អាមេរិក វាយប្រហារអ៊ីរ៉ង់ចាស់ដៃ ចូលដល់ថ្ងៃទី៦ កម្ទេចស្ពាន និងព្រលានយន្តហោះ ប៉ះទាំងមន្ទីរពេទ្យកុមារ

សហរដ្ឋអាមេរិកអាមេរិក បានបន្តបើកការវាយប្រហារទ្រង់ទ្រាយធំ ឈានចូលដល់ថ្ងៃទី៦ ដោយទម្លាក់គ្រាប់បែកលើទីតាំងសំខាន់ៗ នៅអ៊ីរ៉ង់ ខណៈការផ្ទុះធ្វើឲ្យកក្រើកទូទាំងប្រទេសនេះ កម្ទេចទាំងស្ពាន ស្ថានីយរថភ្លើង និងព្រលានយន្តហោះ ព្រមទាំងបង្ខំឲ្យជម្លៀសមន្ទីរពេទ្យកុមារ។

ទីបញ្ជាការអាមេរិក (CENTCOM) ​នៅតែអះអាងថា ប្រតិបត្តិការរបស់ខ្លួន គឺមានបំណងកម្ទេចយោធារបស់អ៊ីរ៉ង់ និងដើម្បីធានាសុវត្ថិភាពច្រកសមុទ្រ Hormuz លែងឲ្យទីក្រុងតេហេរ៉ង់ មានសមត្ថភាពគំរាមកំហែងតទៅទៀត។

តាមការផ្សាយរបស់ BBC នៅថ្ងៃសុក្រ ទី១៧ ខែកក្កដា ឆ្នាំ២០២៦ ក្នុងការវាយប្រហារយ៉ាងចាស់ដៃថ្មីនេះ, ការផ្ទុះត្រូវបានគេរាយការណ៍នៅក្នុងទីតាំងយុទ្ធសាស្រ្តនានា ដូចជា៖

🛑ទីក្រុង Bandar Abbas៖ ការផ្ទុះដ៏ខ្លាំងក្លា ៣លើក បានអង្រួនភាគខាងលិច ទីក្រុងកំពង់ផែដ៏ធំរបស់អ៊ីរ៉ង់ មួយនេះ ដោយបំផ្លាញស្ថានីយរថភ្លើងដ៏សំខាន់មួយ។

🛑ទីក្រុង Bandar Khamir៖ ស្ពានសំខាន់ចំនួនពីរ គឺ Geryveh និង Kahurestan ដែលតភ្ជាប់ទីក្រុងនេះ ទៅកាន់ Shiraz ត្រូវបានវាយប្រហារចំ បណ្តាលឲ្យមនុស្ស ២នាក់ បាត់បង់ជីវិត។

🛑កោះ Qeshm៖ មានសេចក្តីរាយការណ៍អំពីការផ្ទុះ ចំនួន៨លើក នៅជិតភូមិ Masan ពេលដែលយន្តហោះចម្បាំងអាមេរិក កំពុងហោះហើរ នៅលើមេឃ។

🛑ទីក្រុង Bushehr៖ មានការផ្ទុះដ៏ធំចំនួនពីរលើក នៅជិតទីក្រុងដែលជាទីតាំងមានរោងចក្រថាមពលនុយក្លេអ៊ែរស៊ីវិលតែមួយគត់ របស់អ៊ីរ៉ង់។

🛑ទីក្រុង Ahvaz៖ គោលដៅនានា នៅតំបន់ជាយក្រុងនៃមជ្ឈមណ្ឌលឧស្សាហកម្មដ៏ធំមួយនេះ ត្រូវបានវាយប្រហារចំ បង្ខំឲ្យមានការជម្លៀសជាបណ្តោះអាសន្ន នូវមន្ទីរពេទ្យឯកទេសជំងឺមហារីកកុមារមួយកន្លែង ដោយសារតែស្ថិតនៅកៀកនឹងទីតាំងគ្រាប់ធ្លាក់ខ្លាំងពេក។

🛑ទីក្រុង Iranshahr៖ គ្រាប់ធំចំនួន៣គ្រាប់ បានធ្លាក់ចំព្រលានយន្តហោះ នៅតំបន់ភាគអាគ្នេយ៍។

សូមជម្រាបថា សង្គ្រាមផ្ទុះឡើងខ្លាំងជាថ្មីនេះ គឺបន្ទាប់ពីអាមេរិក ចោទថា អ៊ីរ៉ង់ បានបំពាន MoU ដែលភាគីទាំងពីរ ចុះហត្ថលេខាកាលពីខែមិថុនា តាមរយៈការវាយប្រហារលើកប៉ាល់ដឹកទំនិញ នៅច្រក Hormuz ទើបទីក្រុងវ៉ាស៊ីនតោន ឆ្លើយតបយ៉ាងចាស់ដៃបែបនេះ។

យ៉ាងណា អ៊ីរ៉ង់ ក៏សងសឹកវិញ ដោយបាញ់មីស៊ីលនិងបង្ហោះដ្រូន ទៅកម្ទេចទ្រព្យសម្បត្តិយោធា និងមូលដ្ឋានទ័ពអាមេរិក នៅក្នុងតំបន់៕

អត្ថបទ៖ សុវណ្ណ