ព័ត៌មានអន្ដរជាតិ

UN៖ អ៊ីរ៉ង់ ប្រហារជីវិតមនុស្សជាង ៩០០នាក់ក្នុងឆ្នាំ២០២៤

បានផុស

១ year មុន

នៅ

ថ្ងៃពុធ ៨ មករា ២០២៥

ដោយ

Chheang

មនុស្សដែលត្រូវបានប្រហារជីវិតនៅក្នុងប្រទេសអ៊ីរ៉ង់ មានចំនួន ៩០១នាក់កាលពីឆ្នាំ២០២៤ ដែលក្នុងនោះមានស្ត្រីចំនួន ៣១នាក់។ នេះបើយោងតាមទិន្នន័យរបស់ការិយាល័យសិទ្ធិមនុស្សរបស់អង្គការសហប្រជាជាតិ កាលពីថ្ងៃទី៧ខែមករាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អង្គការសហប្រជាជាតិ បានឲ្យដឹងថា ការប្រហារជីវិតភាគច្រើនគឺសម្រាប់បទល្មើសពាក់ព័ន្ធនឹងគ្រឿងញៀន ប៉ុន្តែក្នុងនោះក៏មានអ្នកប្រឆាំងនយោបាយ និងអ្នកដែលមានទំនាក់ទំនងជាមួយនឹងការតវ៉ាទ្រង់ទ្រាយធំក្នុងឆ្នាំ២០២២ផងដែរ។ ការប្រហារជីវិត ត្រូវបានធ្វើឡើងដោយការព្យួរក។

កាលពីឆ្នាំ២០២៣ ទោសប្រហារជីវិតនៅអ៊ីរ៉ង់ មានចំនួនសរុប ៨៥៣នាក់។ ការកាត់ទោសប្រហារជីវិត មានចំនួនខ្ពស់បំផុតរបស់អ៊ីរ៉ង់ គឺនៅអំឡុងឆ្នាំ២០១៥ ដោយមនុស្ស ៩៧២នាក់ត្រូវបានសម្លាប់។

លោក Volker Türk មន្ត្រីជាន់ខ្ពស់អង្គការសហប្រជាជាតិទទួលបន្ទុកសិទ្ធិមនុស្ស បាននិយាយនៅក្នុងសេចក្តីថ្លែងការណ៍មួយថា៖ «វាជារឿងគួរឲ្យព្រួយបារម្ភម្តងទៀតដែលយើងឃើញមានការកើនឡើងនៃចំនួនមនុស្ស ដែលត្រូវទទួលទោសប្រហារជីវិតនៅអ៊ីរ៉ង់ពីមួយឆ្នាំទៅមួយឆ្នាំ។ វាដល់ពេលហើយ ដែលអ៊ីរ៉ង់បញ្ឈប់ការប្រហារជីវិតដ៏ក្តៅគគុកនេះ»។

ទន្ទឹមនោះ លោកស្រី Liz Throssell អ្នកនាំពាក្យការិយាល័យសិទ្ធិមនុស្សរបស់អង្គការសហប្រជាជាតិ បានលើកឡើងថា ចំនួនអ្នកទោសជាស្ត្រីភេទដែលត្រូវប្រហារជីវិតនៅអ៊ីរ៉ង់ឆ្នាំ២០២៤ គឺជាតួខ្ពស់បំផុតក្នុងរយៈពេល១៥ឆ្នាំកន្លងមកនេះ។

លោកស្រីបានបន្ថែមថា៖ «ករណីភាគច្រើនពាក់ព័ន្ធនឹងការចោទប្រកាន់ពីបទមនុស្សឃាត។ ស្ត្រីមួយចំនួនធំគឺជាជនរងគ្រោះនៃអំពើហិង្សាក្នុងគ្រួសារ អាពាហ៍ពិពាហ៍កុមារ ឬអាពាហ៍ពិពាហ៍ដោយបង្ខំ»៕

ដោយ៖ ឈាង