារព័ត៌មាន CNN នៅក្នុងសេចក្តីថ្លែងការណ៍មួយនៅថ្ងៃចន្ទនេះថា រថយន្តចំនួន ៩៧គ្រឿងក្នុងចំណោមរថយន្តចំនួន ១០៩គ្រឿងដែលដឹកស្បៀងអាហារសម្រាប់ UNRWA និងកម្មវិធីស្បៀងអាហារពិភពលោក WFP ពីតំបន់ Kerem Shalom ឆ្លងកាត់ចូលទៅក្នុងហ្គាហ្សា ត្រូវបានបាត់បង់នៅក្នុងហេតុការណ៍ប្លន់។

UNRWA បានបន្ថែមថា អ្នកបើកបរត្រូវបានបង្ខំឲ្យចុះពីរថយន្តនៅត្រង់ប៉ុស្តិ៍ឆែកឆេរប្រដាប់ដោយអាវុធមួយកន្លែង ហើយបុគ្គលិកជំនួយបានរងរបួស ព្រមទាំងរថយន្តបានរងការខូចខាតយ៉ាងខ្លាំង។

UNRWA មិនបានកំណត់អត្តសញ្ញាណជនល្មើសនៃការលួចប្លន់នោះទេ ប៉ុន្តែបានស្តីបន្ទោស «ការមិនអនុវត្តច្បាប់ និងសណ្តាប់ធ្នាប់» និង «វិធានការរបស់អាជ្ញាធរអ៊ីស្រាអែល» សម្រាប់ការបង្កើត «បរិយាកាសដ៏គ្រោះថ្នាក់» នេះឡើង។

UNRWA បាននិយាយទៀតថា បញ្ហាប្រឈមដែលពាក់ព័ន្ធនឹងការផ្តល់ជំនួយដល់តំបន់ហ្គាហ្សា បានក្លាយទៅជារឿងកាន់តែអាក្រក់ ដោយរថយន្តដឹកទំនិញត្រូវបានពន្យារពេលជាញឹកញាប់នៅគោលដៅផ្សេងៗ ហើយជារឿយៗត្រូវបានគេប្លន់ និងទទួលរងនូវការវាយប្រហារកាន់តែខ្លាំងឡើង។

ពាក់ព័ន្ធនឹងរឿងប្លន់នេះ ក្រសួងមហាផ្ទៃនៃតំបន់ហ្គាហ្សា បានអះអាងនៅថ្ងៃទី១៩ខែវិច្ឆិកានេះថា កងកម្លាំងសន្តិសុខរបស់ខ្លួនបានសម្លាប់មនុស្សជាង២០នាក់ ដែលជាប់ទាក់ទិននឹងករណីប្លន់រថយន្តដឹកជំនួយ។

កងកម្លាំងជាតិ និងអ៊ីស្លាម ដែលជាសម្ព័ន្ធមិត្តរបស់ក្រុមប៉ាឡេស្ទីន បានកោតសរសើរនូវសកម្មភាពរបស់ក្រសួងមហាផ្ទៃតំបន់ហ្គាហ្សប្រឆាំងនឹងអំពើប្លន់ ហើយចាត់ទុកជនទាំងនោះថាជាចោរឧក្រិដ្ឋកម្មដែលបំផ្លាញសន្ដិសុខផ្ទៃក្នុង និងការចិញ្ចឹមជីវិតរបស់ពលរដ្ឋ៕

ដោយ៖ ឈាង