ព័ត៌មានអន្ដរជាតិ

ពិធីឡើងកាន់តំណែងលោក ត្រាំ ផ្លាស់ប្ដូរទៅធ្វើនៅក្នុងវិមានវិញ ព្រោះតែព្យុះព្រិលធ្ងន់ធ្ងរ

បានផុស

១ year មុន

នៅ

ថ្ងៃសៅរ៍ ១៨ មករា ២០២៥

ដោយ

Chheang

ប្រធានាធិបតីទើបជាប់ឆ្នោតលោក ដូណាល់ ត្រាំ បាននិយាយថា ពិធីស្បថចូលកាន់តំណែងរបស់លោកនៅថ្ងៃចន្ទទី២០ខែមករាឆ្នាំ២០២៥ នឹងត្រូវធ្វើឡើងនៅខាងក្នុងវិមាន Capitol វិញ ជាជាងនៅខាងក្រៅ ដោយសារតែអាកាសធាតុត្រជាក់ខ្លាំង។ នេះគឺជាលើកទីមួយហើយក្នុងរយៈពេល ៤០ឆ្នាំដែលពិធីឡើងកាន់តំណែងប្រធានាធិបតីអាមេរិកត្រូវផ្លាស់ប្ដូរមកធ្វើខាងក្នុងអគារបែបនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ បានសរសេរនៅលើបណ្ដាញសង្គម Truth Social កាលពីថ្ងៃសុក្រថា៖ «មានព្រុះអាកទិកកំពុងបោកបក់មកលើប្រទេស។ ខ្ញុំមិនចង់ឃើញមនុស្សឈឺ ឬរងរបួសនោះទេ»។

លើកមុនពេលដែលពិធីឡើងកាន់តំណែង ត្រូវបានផ្លាស់ប្តូរទៅធ្វើនៅក្នុងអគារវិញ ក៏ដោយសារតែអាកាសធាតុចុះខ្លាំងរហូតដល់ដក ២៣ ទៅ ២៩អង្សាសេ គឺនៅក្នុងឆ្នាំ១៩៨៥ សម្រាប់ពិធីស្បថលើកទីពីររបស់អតីតប្រធានាធិបតីបក្សសាធារណរដ្ឋ លោក Ronald Reagan។

អាកាសធាតុសម្រាប់ទីក្រុងវ៉ាស៊ីនតោននៅថ្ងៃចន្ទ បានត្រូវព្យាករថា សីតុណ្ហភាពនៅពេលស្បថចូលកាន់តំណែងរបស់លោក ត្រាំ នឹងធ្លាក់ចុះប្រហែលដក៧អង្សាសេ បូករួមជាមួយខ្យល់ត្រជាក់។

លោក ត្រាំ បាននិយាយថា អ្នកគាំទ្រអាចមើលពិធីនេះនៅលើអេក្រង់នៅខាងក្នុងអគារ Capital One Arena ដែលជាកន្លែងកីឡានៅកណ្តាលទីក្រុងវ៉ាស៊ីនតោនដែលអាចផ្ទុកមនុស្ស ២០ ០០០នាក់។

អាកាសធាតុត្រជាក់ធ្លាប់បានជះឥទ្ធិពលដល់ពិធីឡើងកាន់តំណែងប្រធានាធិបតីអាមេរិកនាពេលកន្លងមក។

លោក William Henry Harrison ដែលជាប្រធានាធិបតីសហរដ្ឋអាមេរិកទី៩ បានថ្លែងសុន្ទរកថាដ៏វែងបំផុតនៅថ្ងៃទី៤ខែមីនាឆ្នាំ១៨៤១ ក្នុងស្ថានភាពសើម និងត្រជាក់ ដោយគ្មានមួក ឬអាវធំ។

ព្រឹត្តិការណ៍ និងសុន្ទរកថានោះត្រូវបានគេគិតថាបានរួមចំណែកធ្វើឲ្យគាត់ស្លាប់ដោយសារជំងឺរលាកសួត ដោយគាត់បានទទួលមរណភាពមួយខែបន្ទាប់ពីឡើងកាន់តំណែង ហើយអាណត្តិប្រធានាធិបតីរបស់គាត់មានរយៈពេលខ្លីបំផុតក្នុងប្រវត្តិសាស្ត្រអាមេរិក៕

ដោយ៖ ឈាង

ចុចអាន៖ ចុងសប្តាហ៍នេះ អាមេរិក ជួបព្យុះព្រឹលធ្ងន់ធ្ងរ ប៉ះពាល់ពលរដ្ឋជាង ៣០០លាននាក់