លោក ឡៃ៖ តៃវ៉ាន់ និង​ចិន គួរ​ជជែក​គ្នា​ស្វែង​រក​សន្តិភាព ជាជាងការ​ប្រឈម​មុខ

ប្រធានាធិបតីតៃវ៉ាន់ លោក ឡៃ ឈីងតេ (Lai Ching-te) បាន​អំពាវនាវឲ្យ​មានការសន្ទនាគ្នា ជាជាងការប្រឈមមុខដាក់គ្នា ហើយ​​​លើក​ឡើង​ថា តៃវ៉ាន់ និងចិនចាំបាច់ត្រូវពិភាក្សាគ្នា ដើម្បីសម្រេចបាននូវសន្តិភាព ដោយសារ​មាន​ «ការផ្លាស់ប្តូរ​ជា​ច្រើនដង» នៅក្នុងស្ថានភាពអន្តរជាតិ។

ថ្លែងនៅទីក្រុងតៃប៉ិទៅកាន់សមាជិកសហគមន៍ធុរកិច្ចតៃវ៉ាន់ដែលបានបណ្តាក់ទុននៅក្នុងប្រទេសចិន នៅ​ថ្ងៃ​ទី​៣​ខែ​​កុម្ភៈ​ឆ្នាំ​២០២៥ លោក ឡៃ បាននិយាយថា សត្រូវរួមរបស់តៃវ៉ាន់ និងចិន គឺជាគ្រោះមហន្តរាយធម្មជាតិ ហើយគោលដៅរួមរបស់ពួកគេ គឺសុខុមាលភាពរបស់ប្រជាជនទាំង​សងខាងនៃច្រកសមុទ្រតៃវ៉ាន់។

លោកបានមានប្រសាសន៍ថា៖ «ដូច្នេះហើយ យើងគួរតែ​មានការសន្ទនា និងការផ្លាស់ប្តូរដ៏ល្អរវាងភាគីទាំងពីរនៃច្រកសមុទ្រ ដើម្បីសម្រេចបាននូវគោលដៅសន្តិភាព ជាពិសេសនៅពេលមានការផ្លាស់ប្តូរច្រើនដងក្នុងស្ថានភាពអន្តរជាតិ»។

លោក ឡៃ បន្ថែមថា តៃវ៉ាន់ស្វាគមន៍យ៉ាងខ្លាំងចំពោះកិច្ចពិភាក្សាជាមួយចិន ដោយផ្អែកលើសមភាពដោយគ្មានលក្ខខណ្ឌ ហើយការសន្ទនាគួរតែ​ធ្វើ​ឡើង​ជំនួសការប្រឈមមុខដាក់គ្នា ប៉ុន្តែអនាគតរបស់តៃវ៉ាន់អាចត្រូវបានសម្រេច​យ៉ាង​ណា​នោះ​គឺ​អាស្រ័យ​លើ​​ប្រជាជនរបស់ខ្លួនតែប៉ុណ្ណោះ។

លោក ឡៃ ដែលចិន​​មិន​ពេញ​ចិត្ត ហើយ​ចាត់​ទុក​ថា​ជា«ជនផ្ដាច់​ខ្លួន​និយម» បានអំពាវនាវម្តងហើយម្តងទៀត​ឲ្យ​មានកិច្ច​ចរចាជាមួយទីក្រុងប៉េកាំង ខណៈ​ចិន​បានបង្កើនសម្ពាធផ្នែកយោធា និងនយោបាយប្រឆាំងនឹងកោះតៃវ៉ាន់។

ប៉ុន្តែទាំងប្រទេសចិន និងតៃវ៉ាន់ បាន​ប្រឈមមុខនឹងសម្ពាធពីរដ្ឋបាលថ្មីរបស់ប្រធានាធិបតីអាមេរិក ដូណាល់ ត្រាំ ដែលបានដំឡើងពន្ធលើ​ចិន និងបានគំរាមកំហែងវិធានការស្រដៀងគ្នានេះប្រឆាំងនឹងគ្រឿងអេឡិចត្រូនិកដែលនាំចូល ដែលជាវិស័យមួយដែលតៃវ៉ាន់គ្រប់គ្រង៕

ដោយ៖ ឈាង