ព័ត៌មានអន្ដរជាតិ

លោក Zelensky៖ អ៊ុយក្រែនសម្រេចបានសន្តិភាពសិន ទើបពលរដ្ឋអាចបោះឆ្នោតរើសមេដឹកនាំថ្មី

បានផុស

២ years មុន

នៅ

ថ្ងៃពុធ ២០ វិច្ឆិកា ២០២៤

ដោយ

Chheang

លោក Volodymyr Zelensky បានប្រកាសលុបចោលការបោះឆ្នោតសកលនៅអ៊ុយក្រែនសាជាថ្មី ខណៈអាណត្តិជាប្រធានាធិបតីរបស់លោកបានផុតកំណត់តាំងពីខែមីនាឆ្នាំ២០២៤ ក្រោមហេតុផលកំពុងផ្ទះមានសង្គ្រាមជាមួយរុស្ស៊ី និងការអនុវត្តច្បាប់អាជ្ញាសឹកដែលបានដាក់ចេញកាលពីឆ្នាំ២០២២។ លោក Zelensky បានបញ្ជាក់ថា អ៊ុយក្រែនត្រូវតែសម្រេចបានសន្តិភាពជាមុនសិន ទើបប្រជាជនអាចទៅបោះឆ្នោត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសរបស់មេដឹកនាំអ៊ុយក្រែន បានធ្វើឡើងនៅអំឡុងពេលកិច្ចប្រជុំផ្ទៃក្នុងសភាកាលពីថ្ងៃអង្គារ។

លោក Zelensky បានរៀបរាប់ថា៖ «យើងទាំងអស់គ្នាដឹងហើយថា រដ្ឋធម្មនុញ្ញអ៊ុយក្រែន និងច្បាប់មិនអនុញ្ញាតឲ្យមានការបោះឆ្នោតក្នុងសម័យសង្គ្រាម ហើយគ្មាននរណាម្នាក់ក្នុងពិភពលោកទាមទាររឿងនេះពីអ៊ុយក្រែនទេ។ ទោះយ៉ាងណាក៏ដោយ មានមនុស្សមួយចំនួននៅអ៊ុយក្រែន ដែលអាចស្រេកឃ្លានសម្រាប់ [ការបោះឆ្នោត] ដែលពួកគេចង់ឈ្លោះទាស់ទែងនៅក្នុងរដ្ឋ ច្រើនជាងប្រយុទ្ធដើម្បីរដ្ឋ។ ពួកគេស្វែងរកជម្លោះនយោបាយនៅក្នុងគ្រាអាសន្ន ដូចជានៅក្នុងរឿងកុន។ នេះជាផលប៉ះពាល់ដល់អ៊ុយក្រែន»។

មេដឹកនាំអ៊ុយក្រែន បានសង្កត់ធ្ងន់ពីសារៈសំខាន់នៃយុទ្ធសាស្ត្រគ្រប់ជ្រុងជ្រោយដើម្បីធានាស្ថិរភាពផ្ទៃក្នុងរបស់ប្រទេស។ នេះរួមបញ្ចូលទាំងការពង្រឹងជួរមុខ ការជំរុញឧស្សាហកម្មការពារជាតិ ការធានាសេដ្ឋកិច្ច និងប្រព័ន្ធហិរញ្ញវត្ថុ ការបង្កើនទំហំព័ត៌មាន ការធានាយុត្តិធម៌ ការកែលម្អអភិបាលកិច្ចក្នុងតំបន់ និងបញ្ហាសំខាន់ៗផ្សេងទៀត។

លោក Andrey Yermak ប្រធានការិយាល័យប្រធានាធិបតីអ៊ុយក្រែន បាននិយាយថា ការបោះឆ្នោតប្រធានាធិបតីនឹងត្រូវធ្វើឡើងភ្លាមៗ បន្ទាប់ពីសង្គ្រាមបានបញ្ចប់។

បើយោងតាមលោក Ruslan Stefanchuk ប្រធានសភា ការបោះឆ្នោតប្រធានាធិបតីថ្មីនឹងប្រព្រឹត្តទៅក្នុងរយៈពេល៦០ថ្ងៃ បន្ទាប់ពីច្បាប់អាជ្ញាសឹកត្រូវបានលុបចោល៕

ដោយ៖ ឈាង

Related Topics:ប្រទេសអ៊ុយក្រែន