ព័ត៌មានអន្ដរជាតិ

អាមេរិក បញ្ជាក់ថានឹងមិនប្រគល់អាវុធនុយក្លេអ៊ែរឲ្យទៅអ៊ុយក្រែនវិញទេ

បានផុស

២ years មុន

នៅ

ថ្ងៃចន្ទ ២ ធ្នូ ២០២៤

ដោយ

Chheang

សហរដ្ឋអាមេរិក នឹងមិនពិចារណាលើរឿងប្រគល់អាវុធនុយក្លេអ៊ែរទៅឲ្យអ៊ុយក្រែនវិញទេ ដោយអាវុធទាំងនោះត្រូវបានអ៊ុយក្រែនធ្លាប់បោះបង់ចោល បន្ទាប់ពីការដួលរលំនៃសហភាពសូវៀត។ នេះបើយោងតាមការលើកឡើងរបស់លោក Jake Sullivan ទីប្រឹក្សាសន្តិសុខជាតិនៃសេតវិមាន កាលពីថ្ងៃអាទិត្យទី១ខែធ្នូឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Sullivan បានធ្វើការកត់សម្គាល់ដូច្នោះ ដើម្បីឆ្លើយតបទៅនឹងអត្ថបទព័ត៌មានមួយរបស់ New York Times កាលពីខែមុនដែលផ្សាយថា ប្រភពពីមន្ត្រីលោកខាងលិចមួយចំនួន បានបង្ហើបថា លោកប្រធានាធិបតី ចូ បៃដិន អាចនឹងអាចឲ្យអាវុធនុយក្លេអ៊ែរទៅក្រុងកៀវ មុនពេលលោកចាកចេញពីតំណែង។

មន្ត្រីជាន់ខ្ពស់អាមេរិករូបនេះ បានប្រាប់សារព័ត៌មាន ABC ថា៖ «នោះមិនស្ថិតនៅក្រោមការពិចារណាទេ។ អ្វីដែលយើងកំពុងធ្វើគឺការបង្កើនសមត្ថភាពធម្មតាផ្សេងៗដល់អ៊ុយក្រែន ដើម្បីពួកគេអាចការពារខ្លួនប្រកបដោយប្រសិទ្ធភាព និងប្រយុទ្ធជាមួយរុស្ស៊ី មិនមែន (ផ្តល់ឲ្យពួកគេ) នូវសមត្ថភាពនុយក្លេអ៊ែរ»។

កាលពីសប្តាហ៍មុន រុស្ស៊ី បាននិយាយថា គំនិតនេះគឺ «ឆ្កួតទាំងស្រុង» ហើយថា ការទប់ស្កាត់សេណារីយ៉ូបែបនេះ គឺជាហេតុផលមួយក្នុងចំណោមហេតុផលដែលទីក្រុងមូស្គូបញ្ជូនកងទ័ពចូលទៅក្នុងអ៊ុយក្រែន។

ទីក្រុងកៀវ បានទទួលអាវុធនុយក្លេអ៊ែរពីសហភាពសូវៀត បន្ទាប់ពីការដួលរលំនៅឆ្នាំ១៩៩១ ប៉ុន្តែបោះបង់ចោលវិញនៅក្រោមកិច្ចព្រមព្រៀងឆ្នាំ១៩៩៤ ដែលជាអនុស្សរណៈទីក្រុង Budapest ជាថ្នូរនឹងការធានាសន្តិសុខពីប្រទេសរុស្ស៊ី សហរដ្ឋអាមេរិក និងចក្រភពអង់គ្លេស៕

ដោយ៖ ឈាង