សហរដ្ឋអាមេរិកដាក់ទណ្ឌកម្មថ្មីលើនាវាដឹកប្រេងរបស់អ៊ីរ៉ង់

សហរដ្ឋអាមេរិកបានដាក់ទណ្ឌកម្មបន្ថែមប្រឆាំងនឹងអ៊ីរ៉ង់ដែលកំណត់គោលដៅ​លើ​អង្គភាព និងនាវាចំនួន៣៥ ដែលជាផ្នែកមួយនៃកងនាវា shadow fleet ដែលដឹកជញ្ជូនប្រេងអ៊ីរ៉ង់ទៅកាន់ទីផ្សារបរទេស។ នេះបើយោងតាមការចេញផ្សាយរបស់សារព័ត៌មាន​ Al Jazeera នៅថ្ងៃទី០៤ខែធ្នូនេះ។

ក្រសួងរតនាគារសហរដ្ឋអាមេរិកបាននិយាយក្នុងសេចក្តីថ្លែងការណ៍មួយថា ទណ្ឌកម្មនេះគឺស្រដៀងគ្នាទៅនឹងទណ្ឌកម្មដែលបានដាក់ពីមុនកាលពីពីរខែមុនក្នុងការឆ្លើយតបទៅនឹងការវាយប្រហារដោយមីស៊ីលកាលពីថ្ងៃទី ១ខែតុលារបស់អ៊ីរ៉ង់ទៅលើទីតាំងយោធាក្នុងប្រទេសអ៊ីស្រាអែល និងចំពោះការកើនឡើងនុយក្លេអ៊ែរដែលប្រទេសនេះបានប្រកាស។

យោងតាមទីភ្នាក់ងារស៊ើបការណ៍សម្ងាត់លោក Bradley Smith បាននិយាយនៅក្នុងសេចក្តីថ្លែងការណ៍មួយថា«អ៊ីរ៉ង់បន្តបង្រួបបង្រួមប្រាក់ចំណូលពីពាណិជ្ជកម្មប្រេងរបស់ខ្លួនឆ្ពោះទៅរកការអភិវឌ្ឍន៍កម្មវិធីនុយក្លេអ៊ែរ ការរីកសាយនៃមីស៊ីលផ្លោង និងបច្ចេកវិជ្ជាយន្តហោះគ្មានមនុស្សបើក និងការឧបត្ថម្ភគាំទ្រដល់ភេរវករក្នុងតំបន់ ដោយប្រថុយនឹងធ្វើឱ្យតំបន់មានអស្ថិរភាពបន្ថែមទៀត»។ លោក Smith បានបន្ថែមថា «សហរដ្ឋអាមេរិកនៅតែប្តេជ្ញាចិត្តក្នុងការរំខានដល់កងនាវាទាំងនោះ និងប្រតិបត្តិករដែលជួយសម្រួលដល់សកម្មភាពខុសច្បាប់ទាំងនេះ»។ លើសពីនេះសហរដ្ឋអាមេរិកនឹងដាក់ទណ្ឌកម្មបង្កកទ្រព្យសម្បត្តិរបស់អង្គភាពនៅក្នុងសហរដ្ឋអាមេរិក ដែលជនជាតិអាមេរិកធ្វើប្រតិបត្តិការហិរញ្ញវត្ថុជាមួយអ៊ីរ៉ង់គឺខុសច្បាប់។

គួរបញ្ជាក់ថាទីក្រុងតេអេរ៉ង់បានបាញ់មីស៊ីលទៅកាន់ប្រទេសអ៊ីស្រាអែលកាលពីថ្ងៃទី ១ ខែតុលា ជាការសងសឹកចំពោះការសម្លាប់ប្រធានក្រុមហាម៉ាស់ Ismail Haniyeh ក្នុងទីក្រុងតេអេរ៉ង់ និងការធ្វើឃាតមេដឹកនាំក្រុម ហេសបូឡា លោក Hassan Nasrallah និងឧត្តមសេនីយ៍អ៊ីរ៉ង់នៅទីក្រុង Beirut ។

បេសកជនរបស់អ៊ីរ៉ង់ប្រចាំអង្គការសហប្រជាជាតិ លោក Amir Saeid Iravani បាននិយាយបន្ទាប់ពីការសម្លាប់លោក Haniyeh ថា ប្រទេសរបស់លោក «ត្រៀមខ្លួនយ៉ាងពេញលេញដើម្បីការពារអធិបតេយ្យភាព និងបូរណភាពទឹកដីរបស់ខ្លួនប្រឆាំងនឹងការឈ្លានពានណាមួយដែលផ្តោតលើផលប្រយោជន៍ និងសន្តិសុខដ៏សំខាន់របស់ខ្លួន»។

អ៊ីរ៉ង់ក៏ធ្លាប់បានព្រមានថា ប្រសិនបើ «សង្រ្គាមថាមពល» ចាប់ផ្តើម ពិភពលោកនឹងបាត់បង់ប្រេងប្រហែល ១២ លានធុងជារៀងរាល់ថ្ងៃ ពោលគឺប្រហែល ១០ ភាគរយនៃផលិតកម្មពិភពលោក៕

អត្ថបទ៖ ប៊ុន សុភាព